༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༣༠ ཉིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ཊིན་ཨིས་མིཊ་ (Dean Smith) མཆོག་དང་ལྷན་གྲོས་ཚོགས་ཀྱི་ལས་ཁུངས་སུ་མཇལ་འཕྲད་ཞུས་གནང་སྟེ་ལས་གནས་གསར་པར་དགའ་བསུ་ཞུས་གནང་ཡོད་པ་རེད།

དེ་ཡང་དེ་སྔའི་ཟུང་སྦྲེལ་ཚོགས་གཙོ་སྐུ་ཞབས་ཝེ་རིན་ཨིན་ཅིན་ (Warren Entsch) མཆོག་གིས་ལས་གནས་ནས་དགོངས་ཞུ་གནང་རྗེས་གུ་ཡངས་ཚོགས་པའི་གྲོས་ཚོགས་འཐུས་མི་ཊིན་ཨིས་མིཊ་ (Dean Smith) མཆོག་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོར་བསྐོ་བཞག་གནང་ཡོད།

སྤྱིར་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པར་གཙོ་སྐྱོང་བ་ཚོགས་གཙོ་གསུམ་ཡོད་ཅིང་། ཁོང་རྣམས་ནི་ངལ་རྩོལ་ཚོགས་པའི་གྲོས་ཚོགས་འཐུས་མི་སུ་སེན་ཀྲེམ་པེལ་ཊོན་(Susan Templeman) མཆོག་དང་། གུ་ཡངས་ཚོགས་པའི་གྲོས་ཚོགས་འཐུས་མི་ཊིན་ཨིས་མིཊ་ (Dean Smith) མཆོག ཨོསྟྲེ་ལི་ཡཱའི་ལྗང་ཁུ་ཚོགས་པའི་གྲོས་ཚོགས་འཐུས་མི་ཇེ་ནིཊ་ར་ཧི་སི་ (Janet Rice) མཆོག་བཅས་ཡིན།

མཇལ་མོལ་སྐབས་སྐུ་ཚབ་དོན་གཅོད་ཀརྨ་སེངྒེ་ལགས་དང་ལྷན་དུ་ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་འབུམ་རམས་པ་ཛོ་བྷེ་ཕོཊ་ (Dr Zoe Bedford) ལགས་དང་། དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ལྷན་བཅར་ཞུས་ཡོད་པ་བཅས།།