༄༅། །སྦེལ་ཇམ་བོད་རིགས་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། རླུང་རྟ་ཚོགས་པ་བཅས་ཐུན་མོང་གིས་མར་མེ་ཁྲོམ་སྐོར་གྱི་ལམ་ནས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་སུམ་ཅུ་སོ་བཞིར་ཕེབས་པའི་འཁྲུངས་སྐར་སྲུང་བརྩི་ཞུས་ཡོད།

དེ་ཡང་སྦེལ་ཇམ་བོད་རིགས་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། རླུང་རྟ་ཚོགས་པ་བཅས་ནས་རྒྱལ་སྤྱིའི་ཚོགས་སྡེ་ཁག་གིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་སྐུ་གཟུགས་བདེ་ཐང་ཡིན་པའི་དཔང་རྟགས་སྟོན་དགོས་པའི་གནོན་ཤུགས་སྤྲོད་རོགས་ཞེས་རེ་སྐུལ་ཞུས་གནང་ཡོད། སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། དྲུང་ཆེ་འཕྲིན་ལས་དབང་འདུས་ལགས། རྩིས་པ་བསྟན་འཛིན་ནོར་ལྡན་ལགས་བཅས་མར་མེ་ཁྲོམ་སྐོར་གྱི་ལས་རིམ་དུ་མཉམ་ཞུགས་གནང་ཡོད།སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས། ཚོགས་བཅར་བ་ཡོངས་ལ་ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་མི་ཀུ་ལ་སི་པེག་ས་ (Mikulas Peksa) ལགས་ཀྱིས་སྣེ་ཁྲིད་པའི་གྲོས་ཚོགས་འཐུས་མི་བཅུ་གཅིག་གིས་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་དང་བདེ་སྲུང་ལས་ཁུངས་ཀྱི་འགན་འཛིན་གཞོན་པ་སྐུ་ཞབས་ (Josep Borrell) ལགས་སུ་ཞུ་ཡིག་ཕུལ་ཏེ་ཡུ་རུབ་མཐུན་ཚོགས་དང་རྒྱ་ནག་བར་ཐབས་བྱུས་གྲོས་མོལ་སྐབས་རྒྱ་ནག་གཞུང་གི་ངོ་ཚབ་དང་ལྷན་དུ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་གནད་དོན་སྐོར་གླེང་སློང་གནང་དགོས་པའི་འབོད་སྐུལ་གནང་ཡོད་པའི་སྐོར་སྙན་སྒྲོན་ཞུས་ཡོད། དེ་བཞིན་༸ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་ ༣༤ ལ་ཕེབས་པའི་འཁྲུངས་སྐར་ཉིན་སི་པན་གྱི་གྲོས་ཚོགས་གོང་མའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ ༣༠ ནས་རྒྱ་ནག་གཞུང་ལ་པཎ་ཆེན་རིན་པོ་ཆེ་གང་དུ་ཡོད་མེད་དང་གནས་སྟངས་ཇི་ཡོད་སོགས་ཀྱི་སྐོར་དཔང་རྟགས་སྟོན་དགོས་པའི་རེ་སྐུལ་གནང་བའི་སྐོར་སྙན་སྒྲོན་ཞུས་གནང་ཡོད་པ་བཅས།།