༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཡུ་རོབ་ཁུལ་གྱི་གཞུང་འབྲེལ་མཛད་འཆར་ཁག་ལེགས་པར་གྲུབ་རྗེས་རྒྱ་གར་དུ་འཁོར་མཚམས་ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༩ ཉིན་རྒྱ་གར་བྱང་ཕྱོགས་ཧི་མ་ཅཱལ་མངའ་སྡེའི་རྒྱལ་ས་སིམ་ལར་ཕེབས་འབྱོར་གྱིས་བདུན་ཕྲག་གཅིག་ཙམ་རིང་ཧི་མ་ཅཱལ་མངའ་སྡེའི་སྲིད་སྐྱོང་དང་སྤྱི་ཁྱབ་བློན་ཆེན་གྱིས་གཙོས་པའི་གནད་ཡོད་མི་སྣ་དང་མཇལ་འཕྲད་གནང་རྒྱུ་མཚོན་བོད་མིའི་གཞིས་ཆགས་དང་སློབ་གྲྭ་ཁག་གཅིག་ལ་འཚམས་གཟིགས་གནང་གནང་རྒྱུ་ཡིན་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལྡི་ལི་ནས་མཁའ་ལམ་བརྒྱུད་སིམ་ལར་ཕེབས་འབྱོར་སྐབས་ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་གཞོན། སིམ་སྤྱི་ཚེ་དབང་ཕུན་ཚོགས་ལགས་དང་ལས་བྱེད་རྣམ་པ། ས་གནས་རང་བདེན་ཚོགས་ཆུང་། དགོན་སྡེ་ཁག་གི་སྐུ་ཚབ། སིམ་ལ་སཾ་བྷོ་ཌ་གཏན་སློབ་ཀྱི་སློབ་སྤྱི་གཙོས་པའི་དགེ་ལས་སློབ་ཕྲུག ས་གནས་གཞོན་ནུ་དང་བུད་མེད་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་དང་། ཉིན་རྒྱབ་དཔལ་ལྡན་སྲིད་སྐྱོང་མཆོག་སིམ་ལ་སམ་བྷོ་ཊ་གཏན་སློབ་ཏུ་ཆེད་ཕེབས་ཀྱིས་དགེ་ལས་སློབ་ཕྲུག་ཡོངས་ལ་གསུང་བཤད་དང་སློབ་གྲྭར་གཟིགས་སྐོར་གནང་ཡོད།
སློབ་གྲྭའི་དགེ་ལས་སློབ་ཕྲུག་རྣམས་ལ་གསུང་བཤད་གནང་སྐབས་དཔལ་ལྡན་སྲིད་སྐྱོང་མཆོག་གིས་བོད་ཀྱི་ལོ་རྒྱུས་སྤྱི་དང་བྱེ་བྲག་ཏུ་འཕགས་བོད་གཉིས་ཀྱི་ལོ་རྒྱུས་ཀྱི་འབྲེལ་བའི་སྐོར་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་གསུངས་ཤིང་། ལོ་རྒྱུས་ཐོག་ནས་བོད་བརྒྱུད་ནང་བསྟན་དང་། བོད་ཀྱི་ཡིག་གཟུགས་བཅས་པ་རྒྱ་གར་ལ་དཔེ་བལྟས་ནས་བཟོས་པས་བོད་མི་རྣམས་ཀྱིས་རྒྱ་གར་ནི་སློབ་དཔོན་དང་བོད་མི་རྣམས་དགེ་ཕྲུག་ཏུ་ངོས་འཛིན་བྱེད་ཀྱི་ཡོད་སྐོར་འགྲེལ་བརྗོད་གནང་།
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཁོར་ཡུག་གི་གལ་གནད་དང་འབྲེལ་ཏེ་རྒྱ་ནག་གིས་བོད་བཙན་བཟུང་བྱས་ཏེ་ཕྱི་དངོས་པོའི་འཛུགས་སྐྲུན་ཡར་རྒྱས་གཞི་རྒྱ་ཆེན་པོ་སྤེལ་བཞིན་ཡོད་པ་དེས་རང་བཞིན་གྱིས་བོད་ཀྱི་ཁོར་ཡུག་ལ་གཏོར་སྐྱོན་ཚབས་ཆེ་འགྲོ་བཞིན་པ་མ་ཟད། བོད་ནས་ཐོན་པའི་གཙང་ཆུ་ཆེ་ཁག་ལ་ཆུ་མཛོད་བརྒྱབ་སྟེ་ཆུའི་བཞུར་འགྲོས་ལ་བསྒྱུར་བ་བཏང་རྐྱེན་གཤམ་འོག་ཏུ་གནས་པའི་ཨེ་ཤི་ཡའི་རྒྱལ་ཁབ་མང་པོར་ཆུའི་དཀའ་ངལ་ཆེན་པོ་འཕྲད་བཞིན་ཡོད་པས། བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་དེ་བོད་མི་ཙམ་མ་ཡིན་པར་ཨེ་ཤི་ཡ་སྤྱིའི་བདེ་སྡུག་ལ་འབྲེལ་བ་ཡོད་སྐོར་ངོ་སྤྲོད་ཞིབ་རྒྱས་གནང་ཡོད། དེ་མཚུངས་ཁོང་གིས་སློབ་གཉེར་བ་རྣམས་ནས་རང་ཉིད་ཀྱིས་མ་ཤེས་པ་ཡོད་རིགས་གསལ་པོ་བཟོ་ཆེད་དྲི་བ་འདྲི་རྒྱུའི་གོམས་གཤིས་དགོས་གལ་ཆེ་བ་དང་། དེ་ལྟར་གཞོན་སྐྱེས་རྣམས་མ་འོངས་པར་སྤྱི་པའི་འགན་འཁུར་མཁན་གྱི་འགོ་ཁྲིད་དུ་གྱུར་དགོས་པའི་ལམ་སྟོན་གནང་ཡོད་པ་རེད།
མཐར་གསར་འགོད་པ་ཁག་གཅིག་གིས་དཔལ་ལྡན་སྲིད་སྐྱོང་མཆོག་ཉེ་ལམ་ཡུ་རོབ་རྒྱལ་ཁབ་ཁག་ཅིག་ཏུ་ཕེབས་པའི་གནད་དོན་དང་། རྒྱ་ནག་གཞུང་གིས་དྲྭ་དམག་བརྒྱུད་འཛམ་གླིང་ལ་ཉེན་ཁ་བཟོ་བཞིན་པ་སོགས་ཀྱི་སྐོར་དྲི་བ་ཕུལ་བ་རྣམས་ལ་ལན་འདེབས་གསལ་བཤད་གནང་ཡོད་པ་བཅས།། 
