༄༅། །ཕྱི་ལོ་ ༢༠༢༣ ཟླ་བ་ ༠༤ ཚེས་ ༢༢ ནས་ ༢༤ བར་ཉིན་གྲངས་གསུམ་རིང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་གོ་སྒྲིག་འོག་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཡུ་རོབ་ཁུལ་གྱི་བོད་དོན་རྒྱབ་སྐྱོར་ཚོགས་པའི་ས་གནས་ཚོགས་འདུ་བསྐོང་ཚོགས་གནང་ཡོད་པ་རེད།

དེ་ཡང་ཚོགས་འདུའི་ཐོག་གཙོ་བོ་བོད་དོན་ཞུ་གཏུག་གོང་འཕེལ་གཏོང་ཕྱོགས་དང་། བོད་དོན་རྒྱབ་སྐྱོར་ཚོགས་པ་ཁག་གི་ནུས་ཤུགས་གོང་འཕེལ་གཏོང་ཕྱོགས་མཚོན་པའི་གནད་དོན་ཁག་གཅིག་སྐོར་བགྲོ་གླེང་ཞིབ་ལྷུག་གནང་ཡོད། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་བོད་མིའི་སྒྲིག་འཛུགས་ཀྱི་སྤྱི་ཡོངས་སྒྲོམ་གཞི་དང་། དམིགས་ཡུལ་གཙོ་བོ་གཉིས་ངོ་སྤྲོད་དང་འབྲེལ། བོད་མིའི་སྒྲིག་འཛུགས་ནས་ཡུ་རོབ་ཁུལ་དེ་གལ་གནད་ཆེན་པོར་བརྩིས་པའི་ཐོག་བོད་དོན་ཞུ་གཏུག་ལས་འགུལ་སྤེལ་བཞིན་པའི་སྐོར་འགྲེལ་བརྗོད་གནང་ཡོད་པ་རེད།

གཞན་ཡང་ཚོགས་འདུའི་བཞུགས་མོལ་བགྲོ་གླེང་པའི་ཁོངས་སུ་བོད་ཀྱི་ཁྲིམས་དོན་གནས་བབ་ཐོག་མཁས་པ་སྐུ་ཞབས་མཧི་ཀལ་ཝན་ཝལ་ཝན་པ་རག་ (Michael Van Walt) ལགས་དང་། བོད་དོན་ཞུ་གཏུག་མཉམ་འབྲེལ་གྱི་འབྲེལ་མཐུད་པ་གོ་ལོ་རི་ཡ་མོན་གོ་མེ་རི་ (Gloria Montgomery) ལགས་མཉམ་ཞུགས་གནང་ཡོད་པ་ལྟར། ཡུ་རོབ་རྒྱལ་ཁབ་བཅུ་བཞི་ནས་ཕེབས་པའི་ཚོགས་བཅར་བ་རྣམས་ནས་ཁོང་རྣམས་དང་ལྷན་དུ་གྲོས་མོལ་ལྷུག་པོ་གནང་ཡོད། ཅེག་སྤྱི་མཐུན་རྒྱལ་ཁབ་ཏུ་ཕེབས་པ་དང་སྟབས་བསྟུན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་པྲེམ་སལ་རཱ་བ་སི་ (Premysl Rabas) ལགས་དང་མཇལ་འཕྲད་གནང་སྟེ་འབྱུང་འགྱུར་ལས་དོན་རྩོམ་ཕྱོགས་སོགས་ཀྱི་ཐད་གྲོས་མོལ་གནང་ཡོད་པ་མ་ཟད། དེ་མཚུངས་འབྲེལ་ཡོད་ཁག་གཅིག་དང་ལྷན་མཇལ་མོལ་གནང་ཡོད་པ་བཅས།།