༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་སི་ཀོཊ་ལན་ཌི་ཁུལ་དུ་ཉིན་གྲངས་གཉིས་རིང་གི་གཞུང་འབྲེལ་ཕྱོགས་ཕེབས་ཀྱི་མཛད་རིམ་ཁག་ལེགས་པར་གྲུབ་རྗེས་ཕྱི་ལོ་ ༢༠༢༣ ཟླ་བ་ ༤ ཚེས་ ༢༩ ཉིན་ཨིན་ཡུལ་གྱི་རྒྱལ་ས་ལོན་ཌོན་དུ་ཕེབས་འབྱོར་བྱུང་ཡོད་པ་དང་། ཕྱི་དྲོ་ལོན་ཌོན་ཁུལ་གནས་སྡོད་བོད་རིགས་གཞོན་སྐྱེས་དང་ཐུག་འཕྲད་ཀྱིས་ལོ་རྒྱུས་ཐོག་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པའི་སྐོར་དང་། ད་ལྟའི་བོད་ཀྱི་ཆབ་སྲིད་གནས་བབ། དེ་བཞིན་བོད་ནི་འཛམ་གླིང་གི་སྣེ་གསུམ་པ་དང་། ཨེ་ཤི་ཡའི་ཆུ་བོའི་འབྱུང་ཁུངས་ཡིན་པ་སོགས་བོད་ཀྱི་ཁོར་ཡུག་གི་གལ་གནད། བོད་དོན་འཐབ་རྩོད་ཐོག་གཞོན་སྐྱེས་ཚོས་འགན་འཁྲི་ཁུར་ཕྱོགས་བཅས་ཀྱི་ཐོག་གསུང་བཤད་གནང་ཡོད་པ་མ་ཟད། གཞོན་སྐྱེས་རྣམ་པའི་དྲི་བ་ཁག་ལ་ལན་འདེབས་གསལ་བཤད་གནང་ཡོད།ཕྱི་ཚེས་ ༢༩ ཉིན་གྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལོན་ཌོན་ཁུལ་གནས་སྡོད་བོད་རིགས་མང་ཚོགས་ལ་གསུང་བཤད་གནང་ཡོད། མཛད་སྒོའི་ཐོག་བཀའ་ཟུར་སྟག་ལྷ་སྐལ་བཟང་དབྱངས་སྐྱིད་མཆོག་དང་སྐུ་ཚབ་དོན་གཅོད་ཟུར་པ་ཚེ་རིང་བཀྲ་ཤིས་ལགས་རྣམ་གཉིས་ཆེད་ཕེབས་གནང་ཡོད།ཕྱི་ཚེས་ ༣༠ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལོན་ཊོན་བོད་ཀྱི་སྐད་ཡིག་དང་རིག་གཞུང་གཟའ་མཇུག་སློབ་གྲྭར་གཟིགས་སྐོར་ཕེབས་ཏེ་ཐེངས་འདིའི་ཨིན་ཡུལ་རྒྱལ་ཁབ་ནང་གི་གཞུང་འབྲེལ་མཛད་འཆར་ཁག་ཡོངས་སུ་ལེགས་གྲུབ་བྱུང་ཡོད་ཅིང་། ཕྱི་ཟླ་ ༥ ཚེས་ ༡ ཉིན་དཔལ་ལྡན་སྲིད་སྐྱོང་མཆོག་ནོར་ཝེ་རྒྱལ་ས་ཨོ་སོ་ལོ་ (Oslo) ལ་ཕེབས་ཐོན་གནང་རྒྱུ་ཡིན་པ་བཅས། །