༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༢༧ ཉིན་རྒྱལ་ཚོགས་ཀྱི་ཆེད་མཁས་པ་དྲུག་ནས་རྒྱ་ནག་གཞུང་གིས་བོད་ནང་ལས་རིགས་སྦྱོང་བརྡར་ཟེར་བ་དང་། ངལ་རྩོལ་བཙན་སྐུལ་གྱི་ལས་གཞི་སྤེལ་བཞིན་པར་ཐུགས་འཚབ་ཤུགས་ཆེ་བསྟན་ཡོད།
དེ་ཡང་གོང་ཚེས་ཉིན་རྒྱལ་ཚོགས་ཀྱི་ཆེད་མཁས་པ་དྲུག་ནས་གསར་འགོད་བསྒྲགས་གཏམ་བརྒྱུད་བོད་ནང་རྒྱ་ནག་གཞུང་གིས་ལས་རིགས་སྦྱོང་བརྡར་ཞེས་པ་དང་། བཙན་པོས་ངལ་རྩོལ་བ་གནས་སྤོའི་ལས་གཞི་སྤེལ་བཞིན་པར་ཐུགས་འཚབ་དང་བཅས་ལས་གཞི་དེ་དག་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་རྩ་མེད་བཟོ་རྒྱུ་མ་ཟད། བོད་མི་རྣམས་ལ་བྱ་ར་དང་ལྟ་གྲུབ་ཀྱི་སྦྱོང་བརྡར་སྤྲོད་ཆེད་སྤེལ་བ་ཡིན་ལ། ཕྱི་ལོ་ ༢༠༡༥ ནས་བཟུང་རྒྱ་གཞུང་གིས་གཉུག་མར་གནས་པའི་བོད་མི་བརྒྱ་ཕྲག་མང་པོ་བཙན་པོས་གནས་སྤོས་ཏེ་ཡོང་འབབ་ཞན་པའི་ལས་རིགས་གཉེར་དུ་བཅུག་ཅིང་། ལས་གཞི་དེ་ཉིད་བོད་མིས་དང་དུ་བླངས་པ་བཤད་ཀྱང་དོན་དངོས་ཐོག་རྒྱ་ནག་གཞུང་གིས་བཙན་སྐུལ་བྱེད་བཞིན་ཡོད་ཅེས་གསལ་བཤད་གནང་ཡོད།
རྒྱལ་ཚོགས་ཀྱི་ཆེད་མཁས་པ་རྣམས་ཀྱིས་གསུངས་པ་ལྟར་ན། ངལ་རྩོལ་བ་གནས་སྤོའི་ལས་གཞི་དེ་ལས་རིགས་སྦྱོང་བརྡར་ལྟེ་གནས་ཞེས་པས་སྟངས་འཛིན་བྱེད་ཅིང་། ལྟེ་གནས་ཁང་དེས་ལས་རིགས་སྦྱོང་བརྡར་ལས་རིག་གཞུང་དང་ཆབ་སྲིད་ཀྱི་སློབ་གསོ་སྤྲོད་རྒྱུར་ནུས་ཤུགས་ཆེ་བ་སྤུངས་ཏེ། ལས་གཞིའི་ཁོངས་སུ་ཡོད་པའི་བོད་མི་རྣམས་ལ་བོད་སྐད་བཤད་རྒྱུ་དང་ཆོས་དད་ཐོག་དམ་བསྒྲགས་བྱེད་ཀྱི་ཡོད་ཅེས་ངོ་སྤྲོད་གནང་།
དེ་དང་ཆབས་ཅིག་ཆེད་མཁས་པ་རྣམས་ནས་རྒྱ་ནག་གཞུང་ངོས་ནས་བོད་མི་རྣམས་ལས་རིགས་སྦྱོང་བརྡར་དང་ངལ་རྩོལ་བ་གནས་སྤོའི་ལས་གཞི་ལས་ཐར་ཐབས་ཇི་ཡོད་གསལ་བཤད་དང་། བོད་མི་གསར་དུ་ལས་བཀོད་བྱ་ཡུལ་གྱི་གནས་སྟངས་ལ་བྱ་ར་བྱ་རྒྱུ་མ་ཟད། བོད་མིའི་ཆོས་དང་རིག་གཞུང་། སྐད་ཡིག་ལ་བརྩི་བཀུར་ཞུ་དགོས་པའི་འབོད་སྐུལ་གནང་ཡོད། དེ་བཞིན་ཁོང་ཚོས་རྒྱ་གཞུང་གིས་རྒྱལ་སྤྱིའི་ཁྲིམས་ཡིག་དགོངས་དོན་བཙན་སྐུལ་ངལ་རྩོལ་དང་། མི་སྣ་ཚོང་སྒྱུར་མཚམས་འཇོག་གིས་གྱོང་གུན་ཕོག་ཡུལ་རྣམས་ལ་གུན་གསབ་སྤྲོད་དགོས་པའི་རེ་སྐུལ་ཡང་གནང་ཡོད་པ་རེད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་རྒྱལ་ཚོགས་ཀྱི་ཆེད་མཁས་པ་རྣམས་ནས་རང་འགན་ཁུར་ལེན་གྱིས་བོད་ནང་གི་གནས་སྟངས་རྟོགས་ཞིབ་གནང་བར་བསྔགས་བརྗོད་དང་སྦྲགས། ཆེད་མཁས་པ་རྣམས་ནས་བོད་ནང་རྒྱ་གཞུང་གིས་ཡར་རྒྱས་ལ་སྙད་དེ་བོད་མི་རྣམས་ལ་ངལ་རྩོལ་བཙན་སྐུལ་གཏོང་བཞིན་པ་ཐེར་འདོན་གནང་བ་བཞིན་མཉམ་འབྲེལ་རྒྱལ་ཚོགས་དང་ཚོགས་མི་རྒྱལ་ཁབ་རྣམས་ཀྱིས་རྒྱ་ནག་གཞུང་ལ་འདྲི་རྩད་གཏོང་རྒྱུའི་དུས་ལ་བབ་ཡོད་སྐོར་གསལ་བཤད་གནང་།
བོད་ནང་གི་གནས་སྟངས་ཐད་བློ་འཚབ་འདོན་མཁན་ཆེད་མཁས་པ་རྣམས་ནི། དེང་རབས་ཀྱི་རྣམ་པ་ཅན་གྱི་ཚེ་གཡོག་དང་། དེའི་རྒྱུ་འབྲས་བཅས་ལ་ཞིབ་འཇུག་བྱེད་མཁན་ཆེད་མཁས་པ་ཏོ་མ་ཡོ་ཨོ་བོ་ཀ་ཊ་ (Tomoya Obokata) ལགས་དང་། བུད་མེད་དང་བྱིས་པ་ཐེ་བའི་མི་སྣ་ཚོང་སྒྱུར་ཐད་ཞིབ་འཇུག་བྱེད་མཁན་ཆེད་མཁས་པ་སི་ཧོ་བྷན་མུ་ལ་ལི་ (Siobhán Mullally) ལགས། དེང་རབས་ཀྱི་རྣམ་པ་ཅན་གྱི་མི་རིགས་དབྱེན་འབྱེད་དང་ཕྱི་མིར་སྡང་སེམས་སོགས་ཐད་ཞིབ་འཇུག་བྱེད་མཁན་ཆེད་མཁས་པ་ཨ་ཤ་ཝི་ནི་ (Ashwini K.P) ལགས། རིག་གཞུང་ཐོབ་ཐང་སྐོར་ཞིབ་འཇུག་བྱེད་མཁན་ཆེད་མཁས་པ་ཨེ་ལེག་སེན་དྲ་ཤན་ཐ་ཀི་ (Alexandra Xanthaki) ལགས། གྲངས་ཉུང་མི་རིགས་གནད་དོན་སྐོར་ཞིབ་འཇུག་བྱེད་མཁན་ཆེད་མཁས་པ་ཕར་ནནྜ་ཊི་ཝ་རི་ན་སི་ (Fernand de Varennes) ལགས། ཡར་རྒྱས་ཐོབ་ཐང་སྐོར་ཞིབ་འཇུག་བྱེད་མཁན་ཆེད་མཁས་པ་སཱཊ་ཨལ་ཕ་རང་གི་ (Saad Alfarargi) ལགས་བཅས་ཡིན། ཁོང་རྣམས་ནས་གནད་དོན་དེའི་སྐོར་གསར་འགོད་བསྒྲགས་གཏམ་སྤེལ་བའི་རྗེས་དེ་འབྲེལ་ཡིག་འབྲེལ་ཞིག་རྒྱ་ནག་གཞུང་ལ་བཏང་ཡོད་པ་བཅས།།
