༄༅། །ཕྱི་ལོ་ ༢༠༢༣ ཟླ་བ་ ༤ ཚེས་ ༨ ཉིན་སྦེལ་ཇམ་ས་གནས་དབུས་གཙང་ཆོལ་ཁ་ནས་མགྲོན་འབོད་གནང་བ་ལྟར་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་སྦེལ་ཇམ་ས་གནས་དབུས་གཙང་ཆོལ་ཁ་དབུ་བརྙེས་ནས་ལོ་ངོ་དྲུག་འཁོར་བའི་དུས་དྲན་སྲུང་བརྩིའི་མཛད་སྒོར་མཉམ་ཞུགས་གནང་ཡོད།
དེ་ཡང་དུས་དྲན་སྲུང་བརྩིའི་མཛད་སྒོར་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་སྦེལ་ཇམ་ས་གནས་དབུས་གཙང་ཆོལ་ཁའི་ལས་འཁྱུར་རྒྱུན་ལས་རྣམས་ལ་ཐུགས་རྗེ་ཆེ་དང་རྒྱུན་ལས་གསར་པ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུས་གནང་ཡོད།
གཞན་ཡང་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༧སྐུའི་འཕྲོད་བཞེས་ཧ་ཅང་ཡག་པོ་ཡོད་པ་དང་། བོད་ནང་གི་ཛ་དྲག་གནས་སྟངས། དཔྱ་དངུལ་འབུལ་འབབ་ལ་འགྱུར་བ་ཕྱིན་ཡོད་པ་སོགས་ཀྱི་སྐོར་ངོ་སྤྲོད་གནང་བ་དང་འབྲེལ་བོད་མི་རྣམས་རྡོག་རྩ་གཅིག་སྒྲིལ་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་ལྟར་བོད་ཀྱི་རྩ་དོན་སྒྲུབ་དགོས་པའི་རེ་སྐུལ་ཞུས་གནང་ཡོད།
དུས་དྲན་སྲུང་བརྩིའི་མཛད་སྒོར་ཚོགས་བཅར་བ་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། བོད་ཀྱི་བསྟན་སྲིད་དོན་དུ་རང་སྲོག་བློས་བཏང་གནང་མཁན་བོད་ཀྱི་རྒྱལ་གཅེས་པ་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་རིང་ཞུས་གནང་ཡོད།
སྦེལ་ཇམ་ས་གནས་དབུས་གཙང་ཆོལ་ཁའི་ཚོགས་གཙོ་འཛོམས་སྐྱིད་ལགས་ཀྱིས་ཚོགས་པའི་གཞི་རྩའི་དམིགས་ཡུལ་དང་འདས་པའི་ལོ་ངོ་གསུམ་རིང་གི་ལས་བསྡོམས་སྙན་སྒྲོན་གནང་ཡོད། སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་ལྷན་དུ་རྩིས་པ་བསྟན་འཛིན་ནོར་ལྡན་ལགས་ལྷན་བཅར་ཞུས་གནང་ཡོད་པ་བཅས།།
