༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༣༠ ཉིན་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་གཙོས་པའི་དགའ་ལྡན་ཤར་རྩེ་དང་། འབྲས་སྤུངས་སྒོ་མང་། སེ་ར་སྨད་བཅས་ཀྱི་སྐུ་ཚབ་ཚོགས་ཆུང་ནས་ཀརནཱ་ཊཀ་མངའ་སྡེའི་ཆེས་མཐོའི་ཤེས་ཡོན་ལྷན་ཚོགས་ཀྱི་སྤྱི་ཁྱབ་ངེས་སྟོན་པ་གཙུག་ལག་སློབ་དཔོན་གོ་པལ་ཀྲྀཥ་ཎ་ཇོ་ཤི་ལགས་དང་མཇལ་འཕྲད་གནང་ཡོད།
དེ་སྔོན་ཕྱི་ལོ་ ༢༠༢༣ ཟླ་བ་ ༠༣ ཚེས་ ༠༡ ནས་ ༠༣ བར་ཀརནཱ་ཊཀ་མངའ་སྡེའི་གྲོང་གསེབ་ཡར་རྒྱས་ལྷན་ཚོགས་དང་པན་ཅ་ཡཊ་རཇ་གཙུག་ལག་སློབ་གཉེར་ཁང་གིས་གོ་སྒྲིག་ཞུས་པའི་རང་སྲིད་རང་སྐྱོང་ཞེས་པའི་རྒྱལ་སྤྱིའི་རང་བཞིན་ལྡན་པའི་ཚོགས་ཆེན་ཞིག་བསྐོང་ཚོགས་གནང་བའི་ཐོག་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་གཙོས་པའི་བོད་མིའི་སྐུ་ཚབ་ཚོགས་ཆུང་ནས་ཀརནཱ་ཊཀ་མངའ་སྡེའི་ནང་ཡོད་པའི་ནང་པའི་དགོན་སྡེའི་སློབ་གྲྭ་ཁག་གི་ཆེས་མཐོའི་ཤེས་ཡོན་གྱི་གོ་སྐབས་དང་དཀའ་ངལ་སྐོར་བགྲོ་གླེང་གནང་ཡོད་པ་རེད།
རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ལྷོ་ཕྱོགས་འབྲེལ་མཐུད་པ་སྐུ་ཞབས་ཨམྲཏ་ཇོ་ཤི་ལགས་ཀྱི་འབད་རྩོལ་ལ་བརྟེན་ནས་ལྷོ་སྤྱི་གཙོས་པའི་བོད་མིའི་སྐུ་ཚབ་ཚོགས་ཆུང་ལ་རང་སྲིད་རང་སྐྱོང་གི་ཚོགས་ཆེན་ལ་མཉམ་ཞུགས་བྱེད་རྒྱུའི་གོ་སྐབས་བྱུང་བ་མ་ཟད། ཀརནཱ་ཊཀ་མངའ་སྡེའི་ཆེས་མཐོའི་ཤེས་ཡོན་ལྷན་ཚོགས་ཀྱི་སྤྱི་ཁྱབ་ངེས་སྟོན་པ་གཙུག་ལག་སློབ་དཔོན་གོ་པལ་ཀྲྀཥ་ཎ་ཇོ་ཤི་ལགས་དང་མཇལ་འཕྲད་ཞུ་རྒྱུའི་གོ་སྐབས་བྱུང་ཡོད།
སྐབས་དེར་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ལྷོ་ཕྱོགས་འབྲེལ་མཐུད་པ་སྐུ་ཞབས་ཨམྲཏ་ཇོ་ཤི་ལགས་དང་། སྦེལ་ཀོབ་དང་མོན་གྷོ་ཁུལ་གྱི་སློབ་གྲྭའི་སྐུ་ཚབ་རྣམ་པའི་མདུན་དུ་ཀརནཱ་ཊཀ་མངའ་སྡེའི་ཆེས་མཐོའི་ཤེས་ཡོན་ལྷན་ཚོགས་ཀྱི་སྤྱི་ཁྱབ་ངེས་སྟོན་པ་གཙུག་ལག་སློབ་དཔོན་གོ་པལ་ཀྲྀཥ་ཎ་ཇོ་ཤི་ལགས་སུ་དྲན་རྟེན་ཞིག་ཕུལ་ཡོད་པ་བཅས།། 
