༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༢༢ རེས་གཟའ་ཟླ་བ་ཉིན་རྡ་ས་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ་༸རྒྱལ་བའི་གཟིགས་སྣང་དང་ཉམས་རྟོགས་གཙོ་བོར་འཁོད་པའི་དཔེ་དེབ་གཉིས་དབུ་འབྱེད་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་མཛད་སྒོ་ཞིག་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཞོན་བཀྲས་ཁང་སྒྲོལ་མ་ཚེ་རིང་མཆོག དཔལ་ལྡན་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ། བོད་མི་མང་སྤྱི་འཐུས་ཁག་གཅིག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྩོམ་པ་པོ། གསར་འགོད་པ་སོགས་ཚང་འཛོམས་ཐོག་ཉམས་ཞིབ་རྩོམ་པ་པོ་ཤེས་རབ་དར་རྒྱས་ལགས་ཀྱིས་རྩོམ་སྒྲིག་གནང་བའི་༸རྒྱལ་མཆོག་བཅུ་བཞི་པ་ཆེན་པོའི་ཐུགས་ཀྱི་ཡོན་ཏན་ངོ་མཚར་བ་ལས་བརྩམ་པའི་ཞལ་གསུང་ཡིད་བཞིན་དབང་གི་རྒྱལ་པོ་ཞེས་པ་དང་། ༸རྒྱལ་མཆོག་བཅུ་བཞི་པ་ཆེན་པོའི་གསུང་སྒྲོས་ལས་མངོན་པའི་རྣམ་པར་ཐར་པ་ངོ་མཚར་ཅན་གཟིགས་སྣང་དང་ཉམས་རྟོགས་ཞེས་པའི་དཔེ་དེབ་གཉིས་དབུ་འབྱེད་གནང་སོང་།
མཛད་སྒོའི་ཐོག་མར་ཉམས་ཞིབ་རྩོམ་པ་པོ་ཤེས་རབ་དར་རྒྱས་ལགས་ཀྱིས་དཔེ་དེབ་ཀྱི་ནང་དོན་ངོ་སྤྲོད་དང་འབྲེལ་རྩོམ་སྒྲིག་དང་པར་སྐྲུན་ལས་གཞིའི་བརྒྱུད་རིམ་སོགས་འགྲེལ་བརྗོད་གནང་གྲུབ་མཚམས་མདོ་སྨད་དབུས་རྒྱུན་ཚོགས་གཙོ་ལྷ་མོ་བཀྲ་ཤིས་ལགས་ཀྱིས་མདོ་སྨད་གཞིས་བྱེས་གཉིས་ཀྱི་སྐུ་ཚབ་གནང་སྟེ་༸རྒྱལ་བའི་བཀའ་དྲིན་རྗེས་དྲན་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་གི་ཤེས་ཡོན་གྱི་སྡེ་དང་། སྤྱི་ཚོགས་ཀྱི་བསམ་བློར་ཤུགས་རྐྱེན་ཅི་གནང་དང་འབྲེལ་བའི་སྒོ་ནས་བཀའ་དྲིན་རྗེས་དྲན་གྱི་གསུང་བཤད་གནང་།
དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཞོན་བཀྲས་ཁང་སྒྲོལ་མ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བུད་མེད་ལ་དམིགས་བསལ་གཟིགས་སྐྱོང་དང་། དགེ་བཤེས་མའི་དམ་འཇོག་གསར་གཏོད་གནང་བའི་བཀའ་དྲིན་རྗེས་དྲན་གྱི་གསུང་བཤད་གནང་གྲུབ་མཚམས་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བསྟན་པ་སླར་གསོ་དང་དག་ཐེར་སོགས་ཀྱིས་བསྟན་པ་རིན་པོ་ཆེར་མཛད་རྗེས་ཅི་བཞག་དང་འབྲེལ་བའི་སྒོ་ནས་གསུང་བཤད་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་བརྒྱུད་རིས་མེད་ལ་གཟིགས་སྐྱོང་དང་། ཆོལ་གསུམ་གཅིག་ཏུ་བསྒྲིལ་བར་མཛད་པའི་བཀའ་དྲིན་རྗེས་དྲན་གྱི་གསུང་བཤད་གནང་།
དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་བདེ་སྡུག་སོགས་དང་འབྲེལ་བའི་སྒོ་ནས་༸རྒྱལ་བའི་བཀའ་དྲིན་རྗེས་དྲན་སྐོར་གསུང་བཤད་གནང་དོན། ༸རྒྱལ་མཆོག་བཅུ་བཞི་པ་ཆེན་པོའི་ཐུགས་ཀྱི་ཡོན་ཏན་ངོ་མཚར་བ་ལས་བརྩམ་པའི་ཞལ་གསུང་ཡིད་བཞིན་དབང་གི་རྒྱལ་པོ་ཞེས་པ་དང་། ༸རྒྱལ་མཆོག་བཅུ་བཞི་པ་ཆེན་པོའི་གསུང་སྒྲོས་ལས་མངོན་པའི་རྣམ་པར་ཐར་པ་ངོ་མཚར་ཅན་གཟིགས་སྣང་དང་ཉམས་རྟོགས་ཞེས་པའི་དཔེ་དེབ་གཉིས་ལས་གཟིགས་སྣང་དང་ཉམས་རྟོགས་སྐོར་ཕལ་ཆེར་མང་པོ་ཐོན་མེད། གོང་དུ་རྩོམ་པ་པོས་གསུངས་པ་ལྟར། ར་སྟོད་རིན་པོ་ཆེའི་དེབ་ནང་ཕྲན་བུ་ཡོད་པ་དང་། དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་གསུངས་པ་ཕྲན་བུ་ཡོད་པ་ལས་གཞན་དེབ་གཅིག་གི་ནང་༸རྒྱལ་བ་རིན་པོ་ཆེའི་གཟིགས་སྣང་དང་ཉམས་རྟོགས་སྐོར་རྩོམ་སྒྲིག་གནང་བ་ཕལ་ཆེར་མེད་སྟབས། དཔེ་དེབ་འདི་རྩ་ཆེན་པོ་ཆགས་ཡོད་ཅེས་ཞུ་འདོད་བྱུང་། ལྷག་པར་ཤེས་རབ་དར་རྒྱས་ལགས་ཀྱིས་འགན་ཆེ་བཞེས་གནང་བར་བསྔགས་བརྗོད་ཞུ་རྒྱུ་ཡིན།
དེ་སྔ་གྱ་སྟོན་སྐབས་༸རྒྱལ་བ་རིམ་བྱོན་གྱི་མཛད་རྣམ་ཆ་ཚང་རྩོམ་སྒྲིག་གནང་ཡོད། དེ་རྗེས་བཀའ་ཟུར་རྒྱལ་ལོ་དོན་གྲུབ་མཆོག་དང་འབྲེལ་བའི་ལོ་རྒྱུས་དང་བྱུང་རབས་སྐོར་དཔེ་དེབ་བརྩམས་གནང་ཡོད་པར་བརྟེན་དུས་ཚོད་མེད་ན་མ་གཏོགས་དུས་ཚོད་ཡོད་ཚད་བོད་སྤྱི་པའི་རྩ་དོན་ཐོག་བཏང་གནང་སྟེ་སོ་སོར་ནུས་པ་ཡོད་པ་དེ་དག་གདོན་རྒྱུའི་འབད་བརྩོན་ཞུ་བཞིན་ཡོད་སྟབས། ཤེས་རབ་དར་རྒྱས་ལགས་ཀྱི་འབད་བརྩོན་གནང་སྟེ་མང་ཚོགས་ལ་དེ་ལྟ་བུ་མཇལ་རྒྱུའི་གོ་སྐབས་བཟོ་གནང་ཐུབ་པར་བཀའ་དྲིན་ཆེ་ཞེས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་།
མཐར་མདོ་སྨད་དབུས་རྒྱུན་དྲུང་ཆེ་བསམ་གཏན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
