༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་། སི་ལཱི་གུ་རིར་ཡོད་པའི་རེ་བ་ཚོགས་པ། སྡེ་ར་ལྡུན་དུ་ཡོད་པའི་གཞོན་སྐྱེས་རེ་བ་ཚོགས་པ་བཅས་ཐུན་མོང་གིས་ཕྱི་ལོ་ ༢༠༢༣ ཟླ་བ་ ༣ ཚེས་ ༢༧ ནས་ ༣༡ བར་བསུ་ན་མདའ་བཀྲ་ཤིས་གླིང་དང་། ཀ་སྦུག རྡོར་གླིང་། ར་ཝང་ལ་ཀུན་ཕན་གླིང་། མ་སུ་རི་སཾ་བྷོ་ཊ་སློབ་གྲྭ དོན་གྲུབ་གླིང་ནེ་རུ་དྲན་རྟེན་སློབ་གྲྭ་བཅས་སུ་མྱོས་རྫས་ལོག་སྤྱོད་དང་མྱོས་རྫས་ལང་ཤོར་སྔོན་འགོག་སྐོར་གོ་རྟོགས་ཀྱི་ལས་གཞི་ཞིག་སྤེལ་གནང་ཡོད།
དེ་ཡང་གོ་རྟོགས་སྤེལ་སྐབས་གཙོ་བོ་མྱོས་རྫས་ལང་ཤོར་གྱི་རྒྱུ་རྐྱེན་དང་། ཐོག་མའི་འཕེལ་རིམ། རྟགས་མཚན་ངོས་འཛིན། སྤྱི་ཚོགས་ལ་མྱོས་རྫས་ལང་ཤོར་གྱི་ཤུགས་རྐྱེན། སློབ་གྲྭའི་ནང་མྱོས་རྫས་ལོག་སྤྱོད་ཇི་ལྟར་འཕེལ་བཞིན་པ་བཅས་ཀྱི་བརྗོད་གཞིའི་སྐོར་གོ་རྟོགས་སྤེལ་རྗེས་སློབ་ཕྲུག་དང་ས་གནས་མང་ཚོགས་ཀྱི་དྲི་བ་ཁག་ལ་ལན་འདེབས་གནང་ཡོད།
གོ་རྟོགས་ལས་གཞིའི་དམིགས་ཡུལ་གཙོ་བོ་ནི། བོད་མིའི་སྤྱི་ཚོགས་ཁྲོད་མྱོས་རྫས་ལོག་སྤྱོད་དང་མྱོས་རྫས་ལང་ཤོར་གྱི་ཤུགས་རྐྱེན་སྐོར་གོ་རྟོགས་སྤེལ་སླད་ཡིན་ཞིང་། མྱོས་རྫས་ལང་ཤོར་དུ་གྱུར་མྱོང་བའི་ནད་པ་ཟུར་པ་དང་ད་ལྟའི་ནད་པ་བཅས་ནས་ཀྱང་མྱོས་རྫས་ལོག་སྤྱོད་དང་མྱོས་རྫས་ལང་ཤོར་སྐོར་སོ་སོའི་ཉམས་མྱོང་སྤེལ་རེས་དང་གཏམ་རྒྱུད་འཁྲབ་སྟོན་གནང་ཡོད། གོ་རྟོགས་ལས་གཞིའི་འགྲོ་གྲོན་ཨ་རིའི་རོགས་ཚོགས་ (PRM) ནས་བཏང་གནང་ཡོད་པ་བཅས།།
