༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སུཁ་བིནྡར་སིངྷ་སུཀ་ཁཱུ་མཆོག་དང་མཇལ་འཕྲད་ཞུས་ཡོད། དེ་ཡང་མཇལ་འཕྲད་སྐབས་དཔལ་ལྡན་སྲིད་སྐྱོང་མཆོག་གིས་སྤྱི་ཁྱབ་བློན་ཆེན་མཆོག་ལ་ཧི་མ་ཅལ་ཁུལ་དུ་གནས་སྡོད་བོད་མིའི་ས་ཆ་བོགས་གཏོང་དང་འབྲེལ་བའི་དཀའ་ངལ་ཁག་ཅིག་སྙན་སེང་དང་དེ་དོན་དཀའ་སེལ་སླད་འབོད་སྐུལ་ཞུས་དོན་ལྟར་སྤྱི་ཁྱབ་བློན་ཆེན་མཆོག་ནས་ཞལ་བཞེས་བཟང་པོ་གནང་ཡོད་པ་རེད།
དེ་ཡང་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སིམ་ལ་གཞིས་ཆགས་ཁྱབ་ཁོངས་ཁ་འཐོར་བོད་མིའི་གནས་སྡོད་འཆི་མེད་གླིང་དང་། ཁྲི་སྡེ་གླིང་བཅས་སུ་འཚམས་གཟིགས་དང་། དེ་ཁུལ་མི་མང་ཐུག་འཕྲད་གནང་རྗེས། སིམ་ལ་བོད་མིའི་ཁྲོམ་སར་གཟིགས་སྐོར་ཕེབས་གནང་ཡོད། ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་སིམ་ལ་བོད་མིའི་ཁ་འཐོར་གཞིས་ཆགས་ཀྱི་ཉེ་འགྲམ་དུ་ཆགས་པའི་མལ་ཡ་ན་ས་གཞིར་གཟིགས་ཞིབ་གནང་གྲུབ་མཚམས་སིམ་ལ་སཾ་བྷོ་ཊ་སློབ་གྲྭར་ས་གནས་བོད་རིགས་མང་ཚོགས་འདུ་འཛོམས་ཐོག་གསུང་བཤད་དང་། མང་ཚོགས་ཀྱི་དོགས་འདྲི་ཁག་ལ་ལན་འདེབས་གསལ་བཤད་གནང་ཞིང་། སྐབས་དེར་ཁོང་གིས་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལུང་བསྟན་གནང་བ་ལྟར་དགུང་ལོ་བརྒྱ་ལྷག་བཞུགས་པར་བོད་མི་སྤྱི་བོ་གནམ་བསྟན་ཡོངས་ནས་མགོན་པོ་གང་ཉིད་མཆོག་གི་བཀའ་གསུང་ཅི་སྒྲུབ་གནང་དགོས་པའི་ལམ་སྟོན་དང་སྦྲགས། བོད་མིའི་གཞིས་ཆགས་ཁག་རང་ཁ་རང་གསོ་ཡོང་ཐབས་སུ་འབད་རྩོལ་ཞུ་གལ་ཆེ་བ་དང་། གཞིས་ཆགས་སྲ་བརྟན་ཡོང་བར་དཀའ་ངལ་ཆེ་ཤོས་ཤིག་ནི་གཞོན་སྐྱེས་རྣམས་རྒྱ་གར་གྱི་གྲོང་ཁྱེར་ཁག་དང་ཕྱི་རྒྱལ་དུ་གནས་སྤོ་བྱེད་བཞིན་པ་དེ་ཡིན་ཞེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་ནས་དེར་འདུས་མང་ཚོགས་ལ་བཀའ་ཤག་སྐབས་བཅུ་དྲུག་པའི་དམིགས་ཡུལ་ཇི་ཡིན་རྟོགས་པར་ཉེ་ལམ་བཏོན་པའི་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་བོད་ཀྱི་མ་འོངས་འགན་སྲུང་ཞེས་པ་ལྟ་ཀློག་དགོས་པའི་རེ་སྐུལ་གནང་ཡོད།
མཛད་སྒོའི་ཐོག་སིམ་ལའི་ས་གནས་འཐུས་ཚོགས་ཀྱི་ཚོགས་གཙོ་བསྟན་འཛིན་ལགས་ནས་སིམ་ལ་ས་གནས་སུ་གཟེངས་སུ་ཐོན་པའི་ཞབས་འདེགས་བསྒྲུབས་པར་ལེགས་གསོལ་བསྔགས་བརྗོད་ཀྱི་ཕྱག་འཁྱེར་གནང་བ་དང་ཆབས་ཅིག་ས་གནས་ཀྱི་བོད་མི་ཚོང་པ་ཁག་ཅིག་ལ་ས་ཆའི་བདག་དབང་གི་ཕྱག་འཁྱེར་ཡང་གནང་ཡོད་པ་བཅས།། 
