༄༅། །ཕྱི་ལོ་ ༢༠༢༣ ཟླ་བ་ ༥ ཚེས་ ༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནོར་ཝེ་རྒྱལ་ས་ཨོ་སེ་ལོའི་གནམ་ཐང་དུ་ཕེབས་འབྱོར་སྐབས་བོད་རིགས་སྤྱི་མཐུན་ཚོགས་པའི་ཚོགས་གཙོ་དབང་ཕྱུག་ལགས་དང་། ནོར་ཝེ་བོད་དོན་རྒྱབ་སྐྱོར་ཚོགས་པའི་ (Norwegian Tibet Committee)  སྤྱི་ཁྱབ་འཛིན་སྐྱོང་འགན་འཛིན་ལྕམ་སྐུ་ (Merethe Lind Jodalen) ལགས། ས་གནས་བོད་རིགས་མང་ཚོགས་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ནོར་ཝེ་ས་གནས་བོད་རིགས་མང་ཚོགས་ལ་བཀའ་ཤག་སྐབས་ ༡༦ པའི་སྲིད་བྱུས་ལངས་ཕྱོགས་འགྲེལ་བརྗོད་དང་། ད་ལྟའི་བོད་ནང་གི་ཛ་དྲག་གནས་སྟངས། བཙན་བྱོལ་བོད་མི་རྣམས་ཀྱིས་མཐུན་ལམ་ཟོང་ཁ་གཅིག་སྒྲིལ་ཐོག་ནས་བོད་ཀྱི་རྩ་དོན་ལ་ནུས་པ་མཉམ་སྤུངས་ཐོག་ཧུར་སྐྱེད་དགོས་སྐོར།  ལྷག་པར་ཉེ་ཆར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བྱིས་པ་ཞིག་ལ་བྱམས་བརྩེའི་རྣམ་འགྱུར་ལ་བསྙད་དེ་སྤྱི་ཚོགས་དྲ་ལམ་ཐོག་མཚན་དམས་ཞུས་པ་དེ་རྐྱེན་ངན་གྲོགས་སུ་བསྒྱུར་ཏེ་བོད་མི་ནང་ཁུལ་མཐུན་སྒྲིལ་སྔར་ལྷག་ཆེ་ཆེར་མངོན་བཞིན་པ་དང་། གཞིས་ལུས་བོད་རིགས་སྤུན་ཟླ་ཚོར་༧གོང་ས་མཆོག་གི་གསེར་ཞལ་མཇལ་བའི་སྐལ་བཟང་གོ་སྐབས་ཐོབ་ཡོད་སྐོར་སོགས་གསུངས།ཕྱི་ཚེས་ ༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ནོར་ཝེ་གྲོས་ཚོགས་སུ་ནོར་ཝེ་ལྗང་ཁུ་སྲིད་དོན་ཚོགས་པའི་གྲོས་ཚོགས་འཐུས་མི་དང་། གྲོས་ཚོགས་ཀྱི་ཚོང་དོན་དང་བཟོ་གྲྭའི་ཚོགས་ཆུང་གི་ཚོགས་མི་སྐུ་ཞབས་རཱ་སི་མུ་སི་ཧཱན་སན་ (Rasmus Hansson) མཆོག་དང་། ནོར་ཝེ་གུ་ཡངས་སྲིད་དོན་ཚོགས་པའི་ཚོགས་མི་དང་གྲོས་ཚོགས་ཀྱི་ནུས་ཤུགས་དང་། ཁོར་ཡུག་ཚོགས་ཆུང་གི་ཚོགས་མི་སྐུ་ཞབས་ཨོ་ལ་ཨེལ་ཝེ་སི་ཊན་ (Ola Elvestuen) མཆོག རྙིང་ཞེན་སྲིད་དོན་ཚོགས་པའི་གྲོས་ཚོགས་འཐུས་མི་དང་། གྲོས་ཚོགས་ཀྱི་ཕྱི་སྲིད་ལས་དོན་དང་བདེ་སྲུང་ཚོགས་ཆུང་གི་ཚོགས་མི་ལྕམ་སྐུ་ (Ingjerd Schou) མཆོག་བཅས་དང་མཇལ་འཕྲད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་གྲོས་ཚོགས་འཐུས་མི་རྣམས་ལ་རྒྱ་ནག་གཞུང་གིས་བོད་ཕྲུག་རྣམས་བཙན་དབང་གིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་གི་ནང་སློབ་འཇུག་བྱེད་བཞིན་པ་སོགས་ད་ལྟའི་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་། དེ་བཞིན་ཁོང་རྣམས་བཞུགས་སྒར་རྡ་སར་གདན་ཞུས་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས་སྤྱི་ཟུར་ཆུང་བདག་ཀོ་རིན་ལགས་དང་ཐུག་འཕྲད་གནང་རྗེས་མཁའ་ལམ་བརྒྱུད་ཌེན་མག་གི་རྒྱལ་ས་ཀོ་པེན་ཧེ་གྷན་དུ་ཕེབས་ཐོན་གནང་ཡོད་པ་བཅས། །