༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན།  ཟླ་བ་སྔོན་མའི་ནང་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་རྒྱལ་ས་ཝ་ཤིང་ཊོན་དུ་གོ་སྒྲིག་གནང་བའི་བོད་དོན་ཞུ་གཏུག་ལས་འགུལ་དེ་དུས་ཚོད་དང་གནས་བབ་གང་གི་ཆ་ནས་བལྟས་ཀྱང་རྣམ་ཀུན་དང་མི་འདྲ་བའི་ཞུ་གཏུག་གི་ལས་འགུལ་དམིགས་བསལ་ཞིག་ཆགས་ཡོད་པ་དང་།  ཚང་མས་ནུས་པ་མཉམ་སྤུངས་བྱས་པ་ལ་བརྟེན་ནས་ཉིན་གཉིས་རིང་གི་ལས་འགུལ་དེ་དོན་སྙིང་ལྡན་པ་བྱུང་ཡོད།  

ཨ་རིའི་ནང་གི་བོད་རིགས་སྤྱི་མཐུན་ཚོགས་པ་ཁག་གིས།  ལས་དོན་དེ་མུ་མཐུད་མཇུག་སྐྱོང་ནུས་པ་ཐོན་པ་བྱ་རྒྱུ་ནི་གཞུང་མང་གཉིས་ཀའི་འགན་ཡིན་པའི་འདུ་ཤེས་ཟབ་མོ་འཆང་བཞིན་པ་ལྟར།  བྷོ་སུ་ཊོན་བོད་རིགས་སྤྱི་མཐུན་ཚོགས་པ་དང་།  མལ་སི་ཆུ་སི་བོད་རིགས་སྤྱི་མཐུན་ཚོགས་པ། བྱང་ཨ་རིའི་སྤྱི་འཐུས་དོན་གྲུབ་ཚེ་རིང་ལགས་བཅས་ནས་ཚེས་ ༢༥ ཉིན་གྲོས་ཚོགས་གོང་མའི་འཐུས་མི་སྐུ་ཞབས་ཨེ་ཌི་མར་ཀེ་ Senator Ed Markey ལགས་དང་།  འཐུས་མི་ཨེ་ལི་ཛེ་བྷེ་ཐི་ཝ་རན་  Elizabeth Warren ལགས།  དེ་བཞིན་གྲོས་ཚོགས་འོག་མའི་འཐུས་མི་ལྕམ་ཀེཐ་རིན་ Katherine Clark ལགས་ཀྱི་ལས་ཁུངས་སུ་ཆེད་བཅར་ཞུས་ཏེ།   འདི་ལོ་ཟླ་བ་ ༢ པར་ཨ་རིའི་གྲོས་ཚོགས་གོང་འོག་གཉིས་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ (A Resolution to the Tibet-China Conflict Act [H.R. 533]) ལོ་རྒྱུས་ཀྱི་དོན་སྙིང་ལྡན་པ་ཞིག་བསྐྱར་དུ་ངོ་སྤྲོད་གནང་ཡོད་པ་དེ་ལ་རྒྱབ་སྐྱོར་ཡོང་བའི་ཞུ་འབོད་ནན་པོ་གནང་ཡོད། ཁོང་རྣམ་པས་དེ་རིང་སོ་སོའི་ཁྱབ་ཁོངས་གྲོས་ཚོགས་འཐུས་མིའི་ལས་ཁུངས་སུ་ཆེད་བཅར་གྱིས་གནད་ཡོད་ལས་བྱེད་པ་དང་ལྷན་དུ་གཙོ་བོ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་རྒྱབ་སྐྱོར་ཡོང་བའི་རེ་འབོད་ཞུས་པ་ཕུད།  དེ་རིང་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་གཏན་འཁེལ་མཛད་པའི་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་ (དགེ་འདུན་ཆོས་ཀྱི་ཉི་མ།) མཆོག་གི་འཁྲུངས་ཚེས་ཡིན་པ་དང་བསྟུན་ནས།  ཕྱི་ལོ་ ༡༩༩༥ ལོར་གར་སོང་ཆ་མེད་དུ་གྱུར་བའི་ཆུང་སྲིད་རིན་པོ་ཆེ་ད་བར་མི་ལོ་ཧྲིལ་པོ་ཉེར་བརྒྱད་སོང་ཡང་གནས་སྟངས་ངོ་མ་ཤེས་རྟོགས་ཐུབ་ཀྱི་མེད་པ་དེར་བོད་མི་ཚང་མ་བློ་འཚབ་ཆེན་པོ་ཡོད་པའི་སྐོར་དང་།  ལྷག་པར་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ནང་བོད་ཕྲུག་ས་ཡ་གཅིག་ལྷག་སློབ་འཇུག་བྱས་ཏེ་བོད་ཀྱི་རིག་གཞུང་དང་།  བོད་མི་རིགས་ཀྱི་ངོ་བོ་རྒྱ་སྒྱུར་སིམ་ཡལ་གཏོང་ཐབས་བྱེད་པའི་སྲིད་བྱུས་ལག་བསྟར་བྱེད་བཞིན་ཡོད་པའི་སྐོར་ལ་ཡང་ཞུ་འབོད་གནང་ཡོད། 

བྷོ་སུ་ཊོན་དང་།  མལ་སི་ཆུ་སི་བོད་རིགས་སྤྱི་མཐུན་ཚོགས་པ།  བྱང་ཨ་རིའི་སྤྱི་འཐུས་དོན་གྲུབ་ཚེ་རིང་ལགས་བཅས་ཀྱིས་མཉམ་རུབ་ཐོག་ནས་སྤེལ་བའི་ཉིན་གཅིག་གི་བོད་དོན་ཞུ་གཏུག་ལས་འགུལ་འདིའི་ནང་།  ཀུ་རུ་ཀུ་ལའི་ཆོས་ཚོགས་ཀྱི་དགེ་བཤེས་ངག་དབང་འཕྲིན་ལས་ལགས་དང་།  ཆབ་སྲིད་བཙོན་ཟུར་ངག་དབང་གསལ་སྒྲོལ་ལགས།  བོད་དོན་ལས་འགུལ་ལྟེ་གནས་ཁང་ (Tibet Action Institute) གི་འགན་འཛིན་ལྷ་སྒྲོན་བཀྲས་མཐོང་ལགས་ཀྱང་མཉམ་ཞུགས་གནང་ཡོད་པ་བཅས།།