༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཐའེ་ཝན་དུ་བཅའ་བཞུགས་ཡུ་རོབ་མནའ་འབྲེལ་མཐུན་ཚོགས་ཀྱི་སྐུ་ཚབ་ཕི་ལིཔ་ (Filip Grzegorzewski​​​) མཆོག་གིས་གདན་ཞུ་གནང་བ་ལྟར། ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། དྲུང་ཆེ་མི་འགྱུར་གཡུ་སྒྲོན་ལགས་རྣམ་གཉིས་ཐའེ་ཝན་དུ་གཉེར་བའི་ཡུ་རོབ་དུས་ཆེན་ལ་མཉམ་ཞུགས་ཞུས་ཏེ། འབྲེལ་ཡོད་ཡོ་རོབ་རྒྱལ་ཁབ་ཁག་གི་གཞུང་ཚབ་དང་། ཐའེ་ཝན་ཕྱི་སྲིད་ལས་ཁུངས་ཀྱི་དཔོན་རིགས་དང་མཉམ་དུ་ཕན་ཚུན་ཐུག་འཕྲད་དང་ངོ་སྤྲོད་ཀྱི་ལས་གཞི་སྤེལ་ཡོད་པ་རེད།དེ་ཡང་ཕྱི་ཟླ་ ༥ ཚེས་ ༥ དང་ ༦ བཅས་ཉིན་གྲངས་གཉིས་རིང་ཡུ་རོབ་དུས་ཆེན་དེ་བཞིན་ཐའེ་པེ་གྲོང་ཁྱེར་དུ་གཉེར་ཡོད་པ་དང་། ད་ལོ་ནི་ཡུ་རོབ་མནའ་འབྲེལ་མཐུན་ཚོགས་ཀྱི་གཞུང་ཚབ་ལས་ཁུངས་ཐའེ་ཝན་ལ་བཙུགས་ཏེ་མི་ལོ་ ༢༠ འཁོར་བ་དང་། ཕྱི་ཟླ་ ༥ ཚེས་ ༩ ཉིན་ནི་ཡུ་རོབ་དུས་ཆེན་འཁེལ་གྱི་ཡོད་སྟབས་དྲན་་རྟེན་ཆེད་དུ་གཉེར་བ་ཞིག་རེད་འདུག སྔ་དྲོ་དབུ་འབྱེད་མཛད་སྒོའི་ཐོག་ཡུ་རོབ་མནའ་འབྲེལ་གྱི་སྐུ་ཚབ་ཕི་ལིཔ་ (Filip Grzegorzewski​​​) མཆོག་གིས་ཐའེ་ཝན་དང་ཡུ་རོབ་གཉིས་ས་ཐག་རིང་ཡང་རང་དབང་མང་གཙོའི་ཐུན་མོང་གི་ལྟ་གྲུབ་དེར་ཕན་ཚུན་ཐག་ཉེ་རུ་བཏང་ཡོད་ཅེས་གསུང་པ་དང་།

ཐའེ་ཝན་ཕྱི་སྲིད་བློན་ཆེན་སྐུ་ཞབས་ (Jaushieh Joseph Wu) མཆོག་གིས་ཀྱང་ཉེ་ལམ་ཡུ་རོབ་ནས་གཞུང་འབྲེལ་གཟིགས་སྐོར་དུ་ཚོགས་པ་གཅིག་རྗེས་གཉིས་མཐུད་ཐའེ་ཝན་དུ་ཕེབས་བཞིན་པ་དང་། ཡུ་རོབ་རྒྱལ་ཁབ་ཁག་ནས་ཐའེ་ཝན་མཚོ་འགྲམ་གྱི་བརྟན་བརླིང་ལ་མཐོང་ཆེན་པོ་གནང་བ་མ་ཟད། ཡུ་རོབ་གྲོས་ཚོགས་སུ་འཐུས་མི་རྣམས་ཀྱིས་མཐའ་གཅིག་ཏུ་ཐའེ་ཝན་ལ་རྒྱབ་སྐྱོར་གནང་བའི་གསུང་བཤད་གནང་བར་ཐུགས་རྗེ་ཆེ་ཞེས་ཞུས་ཡོད།

ད་ཐེངས་ཀྱི་ཡུ་རོབ་དུས་ཆེན་ལ་ཡུ་རོབ་རྒྱལ་ཁབ་ ༡༦ ཡི་གཞུང་ཚབ་མཉམ་ཕེབས་ཞུས་ཡོད་པ་དང་། རྒྱལ་ཁབ་ཁག་ནས་སོ་སོའི་རྒྱབ་ཁབ་ཀྱི་རིག་གཞུང་དང་། ཞལ་ལག ཡུལ་སྐོར། སློབ་སྦྱོང་། ལས་ཀ་བཅས་ངོ་སྤྲོད་བྱེད་སའི་ཁྲོམ་གཞུང་ ༨༠ ལྷག་ཡོད་པ་མ་ཟད། རྒྱལ་ཁབ་ཁག་གི་གཞུང་ཚབ་རྣམས་སྡིང་ཆའི་སྟེང་སྐུ་པར་མཉམ་སྒྲོན་ཞུས་སྐབས་ཐའེ་ཝན་སྐུ་ཚབ་དོན་གཅོད་ཀྱང་མཉམ་དུ་སྐུ་པར་སྒྲོན་ཡོད་པ་བཅས། །