༄༅། །ཕྱི་ལོ་ ༢༠༢༣ ཟླ་ ༤ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་གི་མཇལ་འཕྲད་ཁང་དུ་ཡུལ་གྲུ་ཁག་བཅུ་གཉིས་ནས་ཕེབས་པའི་ན་གཞོན་གཙོ་འཛིན་གྱི་སྒྲིག་འཛུགས་ (Young Presidents’ Organization) ཀྱི་ཚོགས་མི་ ༩༥ ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་དད་ལྡན་སེར་སྐྱ་བརྒྱ་ཕྲག་ལ་མཇལ་ཁ་སྩལ་གྲུབ་མཚམས་ཆུ་ཚོད་དགུ་པ་ཙམ་ལ་འཛམ་གླིང་གང་སར་གནས་པའི་ན་གཞོན་གཙོ་འཛིན་གྱི་སྒྲིག་འཛུགས་ (YPO) ཞེས་པའི་སྦེང་ལོར་སྡེ་ཚན་དང་། ལྡི་ལི་སྡེ་ཚན། ཧྥི་ལི་ཕིན་སྡེ་ཚན། སིངྒ་པོར་སྡེ་ཚན། ལྷོ་ཤར་ཨེ་ཤ་ཡའི་སྡེ་ཚན་སོགས་ཀྱི་ཚོགས་མི་རྒྱལ་ཁབ་ ༡༢ ནས་ཕེབས་པའི་མི་གྲངས་ ༩༥ ལ་བཀའ་སློབ་དང་དྲི་བར་བཀའ་ལན་སྩལ་ཡོད་པ་དང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོའི་འཚམས་འདྲི་དང་འབྲེལ། འཚེ་མེད་ཞི་བ་དང་བྱམས་བརྩེའི་ཉམས་ལེན་ཧ་ཅང་གལ་ཆེན་པོ་ཡིན་པ་དང་། རྒྱ་གར་དུ་ལོ་ངོ་སྟོང་ཕྲག་སྔོན་ནས་འཚེ་མེད་ཞི་བ་དང་བྱམས་བརྩེའི་ཉམས་ལེན་དར་སྲོལ་བྱུང་ཡོད་པའི་སྐོར་དང་། གཞན་ཡང་ནང་སེམས་ཀྱི་ཞི་བདེ་དང་བདེ་སྐྱིད་ནི་དངུལ་དང་སྟོབས་ཤུགས་ཀྱིས་ཉོ་ཐབས་མེད་པར་དེ་ནི་བྱམས་བརྩེའི་ཉམས་ལེན་དང་འཚེ་མེད་ཞི་བའི་ཐབས་ལམ་ལ་བརྟེན་ནས་ཐོབ་དགོས་པའི་སྐོར་བཀའ་སློབ་ཟབ་མོ་སྩལ།
གཞན་ཡང་། མགོན་པོ་གང་ཉིད་མཆོག་བོད་བྱང་ཤར་དུ་འཁྲུངས་ཤིང་། སྐུ་ན་གཞོན་པའི་དུས་སུ་འཁྲུངས་ཡུལ་དུ་རྒྱ་ཁ་ཆེའི་ཕྲུ་གུ་མཐོང་རྒྱུ་ཡོད་པ་དང་། ཁོང་ཚོའི་མཉམ་དུ་རྩེད་མོར་རོལ་སྐབས་མི་རིགས་དང་ཆོས་ལུགས་ཀྱི་དབྱེ་བ་མེད་པའི་སྐོར་དང་། སྐབས་དེར་ཟི་ལིང་ཁུལ་དུ་དབང་སྒྱུར་མཁན་མཱ་པུའུ་ཧྥང་གིས་སྐུ་ན་གཞོན་པའི་ལྷ་མོ་དོན་གྲུབ་མཆོག་ཕྲུ་གུ་གཞན་དང་མི་འདྲ་བར་སྤྱན་དང་རྣམ་རིག་ཁྱད་པར་བ་ཞིག་ཡོད་པ་མཐོང་ནས་དེ་སྐབས་ཀྱི་བོད་གཞུང་གིས་ཏཱ་ལའི་བླ་མའི་ཡང་སྲིད་དུ་རྩད་མ་ཆོད་གོང་ནས་བྱིས་པ་ལྷ་མོ་དོན་གྲུབ་དེ་ཉིད་རྒྱལ་བ་སྐུ་གོང་མའི་ཡང་སྲིད་ཡིན་པར་ཚོད་དཔག་བྱུང་ཡོད་པའི་སྐོར་དྲན་གསོ་གནང་བ་དང་། ཡང་སྲིད་ངོས་འཛིན་གྱིས་བོད་ཀྱི་རྒྱལ་ས་ལྷ་སར་ཆིབས་བསྒྱུར་བསྐྱངས་ཤིང་། གསན་བསམ་སློབ་གཉེར་གནང་བ་ནས་བཙན་བྱོལ་དུ་ཕེབས་པའི་ལོ་རྒྱུས་སོགས་ལ་དྲན་གསོ་གནང་བ་དང་། མཚམས་འདིར་ན་གཞོན་གཙོ་འཛིན་གྱི་སྒྲིག་འཛུགས་ཀྱི་ཚོགས་མི་རྣམས་༸གོང་ས་མཆོག་ལ་མཇལ་འཕྲད་གོ་སྒྲིག་ཚོགས་ཆུང་གིས་གོ་སྒྲིག་ཞུ་མཁན་ངོ་སྤྲོད་ཞུས།
མཐར་དྲི་བ་དྲིས་ལན་སྐབས་སུ་མགོན་པོ་གང་ཉིད་མཆོག་གིས་བྱིས་པ་ལ་ངའི་རྒྱལ་ཁབ་དང་ངའི་ཆོས་ལུགས་ཞེས་པའི་དབྱེ་འབྱེད་མེད་ཀྱང་། དེང་རབས་ཤེས་ཡོན་སྦྱང་པའི་གོ་རིམ་ནང་དུ་ངའི་རྒྱལ་ཁབ་དང་ངའི་ཆོས་ལུགས་སོགས་ཀྱི་དབྱེ་འབྱེད་མང་པོ་ཡོང་གི་ཡོད་སྐོར་དང་། འགྲོ་བ་མི་དུང་ཕྱུར་བདུན་ཅུ་ནས་བརྒྱད་ཅུ་བར་ཚང་མར་གཅིག་མཚུངས་ཀྱི་འདུ་ཤེས་འཛིན་དགོས་པ། དེ་བཞིན་མི་ཚེ་བདེ་སྐྱིད་ཀྱི་ངང་ཇི་ལྟར་སྡོད་པ་ངར་འཛིན་ཉུང་དུ་གཏོང་དགོས་པའི་སྐོར་དང་། མི་ཚེའི་སྙིང་པོ་ཅི་ཞིག་ཡིན་པ་སོགས་ལ་བཀའ་ལན་སྩལ་བ་དང་། སློབ་སྦྱོང་གི་ཤེས་ཚད་མཐོ་པོ་ཡོད་ཀྱང་གཞན་ཕན་གྱི་སེམས་བཟང་མེད་ཚེ་སེམས་སྨྱོན་པར་འགྱུར་ཉེན་དང་། རང་ཤས་ཆེས་དྲགས་ནས་རང་སྲོག་གཅོད་པའང་འབྱུང་སྲིད་པར་བརྟེན། སློབ་སྦྱོང་གི་ཤེས་ཚད་ལེགས་པོ་དང་མཉམ་དུ་གཞན་ཕན་གྱི་སེམས་བཟང་པོ་ཟུང་འབྲེལ་བྱེད་ཐུབ་རྒྱུ་གལ་ཆེ་ཚུལ་ནན་ཏན་བཀའ་ལན་སྩལ་བ་དང་། མགོན་པོ་གང་ཉིད་མཆོག་གིས་སྐུ་ཚེ་གང་བོར་གཞན་ཕན་ཆེད་དགོངས་བཞེས་གནང་བ་ཡིན་པས་དེ་ལ་ཚོར་བ་གང་ཞིག་ཡོད་པ་བཀའ་འདྲི་བྱས་པར། དཔལ་ནཱ་ལེནྡྲའི་རྗེས་འཇུག་དང་བྱང་ཆུབ་ཀྱི་སེམས་ཉམས་ལེན་གཙོ་བོར་གནང་གི་ཡོད་པ་དང་དེའི་ཉམས་མྱོང་གི་རྨང་གཞི་གང་འཚམ་གཏིང་ཡོད་པ་ཡིན་པས་ས་ལམ་རིམ་གྱིས་བགྲོད་དེ་མཐར་སངས་རྒྱས་ཀྱི་གོ་འཕང་ལ་ཐོབ་རྒྱུ་ཡིན་ཞེས་སོགས་བཀའ་ལན་གཟབ་རྒྱས་སྩལ་ཡོད། །
