༄༅། །ཕྱི་ལོ་ ༢༠༢༣ ཟླ་བ་ ༤ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༥༩ རཱ་མོན་མེག་སེ་སེ་གཟེངས་རྟགས་ (1959 Ramon Magsaysay Award) འབུལ་ནས་ལོ་ངོ་ ༦༤ འཁོར་བའི་དུས་དྲན་དང་བསྟུན་ཕི་ལི་པིན་ (Philippines) རཱ་མོན་མེག་སེ་སེ་གཟེངས་རྟགས་ཐེབས་རྩའི་ཚོགས་མི་རྣམས་རྡ་ས་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཅར་གྱིས་གཟེངས་རྟགས་དངོས་སུ་ཕྱག་འབུལ་དང་མཇལ་ཁ་ཞུས་ཡོད་པ་རེད།

དེ་ཡང་མཇལ་ཁའི་སྐབས་སུ་ཕི་ལི་པིན་སི་རཱ་མོན་མེག་སེ་སེ་གཟེངས་རྟགས་ཐེབས་རྩའི་ཚོགས་ཚོགས་གཙོ་སུ་སཱན་ཨ་ཕཱན་ (Susan Afan) ལགས་ཀྱིས་གཙོས་པའི་ཚོགས་མི་ཁག་གཅིག་ཕེབས་ཡོད། མཇལ་ཁའི་སྐབས་དགེ་རྩའི་ཚོགས་གཙོ་སུ་སཱན་ཨ་ཕཱན་ལགས་ཀྱིས་༸གོང་ས་མཆོག་ནི་སྐབས་དེར་གཟེངས་རྟགས་འདི་བཞེས་མཁན་གྱི་དགུང་ལོ་ཆེས་གཞོན་ཤོས་ཡིན་པ་དང་། ད་བར་གཟེངས་རྟགས་བཞེས་མཁན་ ༣༤༤ བྱུང་ཡོད་པས་གཟེངས་རྟགས་བཞེས་མཁན་ ༣༥༠ བྱུང་མཚམས་གཟེངས་རྟགས་མཛད་སྒོ་དང་འབྲེལ་ད་བར་གཟེངས་རྟགས་བཞེས་མཁན་གྱི་ལོ་རྒྱུས་དང་། སྐུ་པར། གསུང་འཕྲིན་བཅས་ཡོད་པའི་ཆེད་དེབ་དཔར་བསྐྲུན་སོགས་ཀྱི་ལས་རིམ་ཡོད་པ་༸སྙན་སེང་དང་འབྲེལ་༸གོང་ས་མཆོག་གིས་གཞོན་སྐྱེས་ལ་དམིགས་པའི་གསུང་འཕྲིན་ཞིག་གསོལ་སྩལ་ཡོང་བའི་སྐྱབས་འཇུག་ཞུས་ཡོད།མཇལ་ཁའི་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་གཞོན་སྐྱེས་ཀྱི་འགན་འཁྲི། ཕི་ལི་པིན་བོད་དོན་ལ་སྔ་ཕྱིར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་འབྲེལ། འཛམ་གླིང་འདིར་བྱམས་སྙིང་རྗེ་ཧ་ཅང་དགོས་མཁོ་ཆེན་པོ་ཡིན་པ་མ་ཟད། འཛམ་གླིང་འདིར་ཁོང་ཁྲོས་བསླངས་པའི་དམག་འཁྲུག་སོགས་བྱུང་བ་ནི་ཧ་ཅང་ཐབས་སྐྱོ་བོ་ཡིན་པ། དེང་གི་དུས་སུ་འཛམ་གླིང་ཁྱོན་ཡོངས་སུ་དམག་འཁྲུག་ལ་མཐོང་སྣང་ཡག་པོ་མེད་པར་ཡིད་ཐང་ཆད་ཡོད་པའི་སྐབས་འདིར་གཞོན་སྐྱེས་ཚོས་བྱམས་སྙིང་རྗེ་ཉམས་ལེན་གནང་རྒྱུ་ཧ་ཅང་གལ་ཆེན་པོ་ཡིན་པ་སོགས་ཀྱི་བཀའ་སློབ་སྩལ་ཡོད།གཟེངས་རྟགས་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་གཟེངས་རྟགས་ཐོག་མ་དང་། ཛ་དྲག་ཆེན་པོའི་སྐབས་སུ་སྤྱི་ཚོགས་དང་ཆོས་ལུགས། རིག་གཞུང་སྲུང་སྐྱོབ་བཅས་ལ་མཆོག་གྱུར་གྱི་དབུ་ཁྲིད་གནང་བར་ཕུལ་བ་ཞིག་ཡིན་པ་དང་། ཕྱི་ལོ་ ༡༩༥༩ ཟླ་ ༨ ཚེས་ ༣༡ ཉིན་སྐུའི་གཅེན་པོ་རྒྱ་ལོ་དོན་གྲུབ་མཆོག་གིས་༸གོང་ས་མཆོག་གི་སྐུ་ཚབ་གནང་སྟེ་ཕི་ལི་པིན་རྒྱལ་ས་མཱ་ནེ་ལཱ་རུ་བཞེས་གནང་ཡོད་པ་བཅས། །