༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༩ ནས་ ༡༡ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་རྡ་ས་ནོར་བུ་གསོལ་མགྲོན་ཁང་དུ་སོ་ནམ་སྲིད་བྱུས་དང་འབྲེལ་བའི་ཚོགས་འདུ་བསྐོང་ཚོགས་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས་གཙོ་བཞུགས་ཐོག་རྒྱ་བལ་གཉིས་ཀྱི་བོད་མིའི་གཞིས་ཆགས་ཁག་དགུ་ནས་སོ་ནམ་སློབ་སྟོན་པ་ ༡༥ མཉམ་ཞུགས་ཐོག་ཚོགས་འདུ་དབུ་འཛུགས་གནང་ཡོད་ཅིང་། དབུ་འབྱེད་མཛད་སྒོའི་ཐོག་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སོ་ནམ་ཞིང་ལས་ཀྱི་གལ་གནད་དང་། སོ་ནམ་ཞིང་ལས་སྲིད་བྱུས་གསར་པའི་སྐོར་ངོ་སྤྲོད་གནང་གྲུབ་རྗེས་ས་གནས་ཁག་གི་སོ་ནམ་སློབ་སྟོན་པ་རྣམས་ནས་གཞིས་ཆགས་སོ་སོར་ལག་བསྟར་བྱེད་བཞིན་པའི་སོ་ནམ་ཞིང་ལས་དང་འབྲེལ་བའི་ལས་གཞི་ཁག་ངོ་སྤྲོད་གནང་ཡོད།
ཐེངས་འདིའི་སོ་ནམ་སློབ་སྟོན་པའི་ཚོགས་འདུའི་ནང་གཙོ་བོ་སོ་ནམ་སྲིད་བྱུས་གསར་པའི་སྐོར་བགྲོ་གླེང་གནང་རྒྱུ་མཚོན་པའི་སྦེལ་ཀོབ་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དུ་སོ་ནམ་ཞིང་ལས་དབྱེ་བའི་སྒྲོམ་གཞི་གསར་པ་ལག་བསྟར་གནང་ཕྱོགས་སྐོར་དང་། དེ་བཞིན་སྒོ་ཕྱུགས་གསོ་སྐྱོང་། ས་དང་ཆུ་གཉེར་སྲུང་། སོ་ནམ་ཞིང་ལས་བུན་གཡར། སྟོན་ཐོག་འགན་སྲུང་། འབུ་སྨན་བེད་སྤྱོད་གཏོང་ཕྱོགས་སོགས་ཀྱི་སྐོར་གོ་བསྡུར་གནང་རྒྱུ་ཡིན་པ་བཅས།། 
