༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༢༦ ཉིན་མེཀ་སི་ཀོ་གྲོས་ཚོགས་སུ་རྒྱ་ནག་གི་གཞུང་ཚབ་གསར་པ་མཉམ་ཞུགས་སྐབས་གྲོས་ཚོགས་འཐུས་མི་སལ་ཝ་ཊོར་ཀ་རོ་ཀབ་རེ་ར་(Salvador Caro Cabrera) ལགས་དང་། གྲོས་ཚོགས་འཐུས་མི་ཨི་ནིས་པཱ་ར་ཇོ་ཧ་རེ་སི་ (Inés Parra Juárez) ལགས་ནས་བོད་ཀྱི་རྒྱལ་དར་བསྟན་ཏེ་བོད་ལ་རང་དབང་དགོས་ཞེས་ངོ་རྒོལ་གནང་ཡོད།

གྲོས་ཚོགས་འཐུས་མི་རྣམ་པ་གཉིས་ནི་མེཀ་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་གྲས་ཡིན་པ་དང་། གྲོས་ཚོགས་འཐུས་མི་བཅུ་དགུ་ལས་གྲུབ་པའི་བོད་དོན་རྒྱབ་སྐྱོར་ཚོགས་པ་དེ་ཉིད་ཕྱི་ལོ་ ༢༠༢༢ ཟླ་བ་ ༡༡ ནང་དབུ་འཛུགས་གནང་ཡོད་པ་རེད། འདི་ལོའི་ཕྱི་ཟླ་ ༠༣ ནང་གྲོས་ཚོགས་འཐུས་མི་ཁག་གཅིག་བཞུགས་སྒར་རྡ་རམ་ས་ལར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༤ པའི་གཞུང་འབྲེལ་སྐུ་མགྲོན་དུ་ཕེབས་ཞུགས་གནང་ཡོད་ཅིང་། ཁོང་རྣམས་ཀྱིས་བོད་མིའི་རྩ་དོན་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་ལ་རྒྱབ་སྐྱོར་གནང་བར་བོད་མི་རྣམས་ནས་དགའ་བསུ་དང་འབྲེལ་ཐུགས་རྗེ་ལེགས་འབུལ་ཞུས་ཡོད་པ་བཅས།།