༄༅། །སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༥ པའི་ཐོག་སྤྱི་མོས་ཀྱིས་གཏན་འབེབས་ཞུས་པའི་གྲོས་ཆོད་དགོངས་དོན། རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ནང་གནས་འཁོད་བོད་རིགས་དཔྱ་དངུལ་ལོ་མང་འབུལ་ཆད་སོང་བ་དང་། གསར་བཟོ་མ་ཐུབ་པ་རྣམས་ལ་བོད་ཀྱི་ཡུལ་མིའི་ལས་འགན་ལེན་ཐུབ་པའི་གོ་སྐབས་སྤྲོད་ཆེད། རྩིས་ལོ་ ༢༠༢༢༌༌༌༢༣ བར་གྱི་དཔྱ་དངུལ་འབུལ་ཆད་ཇི་ཡོད་ཀྱི་བརྒྱ་ཆ་ ༩༠ ཆག་ཡང་དང་འཕྲོས་བརྒྱ་ཆ་ ༡༠ དོ་བདག་ནས་སྡེབ་འབུལ་ལམ། ཆ་བགོས་ཀྱིས་ངེས་འབུལ་དགོས་རྒྱུ། ཆག་ཡང་གི་གོ་སྐབས་འདི་ཡང་ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ཕྱི་ལོ་ ༢༠༢༤ ཟླ་ ༣ ཚེས་ ༣༡ བར་ལེན་ཐུབ་པ་དགོས་རྒྱུ་ཞེས་འཁོད་ཡོད་པས། ལོ་མང་དཔྱ་དངུལ་འབུལ་ཆད་སོང་བ་དང་། དཔྱ་དངུལ་ལག་དེབ་གསར་བཟོ་མ་ཐུབ་པ་རྣམས་ལ་དགོངས་པ་ཆེ་བཞེས་རྩིས་ལོ་ ༢༠༢༢༌༌༢༣ བར་གྱི་འབུལ་ཆད་ཀྱི་བརྒྱ་ཆ་ ༩༠ ཆག་ཡང་གནང་ཡོད་པ་གོ་སྐབས་འདི་ཆུད་ཟོས་སུ་མི་གཏོང་བར་དུས་ཡུན་ནང་ཞུ་ལེན་ཐུབ་པ་གནང་སྟེ། མུ་མཐུད་དཔྱ་དངུལ་བསྡུ་འབུལ་གྱིས་བོད་ཀྱི་ཡུལ་མིའི་ལས་འགན་བསྒྲུབ་ཐུབ་པ་གནང་གལ། ཕྱི་ལོ་ ༢༠༢༤ ཟླ་ ༣ ཚེས་ ༣༡ ནས་ཆག་ཡང་གི་དུས་ཡུན་རྫོགས་ཀྱི་ཡོད་པས་དེ་རྗེས་ངོ་བཞེས་གནང་ཐབས་མེད་པ་བཅས་ཀྱི་གསལ་བསྒྲགས་སུ། དཔལ་འབྱོར་ལས་ཁུངས་ནས་ཕྱི་ལོ་ ༢༠༢༣ ཟླ་ ༤ ཚེས་ ༡༠ ལ། །
