༄༅། །ལྷར་བཅས་སྲིད་གཞིའི་གཙུག་རྒྱན། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འཇིག་རྟེན་ཞི་བདེའི་དེད་དཔོན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུའི་གསང་བ་གསུམ་ལ་ཚུལ་བསྟན་མི་ཤིས་པའི་མཚན་མའི་རིགས་ཕྲ་མོ་ཙམ་ཡང་ཞར་ཡང་མི་བཞེས་ཤིང་། བསྟན་འགྲོ་སྤྱི་དང་བྱེ་བྲག་ཁ་བ་གངས་ཅན་པའི་ལྗོངས་ཀྱི་མགོན་དཔུང་དམ་པར་༸ཞབས་པད་མི་འགྱུར་རྡོ་རྗེ་ཆོས་བདུན་གྱི་ངོ་བོར་བརྟན་ཅིང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་ཕྱིར། བོད་གཞུང་མང་གཞིས་བྱེས་ལྷ་མི་ཡོངས་ནས་བརྟན་བཞུགས་བསྟར་འབུལ་ཞུ་རྒྱུའི་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྤྱི་བོར་བསོད་ནམས་ཀྱི་དཔལ་དུ་ཐོབ་པ་ལྟར།
བོད་རྒྱལ་ལོ་ ༢༡༥༠ བོད་ཟླ་ ༡ ཚེས་ ༡༩ ནས་ ༢༢ བར་དང་། ཕྱི་ལོ་ ༢༠༢༣ ཟླ་བ་ ༣ ཚེས་ ༡༡ ནས་ ༡༤ བར་ཉིན་གྲངས་བཞིའི་རིང་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དང་། རྣམ་གྲྭ་མཁན་རིན་པོ་ཆེ་མཆོག་དབུ་བཞུགས་ཐོག་རྣམ་གྲྭ་ཕན་བདེ་ལེགས་བཤད་གླིང་དང་། ཀིརྟིའི་བྱེས་པ་གྲྭ་ཚང་། དེ་བཞིན་རྡ་ས་ཁུལ་གྱི་བསྙེན་མཚམས་པ་བཅས་ཀྱི་ཆོག་གྲྭ་བཅས་དགེ་འདུན་ཞལ་གྲངས་ ༧༠ སྐོར་ནས་སྐུ་ཚེ་ཚེ་སྒྲུབ་སྔོན་དུ་བཏང་སྟེ། བོད་ཟླ་ ༡ ཚེས་ ༢༣ ཕྱི་ལོ་ ༢༠༢༣ ཟླ་བ་ ༣ ཚེས་ ༡༥ གཟའ་སྐར་འཕྲོད་སྦྱོར་དགེ་བའི་ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་བརྒྱ་ཚར་དང་ཚོགས་མཆོད་འབུལ་གཤོམ་ཐོག་མགོན་པོ་གང་ཉིད་མཆོག་ལ་བོད་མིའི་སྒྲིག་འཛུགས་ནས་བོད་གཞིས་བྱེས་གཞུང་མང་ལྷ་མི་ཡོངས་ནས་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦ ཐོག་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་མཆོག་དབུ་བཞུགས་ཀྱིས་ཆོག་གྲྭ་འདུས་ཚོགས་ནས་སྐུ་ཚེ་ཚེ་སྒྲུབ་གསུང་ཆོག་གནང་གྲུབ་མཚམས་ཆུ་ཚོད་ ༨ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་གཟིམ་སྒོ་ནས་གདན་ཞུ་སྐབས་བོད་ཀྱི་ཟློས་གར་ཚོགས་པས་ཕེབས་བརྡ་རོལ་ཆ་འབུལ་བཞིན་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཆེས་མཐོའི་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བཅས་ཀྱིས་སྤོས་སྣེ་དང་རྣམ་གྲྭའི་སྤྱན་རྒྱ་སྤོས་འཛིན་གྱིས་སྔོན་བསུས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་གཟིམ་ཆུང་ནས་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་དབུ་བཞུགས་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་མཇལ་དར་རྐྱང་འབུལ་ཞུས་རྗེས་ཞལ་འདོན་གུ་རུའི་ཐུགས་དམ་གནད་སྐུལ་དང་། ༸རྒྱལ་བའི་འཁྲུངས་རབས་གསོལ་འདེབས་སོགས་ཆོས་སྤྱོད་ཀྱི་རིམ་པ་རྣམས་གསུང་མུར་གསོལ་ཇ་འབྲས་སིལ་རིམ་བཞིན་འདེགས་འབུལ་ཞུས།
ཐོག་མར་བསུན་བཟློག་གི་ཆོ་ག་ལ་རོལ་མོ་བྱིན་འབེབས་སྐབས་མཁའ་འགྲོ་མ་རྣམས་གར་སྟབས་དང་བཅས་ནང་དུ་ཕེབས་ཏེ་སོ་སོའི་མདོག་མཐུན་གྱི་དར་སྣེ་བཟུང་སྟེ་བཞུགས་ཁྲིའི་མདུན་དུ་འཁོད། དེ་ནས་ཆོས་སྐྱོང་སྤྱན་འདྲེན་དབུ་ཚུགས། ཞལ་འདོན་ཚིག་བསྟུན་གྱིས་དབུ་བཞུགས་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་དར་སྣེ་གཅོད་འབྲེག་གནང་རིམ་བཞིན་མཁའ་འགྲོ་མ་རྣམས་སྐུ་གླུད་ཀྱི་མདུན་དུ་འཁོད། ཡོན་བདག་ནས་སྐུ་གླུད་ལ་སྒྲོན་དར་དང་མཁའ་འགྲོ་མ་འཁོར་བཅས་ལ་ཡོན་དང་། དར། དཀར་སྤྲོ། ཚོགས་བཅས་ཕུལ་ཏེ་ཕྱིར་གཤེགས།
བརྟན་བཞུགས་དངོས་གཞིར་སློབ་དཔོན་ལྷར་བསྐྱེད་སོགས་རིམ་བཞིན་གསུངས་ཏེ་རིག་འཛིན་བརྒྱུད་སྐུལ་གྱི་གསུང་ཚིག་ཐ་མ་འཆི་མེད་ཚེ་ཡི་དངོས་གྲུབ་སྩོལ་བཞིན་པའི་མཚམས་སུ་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་ཚེ་མདའ་འབུལ་ལམ་ཞུས། དེ་ནས་གསོལ་འདེབས་མཎྡལ་རྒྱས་པའི་ས་གཞི་བྱུགས་མའི་མཇུག་དབུ་བཞུགས་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་གསོལ་འདེབས་མཎྜལ་ལྗགས་བཤད་སྐབས་དཔལ་ལྡན་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་མཎྜལ་ཚོམ་བུ་ཟུར་འདེགས་ཞུས། ལྗགས་བཤད་གྲུབ་རྗེས་ཚོམ་བུ་འབུལ་བཞེས་དང་མུ་མཐུད་སྐུ་རྟེན། གསུང་རྟེན། ཐུགས་རྟེན། བུམ་པ། ཚེ་ཆང་། ཚེ་རིལ། ཚེ་མདའ། འབྲང་རྒྱས་ལ། དབང་། དྲག་པོ། ཞི་བ། རྒྱས་པ་བཅས་དང་། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་བཅས་ཚིག་བསྟུན་གྱིས་འབུལ་ལམ་ཞུས་ཏེ་དབུ་བཞུགས་རྡོར་སློབ་དང་། བོད་ཀྱི་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པ་དང་སྐུ་ཚབ་བླ་ཆེན་རྣམས་ཀྱིས་མཇལ་ཞུས།
དཔལ་ལྡན་སྲིད་སྐྱོང་མཆོག་གིས་མཎྜལ་འདེགས་འབུལ་ཞུས་གྲུབ་མཚམས་ཆེས་མཐོའི་ཁྲིམས་ཞིབ་པ་རྣམ་པ་དང་། བོད་མི་མང་སྤྱི་འཐུས་ཚོགས་གཞོན་མཆོག་བཅས་ཀྱིས་མཇལ་ཁ་ཞུས་པ་དང་ཆབས་ཅིག་འབུལ་དངོས་རྣམས་སྤྱན་བསྟར་ཞུས་རྗེས་༸རྒྱལ་བའི་ཞབས་བརྟན་དང་། བསམ་པ་ལྷུན་འགྲུབ། བར་ཆད་ལམ་སེལ། བོད་སྐྱོང་ལྷ་སྲུང་འཕྲིན་བསྐུལ་མ་སྨད་བསོད་ནམས་བཅས་གསུང་མུར་གསོལ་ཇ་གཉིས་པ་འདེགས་འབུལ་ཞུས་ཏེ་ཡོན་འབུལ་དང་ཚོགས་བཀྱེ་བགོ་འགྲེམས་ཞུས་ཡོད།
དེ་ནས་གཏང་རག་མཎྜལ་བོད་མི་མང་སྤྱི་འཐུས་ཚོགས་གཙོ་མཁན་པོ་བོད་ནམས་བསྟན་འཕེལ་མཆོག་གིས་འདེགས་འབུལ་དང་བཀའ་བློན་རྣམ་པ། རབ་དབང་ཅན་གྱི་འགན་འཛིན་རྣམ་པ་བཅས་ནས་མཇལ་ཁ་ཞུས་གྲུབ་མཚམས་ཞལ་འདོན་ཉི་གཞོན་འཆར་ཁ་མ་དང་། ཐུབ་བསྟན་རིས་མེད་རྒྱས་པའི་སྨོན་ལམ། གསོལ་འདེབས་སྨོན་ཚིག་བདེན་པའི་རྔ་སྒྲ། བསྟན་པ་འབར་མ། མཆོག་གསུམ་ཤིས་བརྗོད་བཅས་གསུངས་མཐར་ཀ་ཁྲི་སྒྲོགས། དེ་ནས་བདེན་ཚིག་སྨོན་ལམ་བཅས་གསུངས་ཏེ་བརྟན་བཞུགས་མཛད་སྒོ་དངོས་གཞི་ལེགས་པར་གྲུབ་མཚམས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། དེ་རིང་གཞན་ཞུ་རྒྱུ་གང་ཡང་མེད། གང་ལྟར་བོད་ཀྱི་གཟུགས་ཅན་མི་ལྟ་ཅི་སྨོས། གཟུགས་མེད་ཚོས་ཀྱང་ངོས་ལ་འདིར་བརྟན་བཞུགས་བྱེད་པ་དང་། བརྟན་བཞུགས་བྱེད་པ་དེ་ཡང་བོད་ཀྱི་གནས་སྟངས་དཀའ་ངལ་མང་པོ་ཞིག་བརྒྱུད་པའི་དུས་ཚོད་ལ་ངོས་ཀྱིས་བོད་ཀྱི་ཆོས་དང་རིག་གཞུང་ཉམས་པ་མེད་པར་བཟུང་སྟེ། རྒྱ་ཧོར་བོད་གསུམ་ལ་བསྐྱར་དུ་ཡག་པོ་དར་ཐུབ་པ་ཞིག་དང་། དེ་སྔ་བོད་ཀྱི་རིག་གཞུང་ལ་འབྲེལ་བ་མེད་པའི་ནུབ་ཕྱོགས་ཀྱི་ཡུལ་ལུང་ཁག་ཏུའང་དོ་སྣང་གསར་པ་སླེབས་པ་དང་། གལ་ཆེ་བ་སེམས་ཁམས་རིག་པ་དང་འབྲེལ་ནས་ཚན་རིག་པའི་ནང་ནས་དོ་སྣང་གསར་པ་ཞིག་སླེབས་ཡོད་པ་རེད། དེ་དག་ནི་ངོས་ཀྱིས་བསྟན་པའི་ཞབས་འདེགས་ཕྲན་བུ་གྲུབ་ཡོད་པ་རེད། ད་དུང་ཡང་ལོ་བཅུ་ཕྲག་ཁ་ཤས་ཤིག་ལ་འདི་ལྟར་བསྡད་ནས་བོད་ཀྱི་ཆོས་དང་རིག་གཞུང་གིས་ཞབས་འདེགས་ཞུ་རྒྱུ་གང་ལ་གང་འཚམ་ངོས་ཀྱིས་བྱེད་ཐུབ་ཀྱི་རེད།
དེ་རིང་འདིར་བོད་རྒྱ་ཆེ་མི་མང་གི་ཚབ་བྱེད་པའི་མི་མང་ཚོ་དང་། དེ་བཞིན་གནས་ཆུང་ཆོས་སྐྱོང་དང་མཁའ་འགྲོ་ཚོས་མཚོན་པའི་གཟུགས་མེད་ཀྱི་ལྷ་ཚོས་ཀྱང་རེ་འདུན་ཆེན་པོ་བྱེད་བཞིན་ཡོད་པ་རེད། དེར་བརྟེན་ངོས་ཀྱི་གཟུགས་པོ་བདེ་ཐག་ཆོད་ཡོད། ད་དུང་མུ་མཐུད་ནས་སྤྱིར་སངས་རྒྱས་ཀྱི་བསྟན་པ་དང་། ཡང་སྒོས་བོད་གངས་ཅན་ལྗོངས་ཀྱི་ཆོས་དང་རིག་གཞུང་། ཧི་མ་ལ་ཡ་རི་རྒྱུད་ཁུལ་གྱི་མི་མང་རྣམས་ངོས་ལ་ཆོས་དང་རིག་གཞུང་གི་ཐོག་ནས་དད་པ་རྩེ་གཅིག་ཡོད་པས་དེ་དག་གི་རེ་འདུན་སྐོང་ཐུབ་པ་ཞིག་དང་། གང་ལྟར་སྐྱེས་པའི་དགོས་དོན་ནི་གཞན་ལ་ཕན་པ་སྒྲུབ་པ་རེད། ངོས་ཀྱི་ལུས་རྟེན་འདིའི་ཐོག་ནས་མི་ལ་ཕན་པ་ཏན་ཏན་སྒྲུབ་ཐུབ་ཀྱི་འདུག་པས་ཕན་པ་སྒྲུབ་ཐུབ་པའི་ལུས་རྟེན་འདི་རིང་པོར་འཚོ་ཐུབ་པར་ངོས་ཀྱིས་ཀྱང་སྨོན་ལམ་རྒྱག་གི་ཡིན། འཕེན་པ་གཏོང་གི་ཡིན། ཁྱོད་ཚོ་ཚང་མས་ཐུགས་སྨོན་གནང་སྟེ་དེ་རིང་བརྟན་བཞུགས་གནང་བ་དེ་ལྟར་རེད། ཐུགས་རྗེ་ཆེ་ཞུ་རྒྱུ་ཡིན། བཀྲ་ཤིས་བདེ་ལེགས། ཞེས་བཀའ་སློབ་སྩལ། །
