༄༅། །མཉམ་འབྲེལ་རྒྱལ་ཚོགས་ཀྱི་ཆེད་མཁས་མི་སྣ་དྲུག་གིས་བོད་ནང་འགྲོ་བ་མིའི་ཐོབ་ཐང་སྤྱི་དང་ཡང་སྒོས་ངལ་རྩོལ་བར་བཤུ་གཞོག་ཚབས་ཆེ་གཏོང་བཞིན་པར་བློ་འཚབ་ཡོད་སྐོར་འཁོད་པའི་ཐུན་མོང་ཡིག་འབྲེལ་ཞིག་རྒྱ་ནག་གཞུང་ལ་བཏང་ཡོད།
དེ་ཡང་ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༦ འཁོད་ཡིག་འབྲེལ་ཨང་ (AL CHN 13/2022) དེ་ཉིད་ཉེ་ལམ་ཡོངས་བསྒྲགས་ཁྱབ་སྤེལ་གནང་ཡོད་ཅིང་། དེའི་ནང་རྒྱལ་ཚོགས་ཀྱི་ཆེད་མཁས་མི་སྣ་རྣམས་ནས་རྒྱ་ནག་གཞུང་ལ་བོད་མིའི་གནས་སྟངས་སྤྱི་དང་བྱེ་བྲག་ཏུ་ངལ་རྩོལ་བཙན་བཀོལ་འོག་བཤུ་གཞོག་དང་། ཁྲིམས་འགལ་ཚོང་སྒྱུར། སྡུག་སྦྱོང་མྱོང་བཞིན་པའི་བོད་མིའི་གནས་སྟངས། བོད་ཀྱི་ཆོས་དང་རིག་གཞུང་ཡུལ་སྲོལ་གོམས་གཤིས་སོགས་ལ་མཐོང་ཆུང་དམའ་འབེབས། བཙོན་པ་རྣམས་ལ་ཆབ་སྲིད་སློབ་གསོ་གོ་བསྐོན། བསམ་བློ་དང་སྨྲ་བརྗོད་རང་དབང་རྡོག་རོལ་གཏོང་བཞིན་པར་གསལ་བཤད་དགོས་པའི་རེ་འདུན་བཏོན་ཡོད། དེ་དང་ཆབས་ཅིག་ཆེད་མཁས་པ་རྣམས་ནས་བོད་མི་རྣམས་ལ་ཆབ་སྲིད་སློབ་གསོ་སྤྲོད་བཞིན་པའི་གནས་སྟངས་ལའང་བློ་འཚབ་ཤུགས་ཆེ་བསྟན་ཡོད།
ཡིག་འབྲེལ་དེའི་ནང་ཆེད་མཁས་པ་རྣམས་ནས་བོད་རང་སྐྱོང་ལྗོངས་ཞེས་པའི་ནང་བོད་མི་ངལ་རྩོལ་བ་གནས་སྤོའི་ལས་གཞི་ལག་བསྟར་གྱིས་གྲོང་གསེབ་ཁུལ་གྱི་ངལ་རྩོལ་བ་རྣམས་དམའ་རིམ་གླ་ཕོགས་ཉུང་བའི་བཟོ་གྲྭར་ལས་སྐུལ་བྱེད་པ་དང་། བོད་མིའི་ཆོས་དང་རིག་གཞུང་སྐད་ཡིག་བཅས་པ་རྩ་མེད་གཏོང་བྱུས་བྱེད་ཀྱི་ཡོད་སྐོར་གསལ། དེ་བཞིན་ཡིག་འབྲེལ་ནང་རྒྱ་ནག་གཞུང་ངོས་ནས་ཕྱི་ལོ་ ༢༠༡༥ ནས་ ༢༠༢༠ བར་བོད་ནང་གི་ཞིང་འབྲོག་མི་མང་ས་ཡ་ ༢་༨ ལྷག་ཞིང་འབྲོག་ས་ཁུལ་ནས་གྲོང་ཁྱེར་གྱི་བཟོ་ལས་ཁང་དུ་གནས་སྤོས་ཟིན་པར་ངོས་ལེན་བྱས་ཡོད་ལ། དེ་ལས་ཕྱི་ལོ་ ༢༠༢༠ ཁོ་ནར་ཞིང་འབྲོག་མི་མང་འབུམ་དྲུག་ལྷག་གནས་སྤོ་ཟིན་པར་ཁས་ལེན་བྱས་ཡོད་སྐོར་གསལ་ཡོད་པ་རེད།
ཆེད་མཁས་པ་རྣམས་ནས་རྒྱ་ནག་གཞུང་ལ་ངལ་རྩོལ་བ་གནས་སྤོའི་ལས་གཞི་དང་། གནས་སྤོའི་ལས་གཞི་བརྒྱུད་བོད་མི་ཇི་ཙམ་གནས་སྤོས་ཟིན་མིན། བོད་རང་སྐྱོང་ལྗོངས་ཞེས་པའི་ནང་རྟེན་གཞི་བྱས་པའི་ཚོང་གཉེར་ལས་དོན། བོད་ཀྱི་སྐད་ཡིག་སློབ་སྤེལ་དང་བཀོལ་སྤྱོད་གནས་སྟངས། དེ་བཞིན་བོད་སྐད་སྤྱོད་པར་དམ་བསྒྲགས་ཇི་ཡོད། ཡོང་འབབ་ཉུང་བའི་ངལ་རྩོལ་ལས་གཞིར་བོད་མི་གནས་སྤོས་བྱས་པའི་དགེ་མཚན་ཇི་ཡོད་སོགས་ཀྱི་སྐོར་གནས་ཚུལ་ཞིབ་ཕྲ་མཁོ་སྤྲོད་དགོས་པའི་རེ་འདུན་བཏོན་ཡོད་པ་མ་ཟད། གཞན་ཡང་རྒྱ་ནག་གཞུང་གིས་བོད་ནང་སྤྱི་ཚོགས་ཞི་འཇགས་ལ་སྙད་བཏགས་ཏེ་དམ་བསྒྲགས་ཤུགས་ཆེ་བྱེད་བཞིན་པར་གསལ་བཤད་དགོས་ཞེས་གསུངས་ཡོད།
རྒྱལ་ཚོགས་ཀྱི་ཆེད་མཁས་མི་སྣ་དྲུག་ཐུན་མོང་གི་ཡིག་འབྲེལ་ལ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་དགའ་བསུ་དང་འབྲེལ་ཆེད་མཁས་པ་རྣམས་ནས་རྒྱ་ནག་གི་དབང་བསྒྱུར་འོག་བོད་མིའི་ཡ་ང་བའི་གནས་སྟངས་གསལ་སྟོན་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། རྒྱ་ནག་གཞུང་ངོས་ནས་མཉམ་འབྲེལ་རྒྱལ་ཚོགས་ཀྱི་གཏན་འབེབས་ཡིག་འབྲེལ་འགྲོ་ལུགས་ལ་བརྩི་བཀུར་གྱིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྤྱི་དང་། ལྷག་པར་བོད་མི་ངལ་རྩོལ་བ་གནས་སྤོའི་ལས་གཞི་མཚོན་པའི་བོད་ཀྱི་ཆོས་དང་རིག་གཞུང་སྐད་ཡིག་བཅས་པ་རྩ་མེད་གཏང་རྒྱུའི་ལས་གཞིའི་སྐོར་གསལ་བཤད་ཞིབ་ཕྲ་མཁོ་སྤྲོད་དགོས་པའི་རེ་སྐུལ་གནང་ཡོད་པ་རེད།
དེ་ཡང་ཡིག་འབྲེལ་གཏོང་མཁན་རྒྱལ་ཚོགས་ཀྱི་ཆེད་མཁས་པ་དྲུག་ནི་དེང་རབས་ཀྱི་རྣམ་པ་ཅན་གྱི་ཚེ་གཡོག དེའི་རྒྱུ་དང་རྗེས་འབྲས་བཅས་ལ་ཉམས་ཞིབ་གནང་མཁན་དམིགས་བསལ་ཆེད་མཁས་པ་ཀྲོ་མ་ཡ་ཨོ་བོ་ཀ་ཊ་ (Tomoya Obokata) ལགས་དང་། རིག་གཞུང་ཐོབ་ཐང་ཐད་ཀྱི་དམིགས་བསལ་ཆེད་མཁས་པ་ཨ་ལེག་སེན་དྲ་ཤན་ཤ་ཀི་ (Alexandra Xanthaki) ལགས། ཡར་རྒྱས་ཐོབ་ཡང་ཐད་ཀྱི་དམིགས་བསལ་ཆེད་མཁས་པ་སཱཊ་ཨལ་ཕ་རང་གི་ (Saad Alfarargi) ལགས། གྲངས་ཉུང་མི་རིགས་གནད་དོན་ཐད་ཀྱི་དམིགས་བསལ་ཆེད་མཁས་པ་ཕར་ནནྜ་ཊི་ཝ་རི་ནིས་ (Fernand de Varennes) ལགས། དེང་རབས་ཀྱི་རྣམ་པ་ཅན་གྱི་མི་རིགས་འཐེན་འཁྱེར། མི་རིགས་དབྱེ་འབྱེད། ཕྱི་མིར་སྡང་འཛིན་སོགས་ཀྱི་དམིགས་བསལ་ཆེད་མཁས་པ་ཀེ་པི་ཨ་ཤ་ཝ་ནི་ (K.P. Ashwini) ལགས། བུད་མེད་དང་བྱིས་པ་ཐེ་བའི་སྐྱེས་བུ་ཁྲིམས་འགལ་ཚོང་སྒྱུར་ཐད་ཀྱི་དམིགས་བསལ་ཆེད་མཁས་པ་སི་ཧོ་བྷན་མུ་ལེ་ (Siobhán Mullally) ལགས་བཅས་ཡིན་པ་རེད།།
