༄༅། །ཕྱི་ལོ་ ༢༠༢༣ ཟླ་བ་ ༥ ཚེས་ ༡༢ ཉིན་གྱི་ཕྱི་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅཱལ་མངའ་སྡེའི་རྒྱལ་ས་སིམ་ལར་མངའ་སྡེའི་སྲིད་སྐྱོང་སྐུ་ཞབས་ཤིབ་པྲ་ཏབ་ཤུཀ་ལ་ (Shiv Pratap Shukla) མཆོག་དང་མཇལ་འཕྲད་གནང་ཡོད།

དེ་ཡང་མཇལ་འཕྲད་སྐབས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སིམ་ལ་གནས་སྡོད་བོད་མི་རྣམས་ལ་འཕྲད་བཞིན་པའི་ས་ཆའི་དཀའ་ངལ་དང་། བོད་ནང་གི་ཛ་དྲག་གནས་སྟངས། འབྱུང་འགྱུར་རྒྱ་ནག་དེ་བཞིན་རྒྱ་གར་ཐེ་བའི་ཨེ་ཤི་ཡ་དང་འཛམ་གླིང་སྤྱི་ལ་ཉེན་ཁར་འགྱུར་ཉེན་ཡོད་སྐོར་སྙན་སེང་ཞུས་ཡོད་ཅིང་། སྐབས་དེར་དཔལ་ལྡན་སྲིད་སྐྱོང་མཆོག་དང་ལྷན་དུ་སིམ་སྤྱི་ཚེ་དབང་ཕུན་ཚོགས་ལགས་དང་། ནང་སྲིད་དྲུང་འཕར་བསྟན་འཛིན་ནོར་བུ་ལགས། ཟུང་དྲུང་བཀྲ་ཤིས་བདེ་སྐྱིད་ལགས། སིམ་སྤྱི་ལས་ཁུངས་ཀྱི་ལས་བྱེད་བཅས་ལྷན་བཅར་ཞུས་ཡོད་པ་རེད། སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅཱལ་མངའ་སྡེའི་རྒྱལ་ས་སིམ་ལར་མངའ་གཞུང་གི་སྤྱི་ཁྱབ་དྲུང་ཆེ་སྐུ་ཞབས་པྲ་བྷོཊ་སཀ་སེ་ན་ (Prabodh Saxena) མཆོག་དང་མཇལ་འཕྲད་ཀྱིས་ས་ཆ་བོགས་གཏོང་དང་འབྲེལ་བའི་གནད་དོན་ཁག་གཅིག་སྙན་སེང་ཞུས་པར་སྤྱི་ཁྱབ་དྲུང་ཆེ་མཆོག་གིས་བོད་མིའི་བདེ་དོན་ལ་དམིགས་ཏེ་དཀའ་ངལ་སེལ་ཐབས་གནང་རྒྱུའི་ཞལ་བཞེས་གནང་ཡོད།ཐེངས་འདིའི་དཔལ་ལྡན་སྲིད་སྐྱོང་མཆོག་གི་སིམ་ལ་ཁུལ་གྱི་གཞུང་འབྲེལ་མཛད་འཆར་ཁག་ལེགས་གྲུབ་བྱུང་རྗེས་ཕྱི་དྲོར་ཀུལླུ་མ་ན་ལིར་ཕེབས་ཐོན་གནང་ཞིང་། ཀུལླུ་དཔལ་རབ་གླིང་བོད་མིའི་གཞིས་ཆགས་སུ་ཕེབས་འབྱོར་མཚམས་ས་གནས་འགོ་འཛིན་ཚུལ་ཁྲིམས་རྡོ་རྗེ་ལགས་དང་། ས་འཐུས་ཚོགས་གཞོན།  ས་གནས་རང་བདེན་ཚོགས་ཆུང་། ས་གནས་ཀྱི་དགོན་སྡེ་ཁག་གི་སྐུ་ཚབ། ས་གནས་གཞོན་ནུ་དང་བུད་མེད་ལྷན་ཚོགས་ཀྱི་ཚོགས་མི། ས་གནས་དྭང་ཟུར་སྐྱིད་སྡུག་ཚོགས་པའི་ཚོགས་མི། ས་གནས་ཚོང་པའི་སྐྱིད་སྡུག་ཚོགས་ཆུང་གི་ཚོགས་མི། ས་གནས་ཧི་མ་ལ་ཡ་ནང་པའི་ཚོགས་ཆུང་གི་ཚོགས་མི། ས་གནས་རྒྱལ་ཡོངས་མང་གཙོ་ཚོགས་པའི་ཚོགས་མི། ཧིན་བོད་མཛའ་འབྲེལ་ཚོགས་པའི་ཚོགས་མི། ས་གནས་འགོ་འཛིན་ལས་ཁུངས་ཀྱི་ལས་བྱེད་བཅས་ནས་ཕེབས་བསུའི་སྣེ་ལེན་ཞུས་ཡོད་པ་བཅས།།