༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༠༣ ཉིན་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ཏཱ་ལའི་བླ་མ་མཐོ་སློབ་ཀྱི་རིགས་སྡེ་འགན་འཛིན་ངག་དབང་རྒྱ་མཚོ་ལགས། (Orbit Future Academy) ཞེས་པའི་བསྟི་གནས་ཁང་གི་སུ་ནིལ་གྷི་རི་དྷར་ལགས་གཙོ་བཞུགས་ཐོག་ཏཱ་ལའི་བླ་མ་མཐོ་སློབ་ཀྱི་ཚོགས་ཁང་དུ་ (Full Stack Application Development and Certificate Course in Digital Marketing and Graphic Designing) ཞེས་པའི་གཙུག་ལག་རབ་འབྱམས་པའི་དམིགས་བསལ་ལག་ཁྱེར་སློབ་ཚན་དབུ་འབྱེད་གནང་ཡོད།

དམིགས་བསལ་སློབ་ཚན་དེ་ཉིད་ཨ་རིའི་རོགས་ཚོགས་ (USAID) བརྒྱུད་བོད་ཀྱི་ཐེབས་རྩས་མཐུན་འགྱུར་སྦྱར་གནང་ཡོད་ཅིང་། དུས་ཡུན་ཟླ་བ་དགུའི་སློབ་ཡུན་ནང་སློབ་གཉེར་བ་ ༡༩ ཡིས་ (FSAD) དང་། སློབ་གཉེར་བ་ ༣༨ ནས་ཡིག་རིས་བྱུས་འགོད་ (graphic design) སློབ་ཚན་ལ་སློབ་འཇུག་བྱས་ཡོད་པ་རེད། དེ་ཡང་དབུ་འབྱེད་མཛད་སྒོའི་ཐོག་མར་ཏཱ་ལའི་བླ་མ་མཐོ་སློབ་ཀྱི་རིགས་སྡེ་འགན་འཛིན་ངག་དབང་རྒྱ་མཚོ་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་འབྲེལ་ད་ལྟའི་དུས་སུ་གནས་ཚུལ་ཇི་ཡོད་གྲངས་མཛོད་ནང་བླུགས་རྒྱུ་གལ་ཆེན་པོ་ཡིན་སྐོར་ངོ་སྤྲོད་དང་། དེ་བཞིན་ཏཱ་ལའི་བླ་མ་མཐོ་སློབ་ཀྱི་སྒྲོམ་གཞི། དམིགས་ཡུལ། ལས་དོན་བྱེད་ཕྱོགས་སོགས་ཀྱི་སྐོར་འགྲེལ་བརྗོད་གནང་། དེ་ནས་ (Orbit Future Academy) ཞེས་པའི་བསྟི་གནས་ཁང་གི་སུ་ནིལ་གྷི་རི་དྷར་ལགས་ཀྱིས་བསླབ་གཞི་དང་དགེ་རྒན་ངོ་སྤྲོད་གནང་བ་དང་ཆབས་ཅིག་སློབ་གཉེར་བ་རྣམས་ནས་འཛིན་གྲྭའི་ནང་དོ་སྣང་གནང་དགོས་པའི་འབོད་སྐུལ་ཞུས་ཡོད།

ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་སློབ་གཉེར་བ་རྣམས་ལ་ལས་འགན་འཕར་མ་ཡོད་པ་དྲན་གསོ་གནང་བ་དང་སྦྲགས། སློབ་ཡུན་རིང་མཐུན་རྐྱེན་རྣམས་ཆུད་ཟོས་སུ་མ་སོང་བར་བེད་སྤྱོད་བྱེད་དགོས་པའི་རེ་སྐུལ་གནང་། དེ་བཞིན་ཁོང་གིས་བྱེས་འབྱོར་བོད་མིའི་ལས་འགན་དང་། གཞིས་བཞུགས་བོད་མིའི་མངོན་འདོད་དང་རེ་བའི་སྐོར་ངོ་སྤྲོད་གནང་བ་དང་ལྷན་ཅིག་བོད་དང་ཀརནཱ་ཊཀ་མངའ་སྡེ་བར་གྱི་འབྲེལ་ལམ་སྐོར་གསལ་བརྗོད་གནང་ཡོད་པ་རེད།

མཐའ་དོན་དྲུང་ཡིག་ཀུན་དགའ་དོན་ལྡན་ལགས་ཀྱིས་ཐུགས་རྗེ་ལེགས་འབུལ་གྱི་གཏམ་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་བཅས།།