༄༅། །འདི་གར་མན་སྤར་ཕན་བདེ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༤ ཚེས་ ༧ དང་ ༨ བར་ཉིན་གྲངས་གཉིས་རིང་མན་སྤར་ཕན་བདེ་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ལས་ཚབ་ལས་དྲུང་དབང་ལྡན་བཀྲ་ཤིས་ལགས་དང་ཚབ་གསར་ཚེ་དབང་དབྱངས་མཚོ་ལགས་རྣམ་གཉིས་དབར་སྤྲོད་དཔང་ནང་སྲིད་ལས་ཁུངས་ཀྱི་སྐུ་ཚབ་སྦན་ད་ར་ནོར་རྒྱས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དོན་གྲུབ་བཟང་པོ་ལགས་དབུ་བཞུགས་ཐོག་རྩིས་སྤྲོད་རྩིས་ལེན་གནང་ཡོད། དེ་ཡང་ཕྱི་ཚེས་ ༧ ཉིན་མན་སྤར་གཞིས་གྲོང་དང་པོར་རྟེན་གཞི་བྱས་པའི་དྭགས་པོ་བཤད་སྒྲུབ་གླིང་དགོན་པར་མཆོད་མཇལ་དུ་ཕེབས་པ་དང་། དེ་རྗེས་ནང་སྲིད་སྤྲོད་དཔང་སྦན་ད་ར་ས་གནས་འགོ་འཛིན་དོན་གྲུབ་བཟང་པོའི་མདུན་དུ་ལས་ཁུངས་ཀྱི་གལ་ཆེའི་རྩ་འཛིན་ཡིག་ཆ་ཁག་དང་། འགྲོ་བཞིན་པའི་ཡིག་འཕེལ། རྩིས་ཁྲ་དང་མ་དངུལ་གནས་སྟངས། ས་འགོའི་ལས་ཁུངས་ཀྱི་འཛིན་ཆས། ས་འགོའི་ཁྱབ་ཁོངས་སྡེ་ཚན་ཁག་གི་ཅ་དངོས་ཁག་རྩིས་སྤྲོད་རྩིས་ལེན་གནང་གྲུབ་མཚམས། སྤྲོད་དཔང་དང་ལྷན་གཞིས་གྲོང་ཁག་ཏུ་གཟིགས་ཞིབ་ཏུ་ཕེབས་ཡོད། ཕྱི་ཚེས་ ༨ ཉིན་སྔ་དྲོ་ཆུ་ཚོད་ ༩ ཐོག་མན་སྤར་ས་འགོ་གསར་རྙིང་དབར་ཞབས་སྟེགས་བརྗེ་ལེན་གྱི་མཛད་སྒོར་ས་གནས་འཐུས་ཚོགས་ཀྱི་ཚོགས་གཙོ་གཙོས་པའི་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་ཚོགས་གཙོའམ་འགན་འཛིན། དེ་བཞིན་དགོན་སྡེ་ཁག་གི་སྐུ་ཚབ་བཅས་ལྷན་འཛོམས་ཐོག་ས་གནས་འགོ་འཛིན་གསར་པར་རྟེན་འབྲེལ་མཇལ་དར་བསྒྲོན། དེ་ཉིན་ཆུ་ཚོད་ ༡༡ ཐོག་མི་མང་ཚོགས་ཁང་ནང་མང་ཚོགས་རྒྱས་འཛོམས་ཐོག་ལས་དྲུང་ནས་ས་འགོ་ཚབ་གསར་ཚེ་དབང་དབྱངས་མཚོ་ལགས་ཀྱི་སྐོར་ངོ་སྤྲོད་གསུང་བཤད་དང་། དེ་ནས་ས་གནས་འགོ་འཛིན་གསར་པ་ཚེ་དབང་དབྱངས་མཚོ་ལགས་ཀྱིས་འཚམས་འདྲིའི་གསུང་བཤད་གནང་རྗེས། སྤྲོད་དཔང་སྦན་ད་ར་ས་གནས་འགོ་འཛིན་དོན་གྲུབ་བཟང་པོ་ལགས་ཀྱིས་རྩིས་སྤྲོད་རྩིས་ལེན་གྱི་གཟིགས་ཚུལ་དང་འབྲེལ་དགོངས་འཆར་ཇི་བྱུང་སྐོར་གསུང་བཤད་གནང་ཡོད་པ་བཅས། །