༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༥ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་མདུན་གཡབ་ཏུ་བྷཱ་རཏ་ཏིབྦཏ་སཧཡོག་མཾཅ་ཞེས་པའི་རྒྱ་གར་བོད་དོན་རྒྱབ་སྐྱོར་ཚོགས་པ་དབུ་བརྙེས་ཏེ་ལོ་ངོ་ཉེར་ལྔ་འཁོར་བའི་དུས་ཆེན་སྲུང་བརྩི་གཟབ་རྒྱས་ངང་ཚོགས་ཡོད་པ་རེད།
དེ་ཡང་གོང་ཚེས་ཉིན་རྒྱ་གར་བོད་དོན་རྒྱབ་སྐྱོར་ཚོགས་པའི་ཉེར་ལྔའི་དུས་སྟོན་གྱི་སྐུ་མགྲོན་གཙོ་བོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བྷཱ་རཏ་ཏིབྦཏ་སཧཡོག་མཾཅ་ཞེས་པའི་རྒྱ་གར་བོད་དོན་རྒྱབ་སྐྱོར་ཚོགས་པ་དབུ་འཛུགས་གནང་མཁན་སྐུ་ཞབས་ཨིན་དྲེཤ་ཀུ་མཱར་མཆོག རྒྱ་གར་གྲོས་ཚོགས་འོག་མའི་འཐུས་མི་ཇུ་གལ་ཀི་ཤོར་ཤརྨ་ལགས། རྒྱ་གར་གྲོས་ཚོགས་འོག་མའི་འཐུས་མི་ཀི་ཤན་ཀ་པཱུར་ལགས། བོད་མི་མང་སྤྱི་འཐུས་ཁག་གཅིག བྷཱ་རཏ་ཏིབྦཏ་སཧཡོག་མཾཅ་ཞེས་པའི་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་དྲུང་ཆེ་པཾཀཇ་གོ་ཡལ་ལགས། དེ་བཞིན་བྷཱ་རཏ་ཏིབྦཏ་སཧཡོག་མཾཅ་ཞེས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཡན་ལག་ཚོགས་པ་ཁག་གི་ཚོགས་མི་རྣམ་པ། རྡ་ས་ཁུལ་གྱི་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། ཕྱི་རྒྱལ་དང་བོད་མི་མང་ཚོགས་སོགས་ཚང་འཛོམས་གནང་ཡོད་པ་རེད།
སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས་གསུང་བཤད་གནང་སྐབས་བོད་དང་རྒྱ་གར་གཉིས་བར་ལོ་ངོ་སྟོང་ཕྲག་སྔོན་ནས་ཆོས་དང་རིག་གཞུང་ཐོག་ནས་འབྲེལ་བ་ཡོད་པ་དང་། འབྲེལ་ལམ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་སློབ་བར་གྱི་འབྲེལ་ལམ་ཡིན་ཞེས་འགྲེལ་བརྗོད་གནང་ཡོད་ཅེས་དང་། ལྷག་པར་རྒྱ་གར་གྱི་མཁན་ཆེན་ཞི་བ་འཚོ་དང་། སློབ་དཔོན་པདྨའི་ངང་ཚུལ། ཇོ་བོ་རྗེ་དཔལ་ལྡན་ཨ་ཏི་ཤ་སོགས་འཕགས་ཡུལ་གྱི་པཎྚི་ཏ་མང་པོ་བོད་དུ་ཞབས་ཀྱི་བཅག་སྟེ་ནང་པ་སངས་རྒྱས་པའི་བསྟན་པ་དར་འཕེལ་དང་དག་ཐེར་གནང་སྟེ་བོད་ཡུལ་དེ་བཞིན་ནང་པའི་རྒྱལ་ཁབ་ཅིག་ཏུ་གྱུར་ཡོད་སྐོར་ངོ་སྤྲོད་གནང་ཡོད།
དེ་བཞིན་ཁོང་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་ལས་དམ་བཅའ་ཆེན་པོ་ཞིག་ནི་རྒྱ་གར་གྱི་གནའ་བོ་རིག་གཞུང་སླར་གསོ་གནང་རྒྱུ་ཡིན་པ་དང་། དེ་ལ་བརྟེན་ནས་འཛམ་གླིང་ཁྱོན་ལ་ཞི་བདེ་དང་འཆམ་མཐུན་ཡོང་བར་ཕན་ཐོགས་རླབས་ཆེན་ཡོད་པས། རྒྱ་གར་བ་དང་བོད་མི་ཟུང་སྦྲེལ་གྱིས་མགོན་པོ་མཆོག་གི་དགོངས་གཞི་སྒྲུབ་ཐབས་ལ་འབད་འབུངས་རྒྱ་ཆེ་དགོས་པའི་ལམ་སྟོན་གནང་ཡོད།
ཕྱོགས་མཚུངས་དཔལ་ལྡན་སྲིད་ཚབ་མཆོག་གིས་ལོ་རྒྱུས་ཐོག་བོད་དེ་རང་དབང་རང་བཙན་ཡོད་པའི་རྒྱལ་ཁབ་ཅིག་ཡིན་ཞིང་། རྒྱ་ནག་གཞུང་ལ་བོད་ཐོག་དབང་བསྒྱུར་བྱེད་རྒྱུའི་ཁྲིམས་མཐུན་དབང་ཚད་མེད་ཅེས་དང་། བོད་ཡུལ་དེ་བཞིན་ས་བབ་ཆགས་ཚུལ་ཐོག་ནས་ཨེ་ཤི་ཡའི་ཆུ་མཛོད་ལྟ་བུར་གྱུར་ཡོད་པ་མ་ཟད། ཨེ་ཤི་ཡའི་བདེ་འཇགས་ལའང་གལ་ཆེན་པོ་ཡིན་སྟབས། བོད་རྒྱའི་དཀའ་རྙོག་བསལ་རྒྱུ་དེ་བོད་མི་ཁོ་ནའི་རྩ་དོན་མིན་པར་ཨེ་ཤི་ཡ་སྤྱི་ཡོངས་ཀྱི་བདེ་དོན་བདེ་འཇགས་ལ་གལ་གནད་ཆེན་པོ་ཆགས་ཀྱི་ཡོད་སྐོར་འགྲེལ་བརྗོད་གནང་ཡོད་པ་བཅས།།
