༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་ཚན་པས་རྒྱ་གར་ལྷོ་ཕྱོགས་སྦེལ་ཀོབ་དང་། སྦེང་ལོར། མཻ་སོར་བཅས་སུ་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་རྒྱུའི་ལས་གཞི་ལེགས་པར་མཇུག་སྒྲིལ་ཡོད་པ་རེད།
དེ་ཡང་དབུ་མའི་ལམ་གྱི་སྲིད་བྱུས་གོ་རྟོགས་ལས་འགུལ་ནང་ཕྱོགས་བཞུགས་སྤྱི་འཐུས་མི་འགྱུར་རྡོ་རྗེ་ལགས་ཀྱིས་གཙོས་པའི་དབུ་མའི་ལམ་ཚན་པའི་འབྲེལ་ལས་བསྟན་འཛིན་ཀུན་མཁྱེན་ལགས་དང་རིན་ཆེན་ཆོས་མཚོ་ལགས་ནས་དབུ་མའི་ལམ་གྱི་ངོ་བོ་དང་། འཕེལ་རིམ། དམིགས་ཡུལ་སོགས་ཀྱི་ཐད་མཐོ་རིམ་སློབ་གྲྭའི་སློབ་ཕྲུག་དང་མི་མང་བཅས་ལ་གསུང་བཤད་དང་ཟབ་སྦྱོང་ལམ་ནས་གོ་རྟོགས་སྤེལ་ཡོད།
ཕྱི་ཚེས་ ༡༠ ཉིན་བྷེང་ལོར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་ཕྱོགས་བཞུགས་སྤྱི་འཐུས་མི་འགྱུར་རྡོ་རྗེ་ལགས་ཀྱིས་བོད་མིའི་སྒྲིག་འཛུགས་ཀྱི་གཞུང་འབྲེལ་སྲིད་བྱུས་དབུ་མའི་ལམ་གྱི་ངོ་བོ་དང་། འཕེལ་རིམ། གྲུབ་འབྲས་སོགས་ཀྱི་སྐོར་གསུང་བཤད་དང་ཚོགས་བཅར་བའི་དོགས་འདྲི་ཁག་ལ་ལན་འདེབས་གསལ་བཤད་གནང་ཡོད། གསུང་བཤད་གྲུབ་རྗེས་ཚོགས་བཅར་བ་རྣམས་སྡེ་ཚན་ཆ་བགོས་ཀྱིས་བགྲོ་གླེང་དང་བྱེད་སྒོ་རྣམ་བཞག་སོགས་སྤེལ་ཏེ་དབུ་མའི་ལམ་གྱི་སྲིད་བྱུས་སྐོར་རྒྱུས་ལོན་གནང་ཞིང་། སྐབས་དེར་གཞོན་སྐྱེས་ཚོགས་བཅར་བ་ ༤༧ མཉམ་ཞུགས་གནང་ཡོད་པ་རེད། དེ་བཞིན་ཕྱི་ཚེས་ ༡༡ ཉིན་གྱི་ཕྱི་དྲོ་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་དགེ་ལས་སློབ་ཕྲུག་ ༩༠ ལྷག་ལ་ཕྱོགས་བཞུགས་སྤྱི་འཐུས་མི་འགྱུར་རྡོ་རྗེ་ལགས་ཀྱིས་དབུ་མའི་ལམ་གྱི་སྐོར་ངོ་སྤྲོད་གསུང་བཤད་གནང་ཡོད།
ཕྱོགས་མཚུངས་ཕྱི་ཚེས་ ༡༣ དང་། ༡༤ ཉིན་མཻ་སོར་ཁུལ་གྱི་མཐོ་རིམ་སློབ་གྲྭའི་སློབ་གཉེར་བ་ ༤༠ ཙམ་དང་། ཕྱི་ཚེས་ ༡༥ དང་། ༡༦ ཉིན་སྦེལ་ཀོབ་བོད་ཁྱིམ་སློབ་གྲྭར་སློབ་ཕྲུག་ ༦༣ ལ་དབུ་མའི་ལམ་གྱི་གོ་རྟོགས་སྤེལ་ཡོད་པ་མ་ཟད། ཕྱི་ཚེས་ ༡༦ ཉིན་སྤྱི་འཐུས་མི་འགྱུར་རྡོ་རྗེ་ལགས་ཀྱིས་ལུགས་བསམ་དང་བདེ་སླར་བོད་མིའི་གཞིས་ཆགས་གཉིས་སུ་དབུ་མའི་ལམ་སྲིད་བྱུས་ཀྱི་རྒྱབ་ལྗོངས་གནས་ཚུལ་དང་། གྲུབ་འབྲས་ཇི་སོན་ཐད་འགྲེལ་བརྗོད་གནང་ཡོད་པ་བཅས།། 
