༄༅། །འདི་གར་ཀ་སྦུག་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ལོར་ཀ་རྡོར་སྒང་གསུམ་དང་། ར་ཝང་ལ། བསུ་ན་མདའ་མི་མང་རྣམས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་འདེགས་འབུལ་སྐབས་སྐད་ཡིག་དང་འབྲེལ་བའི་དམ་བཅའ་ཕུལ་བ་གཞིར་བཟུང་། ཕྱི་ལོ་ ༢༠༡༩ ནས་བཟུང་ཀ་སྦུག་གནས་སྡོད་མི་སྣ་འགས་ཐུགས་ཁུར་རྐང་བཞེས་ཐོག་བོད་ཀྱི་སྐད་ཡིག་འདི་བཞིན་སྲོག་རྩ་ཞིག་ལ་ངོས་འཛིན་གྱིས་སྐད་ཡིག་སྲུང་སྐྱོབ་ཚོགས་པ་ཞེས་གསར་བཙུགས་གནང་སྟེ་ད་བར་ལོ་ངོ་བཞི་འཁོར་བ་དང་། ཚོགས་གཙོ་གཙོས་པའི་རྒྱུན་ལས་གྲངས་ལྔ་དང་། དུས་ཡུན་ལོ་གསུམ་རེ་ཡིན་འདུག
ས་གནས་ནས་མཁས་དབང་དང་མི་སྣ་གལ་ཆེ་མཉམ་གོ་བསྡུར་གྱིས་བོད་ཡིག་ནང་དབྱངས་བཞི་དང་གསལ་བྱེད་སུམ་ཅུའི་མ་མཐུས་པ་མེད་པར་སོང་། ལོ་ལྟར་ཕྱི་ཟླ་ ༤ ཚེས་ ༣༠ ཉིན་བོད་ཀྱི་ཡིག་གཟུགས་དུས་ཆེན་ཞེས་སྲུང་བརྩི་ཞུ་བཞིན་ཡོད་པ་ལྟར། ཕྱི་ལོ་ ༢༠༢༣ ཟླ་བ་ ༤ ཚེས་ ༣༠ རེས་གཟའ་ཉི་མ་ཉིན་བོད་ཀྱི་ཡིག་གཟུགས་དུས་ཆེན་ཞེས་ཀ་སྦུག་སྐད་ཡིག་སྲུང་སྐྱོབ་ཚོགས་པས་མ་ཎི་ལྷ་ཁང་དུ་མཛད་སྒོ་སྟབས་བདེ་ཞིག་གོ་སྒྲིག་གནང་ཐོག་སྐུ་མགྲོན་གཙོ་བོར་མགྲོན་འབོད་གནང་བ་ལྟར་ཀ་སྦུག་ས་གནས་འགྲོ་འཛིན་ཀརྨ་དགེ་ལེགས་ལགས་བཅར་རྒྱུའི་གོ་སྐབས་བྱུང་བ་དང་བསྟུན་དེང་སྐབས་རྒྱ་ནག་གཞུང་ནས་བོད་ཀྱི་གནའ་བོའི་རིག་གཞུང་དང་། སྐད་ཡིག་རྩ་མེད་གཏོང་རྒྱུའི་བྱུས་ངན་སྤེལ་དང་སྤེལ་མུས་ལ་བརྟེན། རང་དབང་ལུང་པར་ཡོད་པའི་བོད་མི་ཡོད་དོ་ཅོག་ལ་བོད་ཀྱི་གནའ་བོའི་རིག་གཞུང་དང་། ཡུལ་གོམས། ལྷག་པར་བོད་ཀྱི་སྐད་ཡིག་གལ་གནད་ཆེན་པོ་དང་སྲོག་རྩ་ལྟ་བུ་མཚོན་གྱི་ཡོད་སྟབས། ཚང་མས་དམིགས་བསལ་ཐུགས་འགན་བཞེས་དགོས་པ་མ་ཟད། དམིགས་བསལ་དོ་སྣང་དང་རང་ཁྱིམ་དུ་ཕ་མའི་ངོས་ནས་བོད་སྐད་རྒྱག་དགོས་པ་གཙོ་འདོན་གནང་དགོས་པའི་འབོད་སྐུལ་ཞུས་རྗེས་སྐུ་མགྲོན་རྣམས་ནས་ཀྱང་རིམ་བཞིན་བོད་ཀྱི་སྐད་ཡིག་ནི་བོད་མིའི་སྲོག་རྩ་ལྟ་བུ་གལ་གནད་ཆེ་སྐོར་གྱི་གསུང་བཤད་གནང་ཡོད།
སྐབས་དེར་ས་གནས་འཐུས་ཚོགས་དང་། ས་གནས་རང་བདེན་ཚོགས་ཆུང་། དགོན་སྡེ་ཁག་གི་ལས་སྣེ། ཆོལ་གསུམ། ས་གནས་གཞོན་ནུ་དང་བུད་མེད་ཚོགས་གཙོ། ལྷ་མོ་དང་གངས་ལྗོངས་ཟློས་གར་ཚོགས་པ། སློབ་ཕྲུག ཕ་མ་བཅས་མཉམ་ཞུགས་གནང་ཡོད། མཐར་སློབ་ཕྲུག་རྣམས་ལ་བྱ་དགའ་དང་ཕྱག་འཁྱེརགནང་ཡོད་པ་བཅས། །
