༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༢༦ ཉིན་ཨོསྟྲེ་ལི་ཡཱའི་སྐུ་ཚབ་དོན་ཁང་གི་གོ་སྒྲིག་འོག་ཨོསྟྲེ་ལི་ཡའི་སིཊ་ནི་གྲོང་ཁྱེར་དུ་ཨོསྟྲེ་ལི་ཡཱའི་ཁུལ་གྱི་བོད་བརྒྱུད་ནང་བསྟན་ཆོས་ཚོགས་ཁག་གི་ཚོགས་འདུ་བསྐོང་ཚོགས་གནང་ཡོད་པ་རེད།
དེ་ཡང་ཚོགས་འདུའི་ཐོག་ཆོས་ཚོགས་ཁག་གི་སྐུ་ཚབ་དང་། དགེ་རྒན་དགེ་ཕྲུག་བརྒྱ་ལྷག་མཉམ་ཞུགས་གནང་ཡོད་ཅིང་། ཐེངས་འདིའི་ཚོགས་འདུའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་བཀའ་དྲིན་སྩལ་བའི་ནང་། ཨོསྟྲེ་ལི་ཡཱ་ནང་ཡོད་པའི་ནང་པ་གཞན་རྣམས་ལ་སྟོན་པ་གཅིག་གི་རྗེས་འཇུག་གི་འདུ་ཤེས་བཟུང་སྟེ་འཆམ་མཐུན་དགོས་སྐོར་དང་། དད་པ་ཁོ་ན་མིན་པར་སྟོན་པའི་ལུང་རྟོགས་ཀྱི་བསྟན་པར་སློབ་གཉེར་གནང་སྟེ་དུས་རབས་ཉེར་གཅིག་པའི་ནང་པ་བྱེད་དགོས་པ། དེ་བཞིན་བྱམས་སྙིང་རྗེ་གཞི་རྩར་བཟུང་བའི་བོད་བརྒྱུད་ནང་བསྟན་འཛམ་གླིང་ཁྱོན་ཡོངས་སུ་དར་འཕེལ་ཕྱིན་ཏེ་འགྲོ་བ་མི་རིགས་ཀྱི་གཏེར་མཛོད་ལྟ་བུར་གྱུར་ཟིན་པའི་སྐོར། དེ་ལྟར་འཚེ་བ་དང་མཚོན་ཆ་མེད་པའི་ཞི་བདེའི་འཛམ་གླིང་ཞིག་སྐྲུན་པར་འབད་རྩོལ་དགོས་པའི་བཀའ་སྩལ་གནང་ཡོད་པ་རེད།
ཕྱོགས་མཚུངས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་འདུ་དང་འབྲེལ་ཏེ་བརྙན་བརྒྱུད་ཚོགས་བཅར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་བཞི་དང་། སྤྱི་ཚོགས་དང་ཚོར་ཤེས། བཟང་སྤྱོད་ཀྱི་སློབ་གསོ། སཱི་ཤེས་ཡོན་ (SEE Lerning ) སློབ་གསོའི་གལ་གནད་དང་། ཨོསྟྲེ་ལི་ཡཱའི་ཁུལ་དུ་ཡོད་པའི་བོད་བརྒྱུད་ནང་བསྟན་གྱི་ཆོས་ཚོགས་ཁག་གིས་སཱི་ཤེས་ཡོན་སློབ་གསོ་ས་གནས་ཀྱི་སློབ་གྲྭ་ཁག་གི་བསླབ་གཞིར་འཚུད་ཐབས་ཆེད་འབད་རྩོལ་གནང་དགོས་སྐོར་ལམ་སྟོན་གནང་ཡོད་པ་རེད།
གཞན་ཡང་ཚོགས་འདུའི་ཐོག་བོད་དོན་རྒྱབ་སྐྱོར་བ་དང་ཨོསྟྲེ་ལི་ཡཱའི་གྲོས་ཚོགས་འཐུས་མི་ཇེ་ནིཊ་ར་ཧི་སི་ (Janet Rice) མཆོག་གིས་སྒྲ་འཇུག་གསུང་འཕྲིན་ཞིག་གནང་ཡོད་ཅིང་། སྐབས་དེར་ཁོང་མོས་རྒྱལ་སྤྱིའི་མི་མང་ནས་བོད་ཀྱི་རིག་གཞུང་དང་བོད་བརྒྱུད་ནང་བསྟན་དེ་ཉིད་རྒྱ་ནག་དམར་ཤོག་གཞུང་གི་དབང་བསྒྱུར་འོག་རྩ་མེད་གཏོང་འཇུག་རྒྱུ་མེད་པ་དང་། དེའི་ཐད་ཁོང་མོས་མུ་མཐུད་འབད་རྩོལ་གནང་རྒྱུ་མ་ཟད། ཨོསྟྲེ་ལི་ཡཱའི་གཞུང་ནས་རྒྱ་ནག་གཞུང་གི་བོད་བརྒྱུད་ནང་བསྟན་ལ་ཐེ་བྱུས་བྱེད་པར་ངོ་རྒོལ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་བོད་བརྒྱུད་ནང་བསྟན་གཞིར་བཟུང་བདམས་པ་ཁོ་ནར་ངོས་འཛིན་གནང་དགོས་པའི་འབོད་སྐུལ་ཞུ་རྒྱུ་ཡིན་སྐོར་གསུངས། སྐབས་དེར་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ནས་ཀྱང་བརྙན་བརྒྱུད་གསུང་བཤད་གནང་ཡོད་པ་རེད།
ཚོགས་འདུའི་དབུ་འབྱེད་མཛད་སྒོའི་ཐོག་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་འབྲེལ་ཚོགས་འདུའི་དགོས་དམིགས་དང་། རྒྱ་ནག་གཞུང་གིས་བོད་བརྒྱུད་ནང་བསྟན་ལ་ཐེ་བྱུས་དམ་བསྒྲགས་ཤུགས་ཆེར་བཏང་བར་བརྟེན་ཉེན་ཁའི་གནས་སུ་ལྷུང་ཡོད་སྐོར་ངོ་སྤྲོད་གནང་གྲུབ་རྗེས་སྐུ་མགྲོན་གཙོ་བོ་ཨོསྟྲེ་ལི་ཡཱ་ནང་པའི་ལྷན་ཚོགས་ཀྱི་ཚོགས་གཙོ་གྷ་ཝི་ནི་པོ་ཝེལ་ (Gawaine Powell Davies) ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨོསྟྲེ་ལི་ཡཱའི་ཆོས་ལུགས་རིས་མེད་ཀྱི་མི་མང་གིས་བརྩི་བཀུར་ཆེན་པོ་ཞུ་བཞིན་ཡོད་ཅེས་དང་། དེ་བཞིན་བོད་ནང་རང་དབང་དང་། ལྷག་པར་ཆོས་དད་རང་དབང་མེད་པ་ནི་བློ་འཚབ་སྐྱེ་གཞི་ཡིན་ཞིང་། བྱེ་བྲག་ཏུ་རྒྱ་ནག་གཞུང་གིས་བོད་བརྒྱུད་ནང་བསྟན་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱེད་བཞིན་པར་བློ་འཚབ་ཆེན་པོ་ཡོད་ཅེས་གསུངས། ཕྱོགས་མཚུངས་ཏཱ་ར་ཆོས་ཚོགས་ཀྱི་དགེ་བཤེས་བློ་བཟང་ལགས་དང་། སྤྱི་ཟུར་གདོང་འདུས་སྐྱིད་འཛོམས་ལགས་ནས་ཀྱང་གསུང་བཤད་གནང་ཡོད་པ་རེད།
སྔ་དྲོ་ལས་རིམ་གྲུབ་མཚམས་ཁང་དམར་བསམ་གྲུབ་གླིང་གི་མཁན་ཟུར་བཀྲ་ཤིས་ཚེ་རིང་ལགས་དང་། ཏ་ས་མ་ནི་ཡ་གཙུག་ལག་སློབ་གཉེར་ཁང་གི་འབུམ་རམས་པ་ཨ་ན་ཨ་ལོ་མེ་སི་ (Dr Anna Alomes) ལགས། ཨི་ཡན་གི་རིན་ (Ian Green) ལགས་གཙོས་པའི་ཆེད་མཁས་པ་རྣམས་ནས་དེང་གི་དཀའ་ངལ་ཆེ་བའི་དུས་རབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་གལ་གནད་ཆེན་པོ་ཆགས་ཚུལ་སྐོར་བགྲོ་གླེང་གནང་།
མོ་ན་ཤི་གཙུག་ལག་སློབ་གཉེར་ཁང་གི་མཁས་པ་དང་ཉམས་ཞིབ་པ་ཨི་ཧན་ཀོ་ཧན་ (Dr Ian Coghlan) ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་དང་ཚན་རིག་བར་གྱི་བགྲོ་གླེང་ཐད་ཞབས་འདེགས་སྒྲུབ་ཚུལ་ངོ་སྤྲོད་དང་། ས་སྐྱ་བློ་གསལ་ཆོས་རྫོང་གི་བླ་མ་ཆོས་གྲགས་ལགས་ཀྱིས་ལས་རིམ་གཙོ་སྐྱོང་གནང་ཡོད།
ཚོགས་ཐུན་གཉིས་པ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱི་གཙོ་སྐྱོང་འོག་བོད་ནང་ཆོས་དད་རང་དབང་སྲུང་སྐྱོབ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་སྐོར་བགྲོ་གླེང་གནང་། བགྲོ་གླེང་པའི་ཁོངས་སུ་གཙུག་ལག་སློབ་དཔོན་ཆོང་གྱི་ཕང་ (Professor Chongyi Feng) ལགས་དང་། སྤྱི་ཟུར་གདོང་འདུས་སྐྱིད་འཛོམས་ལགས། ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་འཛིན་སྐྱོང་འགན་འཛིན་ཛོ་བྷེ་ཕོཊ་ (Dr Zoe Bedford) ལགས་ཡོད་པ་རེད།
ཉིན་རྒྱབ་ལ་སྒྲོལ་དཀར་ཆོས་ཚོགས་ཀྱི་དགེ་བཤེས་བསོད་ནམས་དར་རྒྱས་ལགས་དང་། སིཊ་ནིའི་གསང་སྔགས་རྡོ་རྗེ་ཐེག་པའི་ཆོས་ཚོགས་ཀྱི་ངེས་སྟོན་པ་ཀྲོ་ནི་ཨིས་ཀྲིལ་(Tony Steel)ལགས་ཀྱི་གཙོ་སྐྱོང་འོག་ཆོས་ཚོགས་ཕན་ཚུན་བར་འབྲེལ་ལམ་གོང་འཕེལ་དང་། ཆོས་ཚོགས་ཁག་སྲ་བརྟན་གཏོང་སླད་ཚོགས་བཅར་བ་ནང་ཁུལ་བསམ་ཚུལ་བརྗེ་ལེན་གནང་ཡོད།
མཐའ་དོན་ཨོསྟྲེ་ལི་ཡཱ་བོད་རིགས་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས་ཀྱིས་མཇུག་སྡོམ་གསུང་བཤད་དང་། དོན་ཁང་གི་དྲུང་ཆེ་ལྷ་དབང་རྒྱལ་པོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་རེད།
ཚོགས་འདུའི་མཇུག་ཏུ་དེ་འབྲེལ་བསྒྲགས་གཏམ་ཞིག་སྤེལ་ཡོད་པ་གཤམ་གསལ།
༡) སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་སྟེ། འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་སྒྲིལ་གོང་སྤེལ། བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་བཅས་ཀྱི་གལ་གནད་ངོས་འཛིན་ཞུ་རྒྱུ།
༢) རྒྱ་ནག་གི་དབང་བསྒྱུར་འོག་ཉེན་ཁ་འཕྲད་བཞིན་པའི་བོད་བརྒྱུད་ནང་བསྟན་རྒྱུན་འཛིན་དར་འཕེལ་གཏང་རྒྱུ་དང་། མི་སྒེར་དང་སྤྱི་ཚོགས། དེ་བཞིན་འཛམ་གླིང་ཁྱོན་ཡོངས་ལ་ཕན་པའི་འགྲོ་བ་མིའི་རིན་ཐང་གོང་མཐོར་སླད་འབད་བརྩོན་བྱེད་རྒྱུ།
༣) འགྲོ་བ་མིའི་རིན་ཐང་གོང་སྤེལ་སླད་ཆོས་ལུགས་གཞན་ཉམས་ལེན་གནང་མཁན་སྤྱི་ཚོགས་དང་ལྷན་འབྲེལ་ལམ་འཛུགས་རྒྱུ།
༤) འཛམ་གླིང་སྤྱི་དང་ཨོསྟྲེ་ལི་ཡཱ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ཞི་བདེ་དང་སྙིང་རྗེ། འཚེ་བ་མེད་པའི་དབུ་ཁྲིད་ཅིག་ཏུ་ངོས་འཛིན་ཞུ་རྒྱུ།
༥) བོད་ནང་ཆོས་དད་རང་དབང་རྡོག་རོལ་དང་བོད་ཀྱི་རིག་གཞུང་རྒྱ་ནག་ཅན་དུ་སིམ་ཡལ་གཏོང་བཞིན་པར་བློ་འཚབ་བསྟན་རྒྱུ།
༦) བོད་བརྒྱུད་ནང་བསྟན་གྱི་བླ་སྤྲུལ་རྣམ་པའི་ཡང་སྲིད་ངོས་འཛིན་དང་། ཐོས་བསམ་སློབ་གཉེར་གནང་ཕྱོགས་རྣམས་ཆོས་ཕྱོགས་ཀྱི་གནང་སྒོ་ཡིན་པ་ལྟར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ཞུ་རྒྱུའི་དབང་ཚད་ཡོངས་རྫོགས་༸གོང་ས་མཆོག་ཁོ་ནར་ཡོད་པ།
༧) ཉུང་མཐར་ལོ་གཉིས་སམ་གསུམ་རེའི་ནང་ཆོས་ཚོགས་ཁག་གི་ཚོགས་འདུ་བསྐོང་རྒྱུ་གལ་གནད་ཆེན་པོ་ཡིན་པ།
༨) ཨོསྟྲེ་ལི་ཡཱ་སྐུ་ཚབ་དོན་ཁང་ནས་ཚོགས་འདུ་བསྐོང་ཚོགས་གནང་བར་ཐུགས་རྗེ་ལེགས་འབུལ་ཞུ་རྒྱུ་བཅས།།
