༄༅། །བོད་ཀྱི་གློག་བརྙན་ (Tibet Films) དང་གཏམ་བཤད་ཚོགས་པའི་ (Talks Committee) གོ་སྒྲིག་འོག་བོད་ཀྱི་ཆབ་སྲིད་བཙོན་པ་དང་འཇིགས་བྲལ་ཞེས་པའི་གློག་བརྙན་བཟོ་སྐྲུན་པ་དོན་གྲུབ་དབང་ཆེན་ལགས་དང་ནང་མི་རྣམ་པ་ཕྱི་ལོ་ ༢༠༢༣ ཟླ་བ་ ༠༥ ཚེས་ ༢༤ ཉིན་ཉི་འོང་དུ་ཕེབས་འབྱོར་གྱིས་ཉི་འོང་དུ་བོད་དོན་སྐོར་སྐྱོད་དང་གློག་བརྙན་གཟིགས་འབུལ་ཞུ་རྒྱུ་ཡིན་པ་རེད།
ཐེངས་འདིའི་ཕྱོགས་སྐྱོད་སྐབས་དོན་གྲུབ་དབང་ཆེན་ལགས་ཀྱིས་ཉི་འོང་གི་རྒྱལ་ས་ཀྲོག་ཡོ་གཙོས་པའི་ས་གནས་ཁག་གཅིག་ཏུ་གསུང་བཤད་གནང་རྒྱུ་ཡིན་པ་ལྟར། ཕྱི་ཚེས་ ༢༦ ཉིན་དོན་གྲུབ་དབང་ཆེན་ལགས་ཀྱིས་ཉི་འོང་ཕྱི་རྒྱལ་གསར་འགོད་ལྷན་ཚོགས་སུ་གསར་འགོད་གསལ་བསྒྲགས་བསྐྱངས་ཏེ། ཕྱི་ལོ་ ༢༠༠༨ ལོར་གསང་སྟབས་ཀྱིས་བོད་ནང་གི་གནས་སྟངས་བརྙན་བླངས་པའི་རྒྱབ་ལྗོངས་གནས་ཚུལ་དང་། རྒྱ་ནག་གཞུང་གིས་འཆར་གཞི་སྲིད་བྱུས་ལྡན་པའི་ཐོག་བོད་ཀྱི་ཆོས་དང་རིག་གཞུང་རྒྱ་སྒྱུར་གཏོང་བཞིན་པའི་ཛ་དྲག་གནས་སྟངས་འགྲེལ་བརྗོད་གནང་ཞིང་། ཕྱི་དྲོར་མི་ཇི་གཙུག་ལག་སློབ་གཉེར་ཁང་ (Meiji University) དུ་གློག་བརྙན་གཟིགས་འབུལ་ལ་ལྷན་ཞུགས་ཀྱིས་གསུང་བཤད་གནང་ཡོད་པ་རེད།
ཕྱི་ཚེས་ ༢༧ ཉིན་ཤིན་ཇུ་ཀུ་ཚོགས་ཁང་ ( Shinjuku Hall) དུ་དོན་གྲུབ་དབང་ཆེན་ལགས་དང་ནང་མི་རྣམ་པས་མི་ཚེའི་དཀའ་སྡུག་ཉམས་མྱོང་གསུང་སྐབས་ཁོང་གི་བཟའ་ཟླ་ལྷ་མོ་མཚོ་ལགས་དང་། བུ་མོ་ཟླ་སྒྲོན་ལགས་དང་ལྷ་མོ་ལགས་གཉིས་ཀྱིས་ཇི་ལྟར་ཁོང་ཚོའི་ཨ་ཕ་བཙོན་གྲོལ་ཐོབ་སླད་རེ་སྒུག་བྱས་ཏེ་བསྡད་པའི་ཉམས་མྱོང་དང་སྦྲགས། རྒྱལ་སྤྱིའི་སྤྱི་ཚོགས་དང་གཞུང་ཁོངས་མིན་པའི་ཚོགས་སྡེ་ཁག་ནས་ཁོང་བཙོན་གྲོལ་ཐོབ་པར་རོགས་སྐྱོར་གནང་བར་ཐུགས་རྗེ་ལེགས་འབུལ་ཞུས་ཡོད་པ་རེད།
ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་དོན་གྲུབ་དབང་ཆེན་ལགས་ངོ་སྤྲོད་དང་འབྲེལ་ཁོང་དང་ཁོང་གི་ནང་མི་ལྟོས་བཅས་ནས་བོད་ཀྱི་རང་དབང་དང་དྲང་བདེན་འཐབ་རྩོད་ཆེད་དཀའ་སྡུག་མྱངས་ཚུལ་དང་། དེ་ལས་འཕྲོས་ཏེ་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་ངོ་བོ་བཅས་པ་རྩ་མེད་བཟོ་ཐབས་རྩོམ་བཞིན་པའི་སྐོར་གསལ་བཤད་གནང་བའི་ཐོག དོན་གྲུབ་དབང་ཆེན་ལགས་དང་། ཐེངས་འདིའི་ཕྱོགས་སྐྱོད་གོ་སྒྲིག་གནང་མཁན་མ་རི་ཨོ་གྷ་ཝ་ (Marie Ogawa) ལགས་དང་། ཧི་རོ་མི་ཨི་ཀི་ཊ་ (Hiromi Ikeda) ལགས་སོགས་ལ་ཐུགས་རྗེ་ལེགས་འབུལ་ཞུས་ཡོད།
ཕྱི་ཚེས་ ༢༨ ཉིན་དོན་གྲུབ་དབང་ཆེན་ལགས་དང་ནང་མི་ལྷན་རྒྱས་སྐུ་ཚབ་དོན་ཁང་དུ་མགྲོན་འབོད་སྣེ་ལེན་ཞུས་ཐོག་ཉི་འོང་ནང་གི་བོད་དོན་གནས་སྟངས་དང་སྐུ་ཚབ་དོན་ཁང་གི་ལས་དོན་བྱེད་ཕྱོགས་ངོ་སྤྲོད་གནང་བ་མ་ཟད། ཁོང་གིས་བོད་བསྟན་པ་ཆབ་སྲིད་ཆེད་སྐུ་ངལ་སྐྱོན་པར་ཐུགས་རྗེ་ལེགས་འབུལ་ཞུས་པ་དང་། དེ་ནས་ཁོང་རྣམས་ལ་གུང་ཚིགས་བཤམས་ཡོད་པ་རེད། སྐབས་དེར་དོན་གྲུབ་དབང་ཆེན་ལགས་དང་ལྷན་དུ་ཉི་འོང་བོད་རིགས་སྤྱི་མཐུན་ཚོགས་པའི་བློ་བཟང་ཡེ་ཤེས་ལགས་ལྷན་བཅར་ཞུས་ཡོད།
གོ་སྒྲིག་ཚོགས་ཆུང་ནས་དོན་གྲུབ་དབང་ཆེན་ལགས་ཀྱི་གློག་བརྙན་འཇིགས་བྲལ་ཞེས་པ་ཉི་འོང་གི་རྒྱལ་ས་ཆེ་ཁག་འགའ་ཤས་སུ་གཟིགས་འབུལ་དང་གསུང་བཤད་ལས་རིམ་གོ་སྒྲིག་ཞུ་འཆར་ཡོད་པ་དང་། ལས་གཞི་དེར་རྒྱལ་སྤྱིའི་ཉེས་ཡངས་ཚོགས་པ་དང་། ཉི་འོང་དགེ་འདུན་ལྷན་ཚོགས། ཉི་འོང་བོད་རང་བཙན་སློབ་ཕྲུག་ཚོགས་པ། པུ་ཕེས་སུ་བོད་དོན་ལྷན་ཚོགས། (Pufest Tibet Committee) ཉི་འོང་སྐུ་ཚབ་དོན་ཁང་བཅས་ནས་མཐུན་འགྱུར་གནང་གི་ཡོད་པ་བཅས།། 
