༄༅། །༸ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༤ ཕེབས་པའི་འཁྲུངས་སྐར་ཉིན་བེལ་ཇམ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཨིལ་ཝན་ཧོབ་ལགས་ (Els Van Hoof) ལགས་དང་། ཚོགས་གཞོན་སེ་མུལ་ཀོ་གོ་ལ་ཊི་ (Samuel Cogolati) ལགས་གཉིས་ནས་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ཞུ་ཕྱོགས་ལ་ཐེ་བྱུས་བྱེད་བཞིན་པར་སྐྱོན་བརྗོད་ཤུགས་ཆེ་གནང་ཡོད།

དེ་ཡང་ཁོང་གཉིས་ཀྱིས་བོད་ཀྱི་ཆོས་ཕྱོགས་ཀྱི་དབུ་ཁྲིད་རྣམ་པའི་ཡང་སྲིད་ངོས་འཛིན་ཞུ་རྒྱུའི་ལམ་སྲོལ་ནི་བོད་བརྒྱུད་ནང་བསྟན་གྱི་ཐུན་མོང་མ་ཡིན་པའི་ལམ་སྲོལ་ཡིན་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ཞུ་རྒྱུ་དེའང་མགོན་པོ་མཆོག་གི་རང་ཆས་སུ་གྲུབ་པའི་སྐུ་དབང་ཡིན་ཞེས་ནན་བརྗོད་དང་སྦྲགས། ༸ཀུན་གཟིགས་པཎ་ཆེན་རིན་པོ་ཆེའི་འཁྲུངས་སྐར་དང་སྟབས་བསྟུན་རྒྱ་ནག་གཞུང་ངོས་ནས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ད་ཆ་གང་དུ་ཡོད་མེད་དང་། ཁོང་གི་གནས་སྟངས་ཇི་ཡོད་དཔང་རྟགས་དང་བཅས་གསལ་བཤད་དགོས་པ་མ་ཟད། ཁོང་དང་ནང་མི་སྐུ་འཁོར་ལྷན་རྒྱས་ཀྱིས་གཙོས་པའི་བོད་མི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་ཞུས་པའི་ཐོག་བོད་མིའི་ཆོས་དང་། རིག་གཞུང་། སྐད་ཡིག་རང་དབང་བཅས་ལ་རྒྱབ་སྐྱོར་ཚད་མཐོ་གནང་ཡོད་པ་བཅས།།