༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༣༠ ཉིན་༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་སུད་སིར་ཞབས་སོར་བདེ་བར་འཁོད་པ་ལྟར། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། སུད་སི་དང་ལེག་ཊིན་ཚིན་བོད་རིགས་ཚོགས་པའི་ཚོགས་གཙོ་ཚོགས་གཞོན་གཙོས་པའི་ས་གནས་བོད་མི་རྣམས་ནས་ཕེབས་བསུ་གཟབ་རྒྱས་ཞུས་ཡོད་པ་རེད།
དེ་ཡང་སུད་སི་དང་ལེག་ཊིན་ཚིན་བོད་རིགས་མི་མང་གི་གསོལ་འདེབས་ཞུས་དོན་བཞིན་༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་ཕྱི་ལོ་ ༢༠༢༣ ཟླ་བ་ ༠༤ ཚེས་ ༠༡ ཉིན་དད་ལྡན་ཆོས་ཞུ་བ་བརྒྱ་ཕྲག་བརྒལ་བར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་། དམ་ཚིག་རྡོ་རྗེའི་བཟླས་པའི་ལུང་། ཉིན་རྒྱབ་སངས་རྒྱས་སྨན་བླའི་རྗེས་གནང་དང་། མི་མང་ལ་བླང་དོར་བཀའ་སློབ་བཀའ་དྲིན་སྩལ་ཡོད་ཅིང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཆེད་བཅར་གྱིས་༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་ལ་མཎྚལ་རྟེན་གསུམ་འདེགས་འབུལ་ཞུས་ཡོད་པ་རེད།
ཕྱི་ཚེས་ ༠༢ ཉིན་༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་ཛུ་རིག་གཙུག་ལག་སློབ་གཉེར་ཁང་དུ་ཡུ་རོབ་བོད་ཀྱི་གཞོན་ནུ་ཚོགས་པ་དང་། སུད་སིའི་བོད་ཕྲུག་མཐུན་ཚོགས་གཉིས་ནས་ཇི་ལྟར་གསོལ་བ་བཏབ་པར་ལྟར་བོད་ཕྲུག་རྣམས་ལ་བླང་དོར་བཀའ་སློབ་བཀའ་དྲིན་སྩལ་ཞིང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། སུད་སི་དང་ལེག་ཊིན་ཚིན་བོད་རིགས་ཚོགས་པའི་ཚོགས་གཙོ་ལྷན་བཅར་ཞུས་ཡོད། བོད་རིགས་གཞོན་སྐྱེས་རྣམས་ལ་བཀའ་སློབ་སྩལ་སྐབས་རིན་པོ་ཆེ་མཆོག་གིས་བོད་ཀྱི་ཆོས་དང་། རིག་གཞུང་། སྐད་ཡིག་ནི་རིན་ཐང་བྲལ་བའི་གཅེས་ནོར་ཡིན་པ་ཤེས་རྟོགས་དགོས་གལ་སྐོར་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ཇི་ཕེབས་རྣམས་ཉིན་རེའི་འཚོ་བའི་ཁྲོད་ལག་ལེན་བསྟར་གལ་ཆེ་བའི་སྐོར་ལམ་སྟོན་གནང་ཡོད།
དེ་རྗེས་༸སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་ས་གནས་བོད་མིའི་ལས་ཀྱི་སྣེ་མོ་བ་དང་ལྷན་ཐུག་འཕྲད་གནང་སྟེ་སུད་སི་ཁུལ་གྱི་མཛད་འཆར་ལེགས་པར་གྲུབ་ཡོད། སུད་སི་ཁུལ་གྱི་མཛད་འཆར་ཁག་ལེགས་གྲུབ་བྱུང་མཚམས་རིན་པོ་ཆེ་མཆོག་ཨོསྟྲི་ཡཱ་དང་། ཇར་མ་ནཱི། སི་པན། ཕ་རཱན་སི་བཅས་སུ་ཞབས་སོར་འཁོད་འཆར་ཡོད་པ་བཅས།། 
