༄༅། །འདི་གར་བོད་མི་མང་སྤྱི་འཐུས་ཀུན་དགའ་བསོད་སྟོབས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༥ ཚེས་ ༡༢ ནས་ ༡༥ བར་༸བྱམས་མགོན་རྡོ་རྗེ་འཆང་ཀྭན་ཏིང་ཏཱའི་སི་ཏུ་པདྨ་དོན་ཡོད་གྲུབ་པ་མཆོག་གང་ཉིད་སྐུ་ཁམས་བདེ་མིན་ལ་མ་ལྟོས་པར། ཉེ་ལམ་བསྟན་པའི་གསལ་བྱེད་དམ་པ་སྐྱབས་རྗེ་ཡོངས་འཛིན་མཁན་ཆེན་ཁྲ་འགུ་རིན་པོ་ཆེ་མཆོག་སྐུ་ཁམས་ཆེས་མ་བདེ་བ་ནས་བཟུང་ཤིན་ཏུ་ཐུགས་ཚབས་ཆེན་པོས་ཐུགས་བརྟག་དང་ཁ་པར་བརྒྱུད་སྐུ་ཚེའི་ཚེ་སྒྲུབ་སོགས་གནང་ཞིང་ཉེ་གནས་རྣམས་ལ་བཀའ་སློབ་ལམ་སྟོན་ཡང་ཡང་མཛད།

དེ་ཡང་ཕྱི་ལོ་ ༢༠༢༣ ཟླ་ ༥ ཚེས་ ༡༢ ཉིན་གློ་བུར་དུ་སྐུ་འཁོར་ཧྲག་བསྡུས་མཁའ་ལམ་བརྒྱུད་སྐུ་དངོས་བལ་ཡུལ་དུ་སྐྱབས་རྗེ་ཁྲ་འགུ་རིན་པོ་ཆེ་མཆོག་གི་སར་ཆེད་ཕེབས་མཛད། བལ་ཡུལ་རྒྱལ་སྤྱིའི་གནམ་ཐང་དུ་མཆོག་སྤྲུལ་བསྟན་དགའ་རིན་པོ་ཆེ་མཆོག་གིས་དབུས་བཀའ་དགོན་ཁག་གི་སྤྲུལ་སྐུ་དང་མཁན་པོ་རྣམ་པ། འབྲེལ་ཡོད་དགོན་ཁག་ཡོངས་ཀྱི་ལས་འཛིན། དད་ལྡན་སེར་སྐྱ་མང་ཚོགས་བརྒྱ་ཕྲག་མང་པོས་དགའ་དད་སྤྲོ་གསུམ་གྱི་ངང་ནས་ཕེབས་བསུ་གཟབ་རྒྱས་དང་འབྲེལ་སྐྱབས་རྗེ་ཁྲ་འགུ་རིན་པོ་ཆེ་བཞུགས་སའི་སྨན་ཁང་ཉེ་འགྲམ་ (The Soaltee Hotel)  གསོལ་མགྲོན་ཁང་དུ་ཕེབས་བཞུགས་མཛད།ཉིན་རྒྱབ་ཆུ་ཚོད་ ༤ སྟེང་ (Nepal Mediciti Hospital)  ཞེས་པའི་སྨན་ཁང་དུ་སྐྱབས་རྗེ་ཁྲ་འགུ་རིན་པོ་ཆེའི་སར་ཕེབས་ཏེ་ཚེ་དབང་དང་ཚེ་འགུགས་བཀའ་དྲིན་བསྐྱངས་ཐོག་རྒྱལ་བསྟན་སྤྱི་དང་བྱེ་བྲག་གི་དོན་དུ་སྐུ་ཚེ་ཡུན་བརྟན་དགོས་པའི་གསོལ་འདེབས་དང་ཐུགས་སྨོན་ཡུན་རིང་མཛད་ཅིང་སྐུ་ཚེ་ཡུན་བརྟན་སླད་རྟེན་གསུམ་འདེགས་འབུལ་གནང་རྗེས་སྐུའི་སྨན་པ་གཙོ་བོ་དང་ལྷན་དུ་སྙུང་གཞིའི་སྐོར་ལ་བཀའ་མོལ་ཞིབ་ཕྲ་གནང་། དགོང་དྲོ་ཆུ་ཚོད་ ༨ ཐོག་གསོལ་མགྲོན་ཁང་དུ་གཞིས་བྱེས་གཙོས་འཛམ་གླིང་ནང་ཁྲ་འགུ་དགོན་མ་ལག་དང་བཅས་པའི་མཆོག་སྤྲུལ་མཁན་སློབ་འགན་འཛིན་རྣམས་ལའང་སྐྱབས་རྗེ་ཁྲ་འགུ་རིན་པོ་ཆེ་མཆོག་གི་དགོངས་བཞེད་བཞིན་བཤད་སྒྲུབ་ལས་གསུམ་གྱི་སྒོ་ནས་བསྟན་པ་འཛིན་སྐྱོང་སྤེལ་གསུམ་བསྒྲུབ་དགོས་པ་སོགས་ཕའི་བུ་ལ་གདམས་པ་ལྟ་བུའི་བཀའ་སློབ་གནང་།ཕྱི་ཚེས་ ༡༣ སྔ་དྲོར་བཀའ་དགོན་ཡོངས་ཀྱིས་ཕེབས་བསུ་སེར་སྦྲེང་གཟབ་རྒྱས་དང་དད་ལྡན་སྟོང་ཕྲག་མང་པོས་དགའ་དད་སྤྲོ་གསུམ་གྱི་ངང་ལག་ཏུ་མེ་ཏོག་དང་མཇལ་དར་ཐོགས་བཞིན། མཆོད་རྟེན་ཆེན་མོའ་ིའགན་འཛིན་ལྷན་ཚོགས་ནས་ཀྱང་ཕེབས་བསུ་གཟབ་རྒྱས་དང་བཅས་༸བྱམས་མགོན་རྡོ་རྗེ་འཆང་ཆེན་པོ་མཆོག་བལ་ཡུལ་མཆོད་རྟེན་ཆེན་མོ་བྱ་རུང་ཁ་ཤོར་གྱི་མདུན་ངོས་སུ་གདན་ཞུས་ཐོག་མཆོད་རྟེན་ཆེན་མོའི་མདུན་སྣང་གསལ་ཞལ་ཕྱེ་དང་ཐུགས་སྨོན་ཟབ་མོར་རྒྱལ་བསྟན་དར་ཞིང་འགྲོ་ཀུན་བདེ་བ། འཛམ་གླིང་ཁོར་ཡུག་དང་ནད་མུག་འཁྲུགས་རྩོད་སོགས་རྨང་ནས་ཞི་བའི་ཐུགས་སྨོན་གནད་ལ་སྨིན་པར་མཛད་རྗེས་ཕེབས་བསུ་སེར་སྦྲེང་གཟབ་རྒྱས་དང་བཅས་དཔལ་དིལ་ཡག་དགོན་གྱི་འདུ་ཁང་ཆེན་མོར་མི་འཇིགས་གདོང་ལྔས་བཏེགས་པའི་ཁྲི་འཕང་མཐོན་པོར་ཞབས་པད་འཁོད་བསྟུན་བཀའ་དགོན་ཡོངས་དང་ཚོགས་སྐྱིད་ཁག་སོ་སོས་མཎྜལ་སྐུ་གསུང་ཐུགས་རྟེན་འདེགས་འབུལ་དང་གསོལ་ཇ་བཞེས་འབྲས་བཅས་པའི་རྟེན་འབྲེལ་དགའ་སྟོན་བསྟར། ༧བྱམས་མགོན་རྡོ་རྗེ་འཆང་མཆོག་སྐུ་ངལ་འོ་རྒྱལ་ལ་ཇི་མི་སྙམ་པར་ཐུགས་བརྩེ་གཟིགས་པ་ཆེན་པོས་སེར་སྐྱ་མི་མང་སྟོང་ཚོ་འགའ་ལ་བླང་དོར་བཀའ་ཆོས་ཟབ་རྒྱས་དང་ཕྱག་དབང་བཀའ་དྲིན་གནང་།ཉིན་རྒྱབ་བཙུན་དགོན་ཐེག་མཆོག་གླིང་དུ་ཆེད་ཕེབས་ཀྱིས་བསྟན་པའི་སྣང་བྱེད་ཆེན་པོ་མཁན་ཆེན་ཚུལ་ཁྲིམས་རྒྱ་མཚོ་རིན་པོ་ཆེ་སྐུ་ན་བགྲེས་ཤིང་སྐུ་ཁམས་ཡུན་རིང་དུ་ལྕི་བ་ལ་ཚེ་སྒྲུབ་དང་ཚེ་འགུགས་བཀའ་དྲིན་གནང་། བསྟན་འགྲོའ་ིདོན་དུ་སྐུ་ཚེ་ཡུན་དུ་བརྟན་པའི་ཐུགས་སྨོན་དང་ཞུ་བསྐུལ་གསོལ་འདེབས་ཀྱང་མཛད། དཔལ་ཀརྨའི་ཆོས་འཁོར་ཐེག་ཆེན་ལེགས་བཤད་གླིང་དུ་འབྲོང་གསར་གྲགས་རྣམ་ཚང་བླ་མ་ཀརྨ་འཕྲིན་ལས་རིན་པོ་ཆེ་དགུང་ལོ་མཐོ་བའི་སར་ཐུགས་བརྩེ་བ་ཆེན་པོས་ཆེད་ཕེབས་ཀྱིས་ཚེ་སྒྲུབ་དང་ཐུགས་སྨོན་མཚམས་སྦྱོར་རྒྱ་ཆེར་མཛད་པ་དང་སྦྲགས་ཕན་ཚུན་གསུང་གླེང་ཟབ་རྒྱས་གནང་།ཕྱི་ཚེས་ ༡༤ སྔ་དྲོར་རེ་བསྐུལ་ལྟར་སྐྱབས་རྗེ་ཆོས་ཀྱི་ཉི་མ་རིན་པོ་ཆེ་དང་། སྐྱབས་རྗེ་སྤྲུལ་སྐུ་ཨོ་རྒྱན་ཡང་སྲིད་རིན་པོ་ཆེ། སྐྱབས་རྗེ་འཕགས་མཆོག་རིན་པོ་གཙོས་ཀར་རྙིང་བཤད་སྒྲུབ་གླིང་གི་མཁན་སློབ་དབུ་ཆོས་ཕྱག་གཉེར་བཅས་ལས་སྣེ་རྣམས་ལ་དམིགས་བསལ་མཇལ་ཁ་དང་བཀའ་མོལ་ཐུགས་ལྷོད་མཛད། དེ་ནས་ཀརྨ་བསམ་གཏན་གླིང་གི་མཆོག་སྤྲུལ་དང་མཁན་སློབ་གཙོས་པའི་འདུས་སྤྱི་ཡོངས་དང་། བླ་མ་བསྟན་པའི་རྒྱལ་མཚན་ཞིང་གཤེགས་ཀྱི་དགོན་པའི་མཁན་པོ་དང་ལས་སྣེ་བཅས་ལ་སོ་སོར་བླང་དོར་བཀའ་སློབ་དང་། བལ་ཡུལ་དུ་བཀའ་བརྒྱུད་གྲྭ་ཟུར་ཚོགས་པ་སོགས་མང་ཚོགས་སྲི་ཞུ་བ་ཚོགས་སྡེ་ཁག་ལ་བླང་དོར་བཀའ་སློབ་དང་མཇལ་ཕྱག་གནང་།
ཉིན་རྒྱབ་ཆུ་ཚོད་ ༤ སྟེང་སླར་ཡང་སྨན་ཁང་དུ་སྐྱབས་རྗེ་ཁྲ་འགུ་རིན་པོ་ཆེའི་སར་ཆེད་ཕེབས་ཀྱིས་ཐུགས་ལྷོད་ངང་ལྷན་རྒྱས་ཏེ་བསམ་བརྗོད་ལས་འདས་པའི་རྟོགས་པ་དོན་བརྒྱུད་ཐུགས་ཡིད་གཅིག་འདྲེས་སུ་བཞུགས་གནང་མཛད་ཅིང་བདག་སོགས་བལྟོས་བཅས་ཡོངས་ནི་བློ་ཡིད་ཚིམས་པར་གྱུར་ནའང་སྐུ་ཁམས་ཀྱི་གནས་སྟངས་ནི་ཤིན་ཏུ་བརྗོད་དཀའ་བར་གནས། དེ་རྗེས་ཐད་ཀར་བལ་ཡུལ་ཀོ་པན་དགོན་དུ་ཆེད་ཕེབས་ཀྱིས་ཉེ་ཆར་ཞི་བར་གཤེགས་པ་སྐྱབས་རྗེ་བཟོད་པ་རིན་པོ་ཆེའི་སྐུ་གདུང་མདུན་མཇལ་དར་དང་མཆོད་སྤྲིན་མེ་ཏོག་སོགས་ཕུལ་རྗེས་༸བྱམས་མགོན་རྡོ་རྗེ་འཆང་ཆེན་པོ་མཆོག་གིས་སྐྱབས་རྗེ་བཟོད་པ་རིན་པོ་ཆེ་དང་ཐུན་མིན་འབྲེལ་བའི་ཐོག་སྐུ་དངོས་དང་ལྷན་རྒྱས་པ་ལྟ་བུའི་ཐུན་མིན་ཟབ་རྒྱས་གསུང་གི་དབུགས་དབྱུང་ཐོག་རྒྱལ་བ་བྱམས་པའི་སྨོན་ལམ་གྱི་མཐར་བརྒྱན་པའི་ཐུགས་སྨོན་མཚམས་སྦྱོར་མཛད། ཀོ་པན་དགོན་མཁན་བླ་འདུས་སྡེ་ནས་རྟེན་གསུམ་འདེགས་འབུལ་ཞུས།

ཕྱི་ཚེས་ ༡༥ སྟེ་ཉིན་བཞི་བའི་སྔ་དྲོར་མཆོག་སྤྲུལ་དང་མཁན་པོ་བཅས་དམིགས་བསལ་བསྟན་དོན་དུ་བཀའ་སློབ་ལམ་སྟོན་ཞུ་མཁན་ཁག་ལ་མཇལ་ཁ་དང་ལམ་སྟོན་ཞིབ་རྒྱས་མཛད་རྗེས་ཉིན་རྒྱབ་བཀའ་བརྒྱུད་དགོན་ཁག་གི་མཆོག་སྤྲུལ་མཁན་སློབ་ལས་སྣེ་དད་ལྡན་སེར་སྐྱ་བརྒྱ་ཕྲག་མང་པོ་ཕེབས་བསྐྱེལ་དང་བལ་ཡུལ་གཞུང་གི་གནད་ཡོད་མི་སྣ་དང་འབྲུག་གཞུང་གི་གནད་ཡོད་མི་སྣ་བཅས་པས་དམིགས་བསལ་གོ་སྒྲིག་གིས་ཕེབས་བསྐྱེལ་དང་བཅས་མཁའ་ལམ་བརྒྱུད་བལ་ཡུལ་ནས་འཕགས་ཡུལ་རྒྱལ་ས་ལྡི་ལིར་རྒྱལ་སྤྱིའི་གནམ་ཐང་དུ་ཞབས་གསོར་བདེ་བར་འཁོད་པ་དང་གཞུང་འབྲེལ་མི་སྣས་ཕེབས་བསུ་སྔ་རྒྱུན་ལྟར་གནང་བ་བཅས།།