༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སིམ་ལ་ཁུལ་གྱི་དགོན་སྡེ་དང་། ལས་ཁུངས་ཁག བོད་མི་འདུས་སྡོད་ས་གནས་སོ་སོར་འཚམས་གཟིགས་སུ་ཕེབས་གནང་ཡོད་པ་རེད།དེ་ཡང་གོང་ཚེས་ཉིན་ཐོག་མར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སིམ་ལར་རྟེན་གཞི་བྱས་པའི་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ་གནས་གཟིགས་སུ་ཕེབས་ཡོད་པ་དང་། སྐབས་དེར་དགོན་པའི་མཁན་ཟུར་དང་མཁན་རིན་པོ་ཆེ་མཆོག་གིས་དགོན་པའི་ལོ་རྒྱུས་དང་ད་ལྟའི་གནས་བབ་སྐོར་ངོ་སྤྲོད་གནང་ཞིང་། དེ་རྗེས་སྐུ་བཅར་རྣམ་པར་རྒྱལ་བ་ཕན་བདེ་ལེགས་བཤད་གླིང་གྲྭ་ཚང་གི་རྒན་གསོ་ཁང་དུ་ཆེད་ཕེབས་ཀྱིས་རྒན་རྒོན་རྣམས་དང་མཇལ་མོལ་གནང་ཡོད།དེ་བཞིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སིམ་ལ་ཁྱབ་ཁོངས་ཁ་འཐོར་བོད་མིའི་གནས་སྡོད་སངས་རྒྱས་ཆོས་གླིང་གྲོང་སྡེ་དང་། རང་བཙན་གྲོང་སྡེ་བཅས་སུ་འཚམས་གཟིགས་དང་། དེ་བཞིན་གྲོང་སྡེ་དེ་གཉིས་ནང་གནས་སྡོད་བོད་མི་དང་ཐུག་འཕྲད་གནང་སྟེ་ས་ཁང་གི་དཀའ་ངལ་ཇི་ཡོད་ཞུས་དོན་ཁག་ལ་གསན་བཞེས་གནང་ཡོད། དཔལ་ལྡན་སྲིད་སྐྱོང་མཆོག་རང་བཙན་གྲོང་སྡེར་འཚམས་གཟིགས་སྐབས།  སིམ་ལ་ཁུལ་གྱི་གྲོང་སྡེ་ལྷན་ཚོགས་ཀྱི་ཚོགས་མི་ཟུར་པ་སྐུ་ཞབས་ཨ་ནུབ་ཝེཊ་ (Anup Vaid) ལགས་ཀྱིས་འཚམས་འདྲི་ཞུས་གནང་ཡོད།ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སིམ་ལར་རྟེན་གཞི་བྱས་པའི་སྔ་འགྱུར་རྙིང་མའི་མ་དགོན་ཐུབ་བསྟན་རྡོ་རྗེ་བྲག་དགོན་པར་གནས་གཟིགས་དང་། སྔ་འགྱུར་བསྟན་པའི་མངའ་བདག་༸སྐྱབས་རྗེ་དམ་པ་སྟག་ལུང་རྩེ་སྤྲུལ་རིན་པོ་ཆེའི་ཡང་སྲིད་མཆོག་སྤྲུལ་རིན་པོ་ཆེ་མཆོག་ལ་མཇལ་ཕྱག་ཞུས་རྗེས་སིམ་ལ་སྤྱི་ཁྱབ་ལས་ཁུངས་དང་། ས་འཐུས་ལས་ཁུངས། ས་གནས་བུད་མེད་ལྷན་ཚོགས་ཀྱི་ལས་ཁུངས། བུ་བཅོལ་ཁང་། དབྱངས་ཅན་དགའ་ཚལ་གླིང་གཞིས་ཁག་གསུམ། ཡན་ལག་སྨན་རྩིས་ཁང་བཅས་ལ་འཚམས་གཟིགས་ཕེབས་གནང་ཡོད།དཔལ་ལྡན་སྲིད་སྐྱོང་མཆོག་དང་ལྷན་སིམ་སྤྱི་ཚེ་དབང་ཕུན་ཚོགས་ལགས་ཀྱིས་གཙོས་པའི་སིམ་སྤྱི་ལས་ཁུངས་ཀྱི་ལས་བྱེད་དང་། ནང་སྲིད་དྲུང་འཕར་བསྟན་འཛིན་ནོར་བུ་ལགས་དང་ཟུང་དྲུང་བཀྲ་ཤིས་བདེ་སྐྱིད་ལགས་ལྷན་བཅར་ཞུས་ཡོད་པ་བཅས།།