༄༅།།འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  ཨ་རིའི་ནུབ་ཕྱོགས་མངའ་སྡེ་ཀ་ལི་ཕོ་ནི་ཡའི་གྲོང་ཁྱེར་སན་ཕི་རན་སི་སི་ཁོར་བྱང་ཨ་རིའི་ཁུལ་གྱི་གཟའ་མཇུག་སློབ་གྲྭའི་དགེ་རྒན་རྣམས་ལ་སཱི་ཤེས་ཡོན་ (SEE Lerning ) སློབ་གསོའི་སྐོར་ཟབ་སྦྱོང་ཞིག་ཚོགས་ཡོད་ཅིང་།  ཟབ་སྦྱོང་གོ་སྒྲིག་གནང་མཁན་ནི་བྱང་ཨ་རི་སྐུ་ཚབ་དོན་གཅོད་ཁང་དང་།  བྱང་ཀེལ་བོད་རིགས་སྤྱི་མཐུན་ཚོགས་པ་ (TANC) རེད།  ཕྱི་ལོ་ ༢༠༢༢ ལོར་སྦོ་སི་ཊོན་དུ་བསྐོང་ཚོགས་གནང་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༠ པའི་གྲོས་ཆོད་དགོངས་དོན་ལྟར་ཐེངས་འདིའི་ཟབ་སྦྱོང་གྲ་སྒྲིག་གནང་པ་ཞིག་ཡིན།  ཟབ་སྦྱོང་གི་དུས་ཡུན་ནི་ཕྱི་ལོ་ ༢༠༢༣ ཟླ་བ་ ༣ ཚེས་ ༡༧ ནས་ ༡༩ བར་ཡིན་པ་དང་།  ཟབ་སྦྱོང་ཚོགས་ས་ནི་བྱང་ཀེལ་བོད་རིགས་སྤྱི་མཐུན་ཚོགས་པའི་ཚོགས་ཁང་སྡེ་བཞི་ཕུན་ཚོགས་གླིང་དུ་ཡིན། ཟབ་སྦྱོང་གི་ཆེད་དུ་སློབ་ཁྲིད་གནང་མཁན་ཕུལ་བྱུང་ཆེད་ལས་མི་སྣ་གཉིས་གདན་འདྲེན་ཞུས་ཡོད། ཁོང་གཉིས་ནི་སྒོམ་སྒྲུབ་ཚན་རིག་དང་སྙིང་རྗེ་གཞི་རྩར་བཟུང་བའི་བཟང་སྤྱོད་ཀྱི་ལྟེ་གནས་ཁང་གི་སྤྱི་ཁྱབ་འགན་འཛིན་དང་། ཨེ་མོ་རི་གཙུག་ལག་སློབ་གཉེར་ཁང་གི་ཆོས་ལུགས་སྡེ་ཚན་གྱི་སློབ་དཔོན་ཆེན་མོ་འབུམ་རམས་པ་དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  སཱི་ཤེས་ཡོན་སློབ་གསོའི་ཟབ་སྦྱོང་སྣེ་ཁྲིད་པ་དང་ཨེ་ཤི་ཡའི་འབྲེལ་མཐུད་པ།  ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་ལོ་ཙཱ་བ་བགྲེས་པ་བརྩོན་འགྲུས་བསམ་འཕེལ་ལགས་ཡིན།ཉིན་གྲངས་གསུམ་གྱི་ཟབ་སྦྱོང་ལ་བྱང་ཨ་རིའི་གཟའ་མཇུག་སློབ་གྲྭ་ཁག་ ༡༨ ནས་ཁྱོན་བསྡོམས་དགེ་རྒན་གྲངས་ ༨༠ མིན་ཙམ་མཉམ་ཞུགས་གནང་ཡོད་པ་མ་ཟད། བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་དང་།  བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས།  བྱང་ཀེལ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྦྱིན་པ་མཐར་ཕྱིན་ལགས་དང་རྣམ་དཔྱོད་སྐྱེལ་སློབ་གྲྭའི་སློབ་སྤྱི་སྐལ་བཟང་རྡོ་རྗེ་ལགས་ཀྱིས་གཙོས་རྒྱུན་ལས་དང་དགེ་རྒན་ཚོ་ཡང་མཉམ་ཞུགས་གནང་ཡོད།   བོད་རིགས་སྤྱི་མཐུན་ཚོགས་པའི་ཁྱབ་ཁོངས་མིན་པའི་ཟླ་སྣང་སློབ་གྲྭ་དང་།  གློ་མཉམ་གཤིབ་རིག་གཞུང་སློབ་གྲྭ  ནིའུ་འཇར་སི་བོད་ཀྱི་སོན་རྩ་ཚོགས་པའི་གཟའ་མཇུག་སློབ་གྲྭ་བཅས་ནས་ཀྱང་དགེ་རྒན་བརྒྱད་ཟབ་སྦྱོང་ལ་མཉམ་ཞུགས་གནང་ཡོད།  

ཐེངས་འདིའི་ཟབ་སྦྱོང་དང་འབྲེལ་ནས་ས་གནས་ཁག་ཏུ་འབྲེལ་བ་ཞུས་པའི་རྒྱུད་རིམ་ཁྲོད་དགེ་རྒན་ཁག་ཅིག་གིས་གཟའ་མཇུག་སློབ་གྲྭའི་དགེ་རྒན་མང་པོ་དེ་འདྲ་ས་གནས་གཅིག་ལ་མཉམ་དུ་འཛོམས་པ་དཀོན་པོ་ཡིན་པའི་གོ་སྐབས་དམ་འཛིན་གྱིས་ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་རྣམས་ལ་བོད་སྐད་བོད་ཡིག་སློབ་ཁྲིད་བྱེད་སྟངས་ཀྱི་ཐབས་ཤེས་སྐོར་ལ་ཚོགས་ཐེངས་གཅིག་གྲ་སྒྲིག་གནང་ཐུབ་ན།  ཕན་ཐོགས་ཆེན་པོ་ཡོང་རྒྱུའི་དགོངས་འཆར་གནང་བ་རྒྱུ་མཚན་དུ་མཐོང་སྟེ།  གོ་སྒྲིག་ཞུ་མཁན་གྱི་ངོས་ནས་སློབ་ཁྲིད་ཐབས་ལམ་ཐོག་ཉམས་མྱོང་ཕུན་སུམ་ཚོགས་པའི་དགེ་རྒན་གཉིས་གདན་ཞུ་བྱས་ཡོད། ཁོང་གཉིས་ནི།  ཨ་རིའི་མངའ་སྡེ་ལོ་སི་ཨན་ཅི་ལི་སིར་གནས་ཞུགས་དགེ་རྒན་ཟུར་པ་བསྟན་འཛིན་འཆི་མེད་ནུ་བ་ལགས་དང་།  ནིའུ་འཇར་སི་བོད་ཀྱི་སོན་རྩ་ཚོགས་པའི་གཟའ་མཇུག་སློབ་གྲྭའི་འགན་འཛིན་སྣང་གསལ་བསྟན་འཛིན་ནོར་བུ་ལགས་གཉིས་ཡིན། ཁོང་གཉིས་ཀྱིས་ཟབ་སྦྱོང་ཉིན་གསུམ་པ་སྟེ།  ཕྱི་ཚེས་ ༡༩ ཉིན་ <<ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་ལ་བོད་སྐད་བོད་ཡིག་སློབ་ཁྲིད་བྱེད་པའི་ཐབས་ལམ། >> ཞེས་པའི་བརྗོད་གཞིའི་ཐོག་ཉིན་ཕྱེད་རིང་ཟབ་སྦྱོང་གནང་གི་ཡོད།  ཉིན་དང་པོའི་དབུ་འབྱེད་མཛད་སྒོ་འདི་བཞིན་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་གཙོ་སྐྱོང་གནང་ཞིང་།  སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཁྱོན་ཡོངས་ཀྱི་དབུ་འབྱེད་གསུང་བཤད་གནང་ཡོད་པ་དང་། བྱང་ཀེལ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྦྱིན་པ་མཐར་ཕྱིན་ལགས་ཀྱིས་དགའ་བསུའི་གསུང་བཤད།  རྣམ་དཔྱོད་སྐྱེལ་ཚལ་སློབ་གྲྭའི་སློབ་སྦྱི་སྐལ་བཟང་རྡོ་རྗེ་ལགས་ཀྱིས་ཕྱོགས་མཐའ་ཁག་ནས་ཕེབས་པའི་དགེ་རྒན་རྣམས་ལ་འཚམས་འདྲི་དང་ཆབས་ཅིག་རྣམ་དཔྱོད་སྐྱེལ་ཚལ་སློབ་གྲྭ་ངོ་སྤྲོད་མདོར་བསྡུས་གནང་སྐབས།  ས་གནས་ཁག་ཚང་མའི་གཟའ་མཇུག་སློབ་གྲྭ་མུ་མཐུད་གནས་དང་མ་གནས་ཀྱི་འགག་རྩ་ནི་དགེ་རྒན་རྣམས་ལ་ཐུག་ཡོད་པར་བརྟེན།  དགེ་རྒན་ཡོངས་ལ་དམིགས་བསལ་གྱི་ཐུགས་རྗེ་ཆེ་ཞུས།  

སཱི་ཤེས་ཡོན་སླབ་གསོ་ནི། འཛམ་གླིང་སྐྱེ་རྒུ་ཀུན་ལ་སྨན་པའི་༧གོང་ས་མཆོག་གི་རླབས་ཆེན་དགོངས་གཞི་ཞིག་ཡིན་སྟབས།  གཟའ་མཇུག་སློབ་གྲྭའི་དགེ་རྒན་ཙམ་མིན་པར་བོད་མི་ཚང་མས་ཤེས་དགོས་པ་ཞིག་ཡིན་སྟབས།  ཉིན་གསུམ་གྱི་ཟབ་སྦྱོང་ཆ་ཚང་ཕྱི་དྲིལ་བོད་ཀྱི་བརྙན་འཕྲིན་གྱི་ (Youtube) དྲྭ་ཚིགས་དང་།  བྱང་ཀེལ་བོད་རིགས་སྤྱི་མཐུན་ཚོགས་པའི་ངོ་དེབ་བརྒྱུད་ནས་ཐད་ཀར་རྒྱང་སྲིང་ཞུ་བཞིན་ཡོད། ཕྱི་ཚེས་ ༡༧ རེས་གཟའ་པ་སངས་ཉིན་གྱི་ཟབ་སྦྱོང་ཉིན་དང་པོ་ཚར་རྗེས།  ས་གནས་བོད་རིགས་སྤྱི་མཐུན་ཚོགས་པས་གྲ་སྒྲིག་ཞུས་པ་ལྟར།  སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ས་གནས་མང་ཚོགས་རྣམས་མཇལ་སྟེ་གསུང་བཤད་གནང་ཡོད་པ་དང་མང་ཚོགས་ཀྱི་དྲི་བ་ཁག་ལ་ལན་འདེབས་དང་གསལ་བཤད་གནང་ཡོད།  བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭའི་དགེ་རྒན་རྣམས་ཀྱིས་སྤྲོ་སྣང་ཆེན་པོའི་སྒོ་ནས་ཟབ་སྦྱོང་ལ་མཉམ་ཞུགས་གནང་བ་དང་།  བྱང་ཀེལ་བོད་རིགས་སྤྱི་མཐུན་ཚོགས་པས་ཁུར་མཉམ་ལེན་གྱིས་ཕྱག་རོགས་གནང་བ།  བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱོར་བ།  ཕྱི་འབྲེལ་ལས་ཁུངས་ནས་ (TibetTV Youtube) དྲྭ་ཚིགས་བརྒྱུད་ཟབ་སྦྱོང་ཐད་གཏོང་ཆོག་པའི་མཐུན་རྐྱེན་གནང་བ་བཅས་ལ་སྐུ་ཚབ་དོན་ཁང་དང་བྱང་ཀེལ་བོད་རིགས་སྤྱི་མཐུན་ཚོགས་པས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་ཡི་ཡོད། 

ཟབ་སྦྱོང་ལ་མཉམ་ཞུགས་གནང་མཁན་དགེ་རྒན་མང་པོར་ཐེངས་འདིའི་ཟབ་སྦྱོང་བརྒྱུད་ཕན་ཐོགས་ཆེན་པོ་བྱུང་བ་དང་།  བློ་སྐྱེད་གསར་པ་མང་པོ་ཐོབ་པའི་ཚོར་སྣང་བྱུང་འདུག  ཕྱི་ཚེས་ ༡༩ དགོང་མོ་ཆུ་ཚོད་ ༦ ཐོག་ཐེངས་འདིའི་དུས་ཡུན་ཉིན་གྲངས་གསུམ་གྱི་སཱི་ཤེས་ཡོན་སློབ་གསོའི་ཟབ་སྦྱོང་མཇུག་སྡོམ་གནང་རྒྱུ་ཡིན་པ་བཅས། །