༄༅། །༸ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་ ༣༤ ཕེབས་པའི་འཁྲུངས་སྐར་ཉིན་སི་པན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་རྒྱ་ནག་གཞུང་ལ་པཎ་ཆེན་རིན་པོ་ཆེ་གང་དུ་ཡོད་མེད་དང་གནས་སྟངས་ཇི་ཡོད་སོགས་ཀྱི་སྐོར་དཔང་རྟགས་བཏོན་དགོས་པའི་རེ་སྐུལ་གནང་ཡོད།

གཞན་ཡང་ཁོང་རྣམས་ནས་རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་གཞིར་བཟུང་པཎ་ཆེན་རིན་པོ་ཆེར་གཞི་རྩའི་རང་དབང་ལོངས་སུ་སྤྱོད་འཇུག་དགོས་པ་མ་ཟད། ཁོང་དང་ནང་མི་ཉེ་འབྲེལ་གཙོས་པའི་བོད་མི་བཙོན་པ་རྣམས་འཕྲལ་དུ་བཙོན་གྲོལ་གཏོང་དགོས་པའི་འབོད་སྐུལ་ཞུས་ཡོད་པ་རེད།

སི་པན་གྲོས་ཚོགས་གོང་མའི་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དེ་བཞིན་ཉེ་ལམ་ཕྱི་ཟླ་ ༠༢ ནང་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷཊ་མ་སི་ཧ་ ( Robert Masih Nahar) ལགས་ཀྱི་སྣེ་ཁྲིད་འོག་གསར་འཛུགས་ཐུབ་པ་བྱུང་ཞིང་། བདུན་ཕྲག་སྔོན་མའི་ནང་དུ་ཚོགས་པའི་ཚོགས་གཙོར་ལའུ་ར་ཀ་སི་ཕོཊ་ (Laura Castelfort) ལགས་གསར་འདེམས་གནང་ཡོད་པ་བཅས།།