༄༅། །བྱེས་ཀྱི་གདན་ས་བཀྲ་ཤིས་ལྷུན་པོར་༸ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༤ ཕེབས་པའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད།

དེ་ཡང་བཀྲ་ཤིས་ལྷུན་པོའི་མཁན་ཚབ་སྔགས་ཆེན་དར་པ་ཁྲི་ཐུལ་བཀའ་ཆེན་བསྟན་འཛིན་ཚུལ་ཁྲིམས་མཆོག་དང་། དབུ་མཛད་མཁན་ཆེན་འཇམ་དབྱངས་ལགས་དབུ་བཞུགས་ཐོག་པཎ་ཆེན་རིན་པོ་ཆེའི་འཁྲུངས་སྐར་སྲུང་བརྩིའི་མཛད་སྒོ་ཚོགས་ཡོད་པ་དང་། སྐབས་དེར་རྒྱ་གར་ནགས་ཚལ་ལས་ཁུངས་ཀྱི་ལས་བྱེད་ཟུར་པ་ཀི་ཤན་སིངྒ་ (Sh.Kishan Singh Sugara)ལགས་དང་། རང་འབྱུང་གཉེར་སྲུང་བ་དང་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ས་གནས་འབྲེལ་མཐུད་པ་སོམ་ཡ་དཱིབ་དཏྟ་ (Sh.Soumyadeep Dutta) ལགས་ཀྱང་མཉམ་ཞུགས་གནང་ཡོད།

ཀི་ཤན་སིངྒ་ལགས་རང་ཉིད་བོད་མི་གནས་ཡུལ་ས་གནས་ཁག་ཏུ་ལས་དོན་གཉེར་བའི་བརྒྱུད་རིམ་ནང་བོད་མི་དང་གྲོགས་འདྲིས་བྱུང་ཚུལ་དྲན་གསོ་དང་སྦྲགས། བོད་མི་ཚོས་ས་གནས་དེ་དག་རིན་ཐང་ལྡན་པ་བཟོས་པར་བཀའ་དྲིན་རྗེས་དྲན་ཞུས་པ་དང་ཆབས་ཅིག་བོད་མིའི་རང་དབང་གི་འཐབ་རྩོད་ལ་རྒྱ་གར་གྱིས་རྒྱབ་སྐྱོར་མུ་མཐུད་ཞུ་ངེས་ཡིིན་ཞེས་གསུངས། སོམ་ཡ་དིབ་དཏྟ་ལགས་ཨ་སམ་ནས་ཡིན་སྟབས་ཁོང་གིས་པཎ་ཆེན་རིན་པོ་ཆེ་གཙོས་པའི་བོད་ནང་གི་བོད་མིའི་བདེ་དོན་ལ་ཐུགས་འཚབ་ཡོད་སྐོར་དང་། བོད་ནང་རྒྱ་ནག་གཞུང་གིས་ཁོར་ཡུག་གཏོར་སྐྱོན་དང་གཙང་ཆུ་ཁག་སྦག་བཙོག་ཅན་དུ་བསྒྱུར་སྟབས། གཙང་ཆུར་བརྟེན་པའི་མི་མང་སྟོང་ཕྲག་མང་པོའི་འཚོ་བར་དོ་ཕོག་འགྲོ་གི་ཡོད་ཅིང་། དེའི་ཐད་རྒྱ་གར་བྱང་ཤར་ཁུལ་དུ་ཡར་ཀླུང་གཙང་པོའི་ཆེད་ལས་འགུལ་སྤེལ་བཞིན་ཡོད་ལ། དེ་ལ་བརྟེན་ནས་རྒྱ་གར་གཙོ་བོར་གྱུར་པའི་ཨེ་ཤི་ཡའི་ནང་བོད་དོན་ལ་རྒྱབ་སྐྱོར་ཆེ་རུ་འགྲོ་ངེས་ཡིན་པ་གསུངས།

དེ་མཚུངས་ཁོང་གིས་ཨ་སམ་སྐད་ནང་བྲིས་པའི་བོད་དོན་དཔེ་དེབ་ཁག་གཅིག་དང་། ཉེ་ལམ་ནོ་ཝ་ནི་ཏ་ཤར་མ་ (Ms.Novanita Sharma) ལགས་ཀྱིས་ཧིན་བོད་འབྲེལ་ལམ་སྐོར་ཨིན་སྐད་ཐོག་བྲིས་པའི་དཔེ་དེབ་བཅས་ངོ་སྤྲོད་གནང་ཡོད་པ་བཅས།།