༄༅། །ནང་སྲིད་ལས་ཁུངས་ཀྱི་དབུས་རང་ཁོངས་ལས་བྱེད་དྲུང་གཞོན་ཚད་མཉམ་ངག་དབང་རྒྱལ་མཚན་ལགས་བར་ལམ་གཟུགས་གཞི་བདེ་མིན་རྐྱེན་དམིགས་བསལ་ཕྱེད་ཕོགས་ནད་དགོངས་ཐོག་ཡོད་པ་དེ་རིང་སྟེ་་ཕྱི་ལོ་ ༢༠༢༣ ཟླ་བ་ ༤ ཚེས་ ༢༦ ཉིན་གྱི་ཐོ་རངས་ཆུ་ཚོད་ ༢ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་དཔལ་ལྡན་བཀའ་ཤག་ཏུ་སྙན་སེང་བྱུང་བར་ཐུགས་ཕམ་དང་འབྲེལ་དམ་པ་ཁོང་གིས་ཚེ་རབས་ཕྲེང་བར་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར་དེ་རིང་ཕྱི་ཚེས་ ༢༦ ཉིན་གྱི་ཕྱི་དྲོ་ཆུ་ཚོད་ ༣ པའི་ཐོག་རྡ་ས་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་སྨོན་ལམ་གསུང་འདོན་གནང་། དེ་རྗེས་དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཕྱི་དྲོ་ཆུ་ཚོད་ ༤ ནས་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༦༦ ཟླ་བ་ ༡༡ ཚེས་ ༡ ཉིན་ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་སུ་སྐྱེས་ཤིང་། ཕྱི་ལོ་ ༡༩༩༢ ཟླ་བ་ ༧ ཚེས་ ༡ ཉིན་ལྡི་ལི་དཔལ་འབྱོར་ཉམས་ཞིབ་སྡེ་ཚན་དུ་ཟླ་དྲུག་རིང་ཚོད་ལྟའི་ངོ་བོར་བསྐོ་གཞག་གིས་ཕྱག་ལས་གནང་། ཕྱི་ལོ་ ༡༩༩༣ ཟླ་བ་ ༢ ཚེས་ ༢༦ ཉིན་ལྡི་ལི་དཔལ་འབྱོར་ཉམས་ཞིབ་སྡེ་ཚན་དུ་ལས་བྱེད་ངོ་མ་བསྐོ་གཞག་གིས་ཕྱག་ལས་གནང་། ཕྱི་ལོ་ ༡༩༩༧ ཟླ་བ་ ༢ ཚེས་ ༢༦ ཉིན་གནས་སྤར་ཐོག་ལྡི་ལི་དཔལ་འབྱོར་ཉམས་ཞིབ་སྡེ་ཚན་དུ་འགན་འཛིན་ལས་རོགས་སུ་བསྐོ་གཞག་གིས་ཕྱག་ལས་གནང་།
ཕྱི་ལོ་ ༢༠༠༣ ཟླ་བ་ ༩ ཚེས་ ༣༠ ཉིན་ལྡི་ལི་དཔལ་འབྱོར་པར་སྐྲུན་ཁང་གི་འགན་འཛིན་ལས་རོགས་སུ་གནས་སྤོས་ཀྱིས་ཕྱག་ལས་གནང་། དཔལ་འབྱོར་ལས་ཁུངས་ཀྱི་ཚོང་ལས་སྡེ་ཚན་ཁང་སྒེར་བདག་ཅན་དུ་བསྒྱུར་རྒྱུའི་སྲིད་བྱུས་འོག་ལས་བྱེད་རྣམས་ལ་བདམ་ཀའི་ཐོག་ཕྱི་ལོ་ ༢༠༠༤ ཟླ་བ་ ༨ ཚེས་ ༦ ཉིན་ནང་སྲིད་ལས་ཁུངས་སུ་སྡེ་ཚན་འགན་འཛིན་ཚད་མཉམ་གནས་རིམ་ཐོག་བསྐོ་གཞག་གིས་ཕྱག་ལས་གནང་། ཕྱི་ལོ་ ༢༠༠༩ ཟླ་ ༤ ཚེས་ ༠༢ ཉིན་དྲུང་གཞོན་ལས་རོགས་གནས་རིམ་ཚད་མཉམ་ཐོག་གནས་སྤར། ཕྱི་ལོ་ ༢༠༡༦ ཟླ་བ་ ༧ ཚེས་ ༢༥ ཉིན་དྲུང་གཞོན་ཚད་མཉམ་གནས་རིམ་ཐོག་གནས་སྤར་གནང་བ་ནས་བཟུང་ད་བར་ནང་སྲིད་ལས་ཁུངས་ཀྱི་འཆར་སྡེ་ཚན་པར་ཕྱག་ལས་གནང་ཡོད་པ་བཅས། །
