༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲིད་སྐྱོང་ཚོགས་ཁང་དུ་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་བོད་ཀྱི་མ་འོངས་འགན་སྲུང་ཞེས་པ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ནས་དབུ་འབྱེད་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠:༣༠ ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བདེ་སྲུང་བཀའ་བློན་རྒྱ་རི་སྒྲོལ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དེ་བཞིན་དམིགས་བསལ་སྐུ་མགྲོན་དུ་ཨ་རིའི་རོགས་ཚོགས་ (USAID) ཀྱི་རྒྱ་གར་མངའ་ཁུལ་གྱི་ངེས་སྟོན་པ་ལྕམ་སྐུ་ཝི་ན་རེ་ཊི་ (Veena Reddy) ལགས་ཀྱིས་སྣེ་ཁྲིད་པའི་སྐུ་ཚབ་ཚོགས་ཆུང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་གཙོས་པའི་སྲི་ཞུའི་ལས་བྱེད་རྣམ་པ། གཞན་ཡང་བཞུགས་སྒར་གནས་འཁོད་རོགས་ཚོགས་ཁག་གི་སྐུ་ཚབ། གསར་འགོད་པ་བཅས་ལྷན་འཛོམས་ཐོག་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་བོད་ཀྱི་མ་འོངས་འགན་སྲུང་ཞེས་པ་དབུ་འབྱེད་དང་འབྲེལ་དཔལ་ལྡན་སྲིད་སྐྱོང་མཆོག་གིས་ཡིག་ཆ་དེ་ཉིད་འགྲེལ་བརྗོད་གནང་ཡོད་པ་རེད།
བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆ་དབུ་འབྱེད་སྐབས་དཔལ་ལྡན་སྲིད་སྐྱོང་མཆོག་གིས་དེ་སྔོན་འོས་བསྡུའི་སྐབས་དམ་བཅས་པ་བཞིན་འདས་པའི་ལོ་ངོ་གཉིས་རིང་འཆར་གཞི་འཆར་འགོད་ཀྱིས་བོད་ཀྱི་མ་འོངས་འགན་སྲུང་ཆེད་ཕུགས་དམིགས་ཡིག་ཆ་ཞིག་བཟོ་ཐུབ་པ་བྱུང་ཡོད་ཅིང་། ཡིག་ཆ་དེ་ཉིད་རྩ་འཛིན་ལམ་སྟོན་དུ་བཟུང་ནས་སྲི་ཞུའི་ལས་བྱེད་ཡིན་ནོ་ཅོག་ནས་ལྟ་ཀློག་བྱེད་དགོས་ཞེས་དང་།
དེ་བཞིན་ལས་གཞི་རྣམས་ལག་བསྟར་བྱེད་མཁན་སྲི་ཞུའི་ལས་བྱེད་རྣམས་ཡིན་སྟབས་འགོ་ལས་ཚང་མའི་བསམ་བློ་དང་ལས་དོན་བྱེད་ཕྱོགས་གཅིག་མཐུན་དགོས་སྐོར་ལམ་སྟོན་གནང་ཡོད། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས། ངས་ཉེ་ལམ་ཕྱི་ཟླ་གསུམ་པའི་གྲོས་ཚོགས་ནང་ཞུས་ཟིན་པ་ལྟར། ད་ནི་འཛིན་སྐྱོང་ཁྱོན་ཡོངས་ནས་ལས་དོན་ཕུགས་འཕེར་ཡོང་བར་འབད་རྩོལ་ཞུ་དགོས། དེའི་ཆེད་ང་ཚོས་ཐབས་ལམ་བཟང་ཤོས་གང་བསྟེན་དགོས་སམ། ལས་གཞི་སྤུས་ཚད་ལྡན་པ་ཇི་ལྟར་སྒྲུབ་དགོས་སམ། ལས་གཞི་དུས་ཡུན་ནང་ཚར་བ་ཇི་ལྟར་བྱེད་རྒྱུ་ཡིན་ནམ། དེ་བཞིན་ལས་གཞི་ཁག་ལ་དུས་ནས་དུས་སུ་ལྟ་ཞིབ་བྱེད་ཀྱི་ཡོད་དམ། ལས་གཞིའི་ནང་དོན་མི་མང་ལ་ཕྱི་གསལ་ནང་གསལ་ཇི་ལྟར་བཟོ་རྒྱུ་ཡིན་ནམ། ཕྱི་གསལ་ནང་གསལ་ནི་མང་གཙོའི་གཞི་རྟེན་ཡིན་པ་ལྟར། ང་ཚོའི་ལས་དོན་ཚང་མ་ཕྱི་གསལ་ནང་གསལ་དགོས། ཞེས་གསུངས།
དེ་མཚུངས་ཁོང་གིས་སྲི་ཞུའི་ལས་བྱེད་རྣམས་ནས་ཡིག་ཆར་ལྟ་ཀློག་བྱས་ཏེ་བོད་མིའི་སྒྲིག་འཛུགས་ཀྱི་སྤྱི་ཡོངས་གནས་སྟངས་ཤེས་རྟོགས་དང་། བྱེ་བྲག་ཏུ་བཀའ་ཤག་གི་དགོངས་གཞི་ཇི་ཡིན་རྟོགས་པའི་ཐོག་མདུན་སྐྱོད་དགོས་པའི་རེ་སྐུལ་གནང་ཡོད་པ་རེད།
དེ་རྗེས་ཨ་རིའི་རོགས་ཚོགས་ཀྱི་རྒྱ་གར་མངའ་ཁུལ་གྱི་ངེས་སྟོན་པ་ལྕམ་སྐུ་ཝི་ན་རེ་ཊི་ལགས་ཀྱིས་གསུང་བཤད་གནང་སྐབས་རྒྱ་བལ་འབྲུག་གསུམ་ནང་ཡོད་པའི་བཙན་བྱོལ་བོད་མིའི་སྤྱི་ཚོགས་རང་ཁ་རང་གསོ་ཐུབ་པར་བོད་མིའི་སྒྲིག་འཛུགས་དང་བོད་མི་ལྷན་མཉམ་ལས་བྱེད་རྒྱུ་བྱུང་བར་དགའ་སྤོབས་ཡོད་ཅེས་དང་། ཨ་རི་གཞུང་ངོས་ནས་བོད་མིའི་འགྲོ་བ་མིའི་ཐོབ་ཐང་དང་། ཆེ་མཐོང་། བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་རྒྱབ་སྐྱོར་མུ་མཐུད་གནང་མུས་ཡིན་པ་དང་། ལྷག་པར་ཨ་རིའི་གཞུང་གི་ཕྱི་འབྲེལ་སྲིད་བྱུས་ནང་འགྲོ་བ་མིའི་ཐོབ་ཐང་གི་གནད་དོན་གཙིགས་ཆེར་བརྩི་བཞིན་པའི་སྐོར་ངོ་སྤྲོད་གནང་ཡོད།
དེ་བཞིན་ཁོང་མོས། ང་ཚོས་སྲིད་གཞུང་ངམ་ཚོགས་སྡེ། སྤྱི་ཚོགས་ཤིག་གིས་གཞི་རྩའི་རང་དབང་དང་། མཉམ་འདུས། ཕྱི་གསལ་ནང་གསལ། ཁྲིམས་ཀྱི་དབང་བསྒྱུར་ལ་བརྩི་བཀུར་བྱེད་ན། དེ་ཉིད་དབང་འབྱོར་ཆེ་ཞིང་། གཞི་རྩ་བརྟན་པ་མ་ཟད། དེས་འཛམ་གླིང་སྤྱི་ཡོངས་ཀྱི་ཞི་བདེ་དང་འཆམ་མཐུན་ལ་ཞབས་འདེགས་ཞུ་ཐུབ་ངེས་ཡིན་པར་ངོས་འཛིན་བྱེད་ཀྱི་ཡོད། རྒྱུ་མཚན་དེ་དག་ལ་བརྟེན་ནས་དེ་རིང་ང་ཚོ་འདིར་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་དབུ་འབྱེད་ལ་བཅར་བ་ཡིན་ཞེས་དང་།
གཞན་ཡང་དེ་ལས་འཕྲོས་ཏེ་ཁོང་མོས་བཙན་བྱོལ་བོད་མིའི་སྤྱི་ཚོགས་ཀྱི་མཉམ་འདུས་རང་བཞིན་དང་། བོད་མིའི་སྒྲིག་འཛུགས་ཀྱི་དྲྭ་ཐོག་འཛིན་སྐྱོང་ལས་གཞི་སོགས་ལ་བསྔགས་བརྗོད་གནང་ཡོད།
ཕུགས་དམིགས་ཡིག་ཆའི་ནང་གཙོ་བོ་དབུ་མའི་ལམ་བརྒྱུད་བོད་དོན་བདེན་མཐའ་གསལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་ལྟ་སྐྱོང་། བོད་མིའི་སྒྲིག་འཛུགས་ཀྱི་ནུས་ཤུགས་གོང་སྤེལ་གཏོང་ཕྱོགས་ཀྱི་འཆར་གཞི་ལས་དོན་ཁག་དང་། དེ་དག་གནད་སྨིན་སྒྲུབ་ཐབས་ཇི་ཡོད་གསེད་བཀྲོལ་གནང་ཡོད་པ་རེད། ཕུགས་དམིགས་ཡིག་ཆ་དབུ་འབྱེད་ཐོག་སྐུ་ཚབ་དོན་གཅོད་རྣམ་པ་དང་ལས་བྱེད། ས་གནས་འགོ་འཛིན་ལས་ཁུངས་ཁག་གི་འགོ་ལས་རྣམས་ཀྱང་དྲྭ་ཐོག་ནས་མཉམ་ཞུགས་གནང་ཡོད་པ་བཅས། །
བོད་ཀྱི་མ་འོངས་འགན་སྲུང་། ཕུགས་དམིགས་ཡིག་ཆ།
བོད་ཀྱི་མ་འོངས་འགན་སྲུང་། ཕུགས་དམིགས་ཡིག་ཆ། (ཁོལ་ཕྱུང་། )
