༄༅། །ཨོསྟྲེ་ལི་ཡཱ་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་དགུ་པ་ཕྱི་ལོ་ ༢༠༢༣ ཟླ་བ་ ༠༤ ཚེས་ ༠༩ ཉིན་མེལ་བྷོར་ནེ་ (Melbourne) རུ་ཚོགས་ཡོད།

དེ་ཡང་ཚོགས་ཆེན་གྱི་སྐུ་མགྲོན་གཙོ་བོར་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་དང་། དམིགས་བསལ་སྐུ་མགྲོན་དུ་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་གདན་ཞུས་ལྟར་ལྷན་ཞུགས་གནང་ཡོད་ཅིང་། ཚོགས་ཆེན་ཐོག་ས་གནས་སོ་སོའི་སྐུ་ཚབ་རྣམས་ནས་གྲོས་གཞི་གཙོ་བོ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་ཕྱོགས་དང་། བོད་དོན་ཞུ་གཏུག་ཚགས་ཚུད་གཏོང་ཐབས། ཨོསྟྲེ་ལི་ཡཱའི་བོད་རིགས་སྤྱི་མཐུན་ཚོགས་པ་ཁག་སྲ་བརྟན་གཏོང་ཕྱོགས་ཇི་དགེའི་ཐོག་གྲོས་བསྡུར་སྦྱངས་བཤད་གནང་ཡོད། ཚོགས་ཆེན་ཐོག་ས་གནས་ཀེན་བྷེ་ར་དང་། སིཊ་ནི། ནིའུ་ཀ་སལ། ནའུ་ར། མེལ་བྷོར་ནེ། བྲྀས་བ་ནི། ཨ་ཊི་ལེ་ཊི་བཅས་ནས་སྐུ་ཚབ་དང་ཚོགས་བཅར་བ་ ༡༢༠ ཙམ་མཉམ་ཞུགས་གནང་ཡོད་པ་རེད། གཞན་ཡང་སྐུ་ཚབ་དོན་གཅོད་ཀརྨ་སེངྒེ་ལགས་དང་། ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་གཉིས་བོད་ཀྱི་གཞོན་ནུ་ཆིག་སྒྲིལ་མཐུན་ཚོགས་ཐེངས་བཅུ་གཅིག་པའི་མཇུག་སྡོམ་མཛད་སྒོར་ཆེད་བཅར་གནང་ཡོད།

སྤྱིར་བོད་ཀྱི་གཞོན་ནུ་ཆིག་སྒྲིལ་མཐུན་ཚོགས་ཐེངས་ ༡༡ དེ་བཞིན་ཕྱི་ལོ་ ༢༠༢༣ ཟླ་བ་ ༠༤ ཚེས་ ༠༧ ནས་ ༡༠ བར་ཝིག་ཀྲོ་རི་ཡ་བོད་རིགས་སྤྱི་མཐུན་ཚོགས་པས་གོ་སྒྲིག་གནང་ཡོད་ཅིང་། རྩེད་འགྲན་ནང་མེལ་བྷོར་ནི་དང་། སིཊ་ནི། ནིའུ་ཀ་སལ་བཅས་ནས་རྐང་རྩེད་པོ་ལོའི་རུ་ཁག་དྲུག་དང་། བུའི་སིལ་སྤོལ་རུ་ཁག་བརྒྱད། བུད་མེད་སིལ་སྤོལ་རུ་ཁག་བཞི་བཅས་མཉམ་ཞུགས་གནང་ཡོད་པ་བཅས།།