༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༢༠ ཉིན་ཇར་མན་གཞུང་དང་། ཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་དང་འགྲོ་བ་མིའི་བདེ་རྩའི་རོགས་ཚོགས་ལས་དོན་ཚོགས་ཆུང་བར་ཚོགས་འདུ་བསྐོང་ཚོགས་ཀྱིས་བོད་ནང་གི་ཛ་དྲག་གནས་སྟངས་ལ་ཐུགས་འཚབ་དང་། རྒྱལ་ཚོགས་ཀྱི་ཆེད་མཁས་པའི་རེ་སྐུལ་གཞིར་བཟུང་བོད་ནང་དུ་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཕྱིར་བསྡུ་དང་། བཙན་པོ་དབང་ཡོད་ཀྱིས་བོད་མི་རྣམས་གནས་སྤོ་བྱེད་བཞིན་པ་མཚམས་འཇོག་དགོས་པའི་སྐུལ་དེད་གནང་ཡོད།
དེ་ཡང་ཇར་མན་གཞུང་གི་ཕྱི་སྲིད་ལས་ཁུངས་ཀྱི་སྐུ་ཚབ་ནས་བོད་ནང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་རྩིས་མེད་གཏོང་བཞིན་པར་ཐུགས་འཚབ་དང་བཅས་ཉེ་ལམ་རྒྱལ་ཚོགས་ཀྱི་ཆེད་མཁས་པ་རྣམས་ནས་བཏོན་པའི་བོད་ནང་གི་ཛ་དྲག་གནས་སྟངས་མངོན་པར་གསལ་བའི་སྙན་ཐོར་རྒྱབ་སྐྱོར་ཞུས་ཐོག་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཕྱིར་བསྡུ་དང་། བོད་མི་རྣམས་རང་ཉིད་ཀྱི་སྡོད་གནས་ནས་བཙན་པོས་གནས་སྤོ་བྱེད་བཞིན་པ་མཚམས་འཇོག་དགོས་པའི་རེ་སྐུལ་གནང་ཡོད། དེ་བཞིན་ཁོང་གིས་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་ཆོས་དང་རིག་གཞུང་སྐད་ཡིག་བཅས་པ་སིམ་ཡལ་གཏོང་ཐབས་རྩོམ་བཞིན་པའི་སྐོར་གསལ་བཤད་གནང་ཡོད་པ་དང་། དེ་མཚུངས་ཁོང་གིས་ཇར་མན་གཞུང་གིས་རྒྱ་ནག་གཞུང་ནས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྣང་མེད་གཏོང་རྒྱུ་མིན་པའི་ནན་བརྗོད་གནང་ཡོད་པ་རེད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཇར་མན་གཞུང་ནས་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཐད་བཞེངས་ཕྱོགས་བརྟན་པོ་བཟུང་བར་དགའ་བསུའི་བསྔགས་བརྗོད་དང་སྦྲགས། ཇར་མན་གཞུང་གི་གནང་སྒོ་དེས་ཡུ་རོབ་ཁྱོན་ཡོངས་ལ་བོད་ཀྱི་ཛ་དྲག་གནས་སྟངས་ལ་སྣང་མེད་གཏོང་རྒྱུ་མེད་པའི་བརྡ་ལན་གསལ་པོ་སྤྲད་ཡོད་ཅེས་དང་། དེ་བཞིན་ཁོང་མོས་རྒྱ་ནག་གཞུང་གི་ངོས་ནས་རྒྱལ་སྤྱིའི་བརྡ་ལན་ཁག་ལ་ཡ་ལན་ཞུས་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་ཁུར་ཁག་ལ་བརྩི་བཀུར་ཞུ་དགོས་པའི་རེ་སྐུལ་གནང་ཡོད་པ་བཅས།།
