༄༅། །ཕྱི་ལོ་ ༢༠༢༣ ཟླ་བ་ ༤ ཚེས་ ༡༢ ཉིན་མའེ་སོར་དུ་རྟེན་གཞི་བྱས་པའི་ཝེ་དྷི་ཡ་ཆེས་མཐོའི་གཙུག་ལག་སློབ་གྲྭ་ཆེན་མོའི་རྒྱ་གར་བོད་རིགས་མཐུན་ཚོགས་དང་བྷེང་ལོར་ལྷོ་སྤྱི་ལས་ཁུངས་གཉིས་ཀྱིས་གོ་སྒྲིག་འོག་ (འཛམ་གླིང་མཐོ་སྒང་གི་ཞབས་བྲོ།) ཞེས་པའི་ཁ་བྱང་ཐོག་ས་ཁུལ་དེ་གའི་རྒྱ་གར་མཐོ་རིམ་སློབ་མ་ཚོར་བོད་ཀྱི་གནའ་བོའི་རིག་གཞུང་ཞབས་བྲོ་དང་བོད་མིའི་ངོ་བོ་གོ་རྟོགས་གང་ལེགས་ཡོང་རྒྱུར་དམིགས་ཏེ་ཝེ་དྷི་ཡ་ཆེས་མཐོའི་གཙུག་ལག་སློབ་གྲྭ་ཆེན་མོའི་ཚོགས་ཁང་ནང་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་བོད་ཆོལ་ཁ་གསུམ་གྱི་ཁྱད་ཆོས་མཚོན་པའི་གནའ་བོའི་གཞས་སྣ་འཁྲབ་སྟོན་གཟིགས་འབུལ་ཞུས་ཡོད།དེ་ཡང་དབུ་འབྱེ་མཛད་སྒོའི་ཐོག་འབུམ་རམས་པ་བེ་ཤ་དྷ་ཤི་བྷི་གྷོ་ཊ་ལགས་དང་སློབ་སྤྱི་གཙོས་པའི་ལས་སྣེ་རྣམ་པ། བྷེང་ལོར་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་བཅས་ཆེད་ཕེབས་གནང་ཞིང་། མཛད་སྒོའི་ཐོག་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་གསུང་བཤད་གནང་བ་དང་བོད་ཀྱི་ཟློས་གར་ཚོགས་པའི་འགན་འཛིན་གྱིས་བོད་ཀྱི་ཟློས་གར་ཚོགས་པ་ངོ་སྤྲོད་གནང་ཡོད།རྒྱ་གར་གྱི་གཟིགས་མོ་བ་ལྔ་བརྒྱ་ལྷག་འདུ་འཛོམས་སར་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་བོད་ཀྱི་ཐུན་མོང་མ་ཡིན་པའི་རིག་གཞུང་གཞས་སྣ་གཟིགས་འབུལ་གཟབ་རྒྱས་ཞུས་རྗེས་རྒྱ་ཆེའི་གཟིགས་མོ་བ་རྣམས་ཀྱིས་དགའ་ཚོར་དཔག་མེད་ཀྱིས་སྐུ་བཞེངས་ཐོག་དགའ་བསུའི་ཐལ་མོ་བརྡབས་ཤིང་། རྒྱ་གར་གཟིགས་མོ་བ་མང་དག་ཅིག་གིས་ད་བར་བོད་ཀྱི་རིག་གཞུང་གཞས་སྣ་ཐེངས་དང་པོ་གཟིགས་སྣང་བྱུང་བ་དེས་གངས་ལྗོངས་མཐོ་སྒང་གི་སྒྱུ་རྩལ་ལ་མངོན་པར་བསྟོད་པ་དང་། རྒྱ་གར་ལྷོ་ཕྱོགས་མའེ་སོར་ཁུལ་དུ་བོད་ཀྱི་ཟློས་གར་ཚོགས་པའི་ད་བར་འཁྲབ་སྟོན་ཐེངས་དང་པོ་ཡིན་པར་སོང་ས་ཁུལ་དེའི་མི་སེར་དང་རྒྱ་གར་བ་ཚོར་བོད་ཀྱི་རིག་གཞུང་ངོ་སྤྲོད་གང་ལེགས་བྱུང་ཡོད་པ་བཅས། །