༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སོག་པོའི་རྒྱལ་ས་ཨུ་ལན་སྦ་ཌར་ (Ulaanbaatar) གྱི་དགའ་ལྡན་ཐེག་ཆེན་གླིང་དགོན་པ་གཙོས་པའི་བོད་སོག་བླ་སྤྲུལ་ཁག་གཅིག་གིས་ཇི་ལྟར་སྔོན་ནས་གསོལ་བ་བཏབ་པ་ལྟར། ཕྱི་ལོ་ ༢༠༢༣ ཟླ་བ་ ༣ ཚེས་ ༨ ཉིན་སོག་པོའི་དད་ལྡན་སེར་སྐྱ་མི་གྲངས་ ༦༠༠ གཙོས་པའི་འཛམ་གླིང་རྒྱལ་ཁབ་ཁག་ ༦༦ ནས་ཕེབས་པའི་ཆོས་ཞུ་བ་སེར་སྐྱ་ཕོ་མོ་གྲངས་ ༡༢༠༠༠ བརྒལ་བར་བདེ་མཆོག་ནག་པོ་པའི་བཀའ་དབང་སྟ་གོན་མཛད་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་གྱིས་ཐོག་མར་སྒྲུབ་ཞག་མཛད་པ་དང་། སྒྲུབ་ཞག་གྲུབ་མཚམས་བཀའ་སློབ་སྩལ་དོན། བོད་ལ་གསང་སྔགས་ཀྱི་ཆོས་སྐོར་ཧ་ཅང་དར་སོ་ཆེན་པོ་བྱས་ཏེ་འཁོར་ལོ་དང་པོ་རང་ལ་ཆ་བཞག་ནའང་། འཁོར་ལོ་དང་པོ་གྲུབ་ཆེན་ལཱུ་ཨི་པའི་ལུགས་དང་། དེ་ནས་གྲུབ་ཆེན་དྲིལ་བུ་པའི་ལུགས་ཀྱི་དྲིལ་བུ་ལུས་དཀྱིལ་དང་འབྲེལ་བའི་བླ་མའི་རྣལ་འབྱོར་ཁས་ལེན་བྱས་ཏེ་ཆགས་མེད་འདོན་དགོས་པ་དེ་ལྟར་རེད། དེ་ནས་བདེ་མཆོག་ནག་པོ་པ་དེ་ཏོག་ཙམ་དཀོན་པོ་རེད། ངོས་ཀྱིས་བདེ་མཆོག་ནག་པོ་པ་སྟག་བྲག་རིན་པོ་ཆེའི་སྐུ་མདུན་ནས་ཞུས་པ་ཡིན། བསམ་བློའི་ནང་དུ་བདེ་མཆོག་ནག་པོ་པ་ལ་ཕྲན་བུ་སེམས་ཐག་ཉེ་བའི་ཚོར་བ་ཞིག་ཡོང་གི་འདུག
དེ་རིང་འདིར་བདེ་མཆོག་ནག་པོ་པའི་དབང་གི་སྔོན་འགྲོ་སྟ་གོན་འབུལ་རྒྱུ་དེ་ལྟར་རེད། བདེ་མཆོག་གི་དབང་ལ་མ་རྒྱུད་འཁོར་ལོ་བདེ་མཆོག་ཟེར་བའི་གསང་བ་འདུས་པའི་ཆོས་སྐད་དུ་བྱས་པ་ཡིན་ན་སྒྱུ་ལུས་རྩལ་དུ་འདོན་མཁན་གྱི་གཞུང་ཕ་རྒྱུད་དང་། འོད་གསལ་རྩལ་དུ་འདོན་མཁན་གྱི་གཞུང་དེ་ལ་མ་རྒྱུད། ཅེས་བརྗོད་ཀྱི་ཡོད། འོན་ཀྱང་དོན་གྱིས་སྒྱུ་ལུས་རྩལ་དུ་བཏོན་ན་འོད་གསལ་རང་བཞིན་གྱིས་ཐོན་ཡོང་གི་ཡོད། འོད་གསལ་རྩལ་དུ་བཏོན་ནས་དེའི་སྟེང་སྒྱུ་མའི་ལུས་རང་བཞིན་གྱིས་ཐོན་ཡོང་གི་ཡོད། གང་ལྟར་བླ་མེད་ཀྱི་ཕ་རྒྱུད་མ་རྒྱུད་གང་ཡིན་ནའང་ཟུང་འཇུག་གཙོ་བོར་བསྟན་ཡོང་གི་ཡོད།
དེ་རིང་འདིར་མ་རྒྱུད་འཁོར་ལོ་སྡོམ་པ་དང་། དེའི་ནང་ལཱུ་ནག་དྲིལ་གསུམ་ཡོད་པའི་ནང་ནས་ནག་པོ་པ་རེད། གྲུབ་ཆེན་ནག་པོ་པ་ཟེར་དུས་ངོས་ཀྱི་སེམས་སུ་ཧ་ཅང་སེམས་ཐག་ཉེ་པོ་འདུག ངོས་ཀྱིས་ནག་པོ་པའི་དབང་སྟག་བྲག་རིན་པོ་ཆེའི་སྐུ་མདུན་ནས་ཞུས་ཏེ་བསྙེན་པའང་བཏང་བ་ཡིན། དྲིལ་བུ་ལུས་དཀྱིལ་ཆགས་མེད་འདོན་བཞིན་ཡོད། ནག་པོ་ཆགས་མེད་འདོན་གྱི་མེད་ཀྱང་སེམས་ཐག་ཧ་ཅང་ཉེ་པོ་འདུག དེ་ལྟ་བུའི་འཁོར་ལོ་སྡོམ་པ་ལཱུ་ནག་དྲིལ་གསུམ་གྱི་ནང་ནས་འཁོར་ལོ་སྡོམ་པ་ནག་པོ་པ་ཏོག་ཙམ་དཀོན་པོ་རེད།
འཁོར་ལོ་སྡོམ་པ་ནག་པོ་པའི་དབང་འབུལ་བར་དེ་རིང་སྔོན་ལ་སྟ་གོན་འབུལ་རྒྱུ་དང་། ངོས་ཀྱིས་འབོར་ཤོབ་བཤད་པ་ལྟ་བུ་རེད་དེ། གང་ལྟར་ངོས་རང་ནག་པོ་པ་ལ་འབྲེལ་བ་ཞིག་ཏན་ཏན་ཡོད་པ་ལྟ་བུ་འདུག དེར་བརྟེན་དེ་རིང་འདིར་གྲུབ་ཆེན་ནག་པོ་པའི་ལུགས་ཀྱི་འཁོར་ལོ་སྡོམ་པ་ནག་པོ་པའི་དབང་འབུལ་བའི་སྟ་གོན་དང་། རྒྱུད་སྡེ་ཚང་མར་དབང་འབུལ་བའི་སྔོན་འགྲོར་སྟ་གོན་འགྲོ་དགོས་ཤིང་། རྣལ་འབྱོར་བླ་མེད་ལ་དེ་བས་ཀྱང་དངོས་གཞིའི་དབང་གི་སྔོན་ལ་སྟ་གོན་ངེས་པར་དུ་འགྲོ་དགོས། ངོས་ཀྱིས་གོང་དུ་སྒྲུབ་ཞག་བྱས་པའི་སྐབས་སུ་ནག་པོ་པའི་ང་རྒྱལ་དང་གསལ་སྣང་ག་ཚོད་ཐུབ་ཐུབ་ཀྱིས་བཏོན་པ་ཡིན། རང་བཞིན་གྱིས་ནག་པོ་པར་སེམས་ཐག་ཉེ་པོ་ཞིག་འདུག ད་ལྟ་ནག་པོ་པར་བསྐྱེད་དེ་བསྡད་ཡོད་པ་རེད། ཅེས་དང་།
བགེགས་གཏོར་དང་འབྲེལ་བཀའ་སློབ་སྩལ་དོན། ད་ལྟའི་སྐབས་སུ་སློབ་མ་དད་པ་ཅན་ཚེ་རབས་མང་པོར་ཆོས་དང་ཟང་ཟིང་གི་འབྲེལ་བ་ཡོད་པ་ཞིག་ཕལ་ཆེར་ཆགས་ཡོད་པ་རེད། དེ་ལྟ་བུའི་སློབ་མ་དད་ཅན་ཚོར་བགེགས་ཞེས་ཕྱི་ལོགས་ཀྱི་བགེགས་གང་ཤེས་ཀྱང་། སེམས་ཀྱི་བདེན་འཛིན་གྱི་རྣམ་རྟོག་དང་། རང་གཅེས་འཛིན་གྱི་རྣམ་རྟོག་གཉིས་བགེགས་ངོ་མ་དེ་རེད། འདིར་གཏོར་མ་བརྔོས་ནས་དེ་ལྟ་བུའི་ནང་གི་བདེན་འཛིན་དང་གཅེས་འཛིན་ལ་མཐུན་འགྱུར་བྱེད་པའི་མི་ཤེས་པའི་རྨོངས་པའི་གཞན་དབང་དུ་གྱུར་པའི་ལན་ཆགས་རྣམས་ལ་གཏོར་བརྔོས་བྱེད་ཀྱི་ཡོད། ཅེས་བཀའ་སློབ་སྩལ་རྗེས་བགེགས་གཏོར་དང་།
དེ་རྗེས་སླར་ཡང་བཀའ་སློབ་སྩལ་དོན། སྟོན་པ་བཅོམ་ལྡན་འདས་ནི་དངོས་གནས་སྟོན་པ་འདྲ་འདྲའི་ནང་ནས་གཞན་དང་མི་འདྲ་བ་ཞིག་རེད། བརྩེ་བའི་ཡོན་ཏན་དང་། འཕྲིན་ལས་ཀྱི་ཡོན་ཏན་སྟོན་པ་གཞན་ལའང་གང་ཙམ་ཡོང་གི་རེད། སྟོན་པ་བཅོམ་ལྡན་འདས་ནི་མཁྱེན་པའི་ཡོན་ཏན་ཧ་ལས་པ་ཞིག་རེད་འདུག དེར་བརྟེན་སྟོན་པ་བཅོམ་ལྡན་འདས་ཀྱིས་གདུལ་བྱ་ལ་བླང་དོར་གྱི་གནད་བསྟན་ནས་གདུལ་བྱའི་དོན་མཛད་པ་མ་གཏོགས། རྫུ་འཕྲུལ་ལྟ་བུའི་ཐོག་ནས་གཞན་དོན་མཛད་པ་སྐབས་དང་སྐབས་སུ་གནང་གི་ཡོད་ཀྱང་། གཙོ་བོ་གསུང་གི་འཕྲིན་ལས་ཀྱི་ཐོག་ནས་གཞན་དོན་མཛད་པ་དེ་དངོས་གནས་དྲང་གནས་རླབས་ཆེན་པོ་རེད། གསུང་གི་འཕྲིན་ལས་ལས་སེམས་རྒྱུད་འདུལ་ཐབས་དེའང་སྔོན་ལ་བློ་རགས་པ་ཕར་ཞི་བར་གཏོང་བ་དང་། དེ་ནས་རིམ་བཞིན་ཟབ་ཏུ་ཟབ་ཏུ་བཏང་སྟེ། མཐར་ཉོན་མོངས་ཕྲ་མོ་རྣམས་སེལ་བ་ལ་ཕ་རོལ་ཏུ་ཕྱིན་པའི་ཐེག་པའི་སྐབས་ནས་གསུང་པའི་སྟོང་ཉིད་སྒོམ་པ་དང་། བྱང་ཆུབ་ཀྱི་སེམས་སྒོམ་པ་གཅིག་པུས་མི་ཕན་པར་སྟོང་ཉིད་སྒོམ་བྱེད་ཀྱི་བློ་དེ་གཉུག་མ་ལྷན་ཅིག་སྐྱེས་པའི་འོད་གསལ་གྱི་རང་བཞིན་དུ་འཆར་བ་ཞིག་དགོས་ཀྱི་ཡོད། གཉུག་མ་ལྷན་ཅིག་སྐྱེས་པའི་འོད་གསལ་མངོན་དུ་གྱུར་ཐུབ་ན། འོད་གསལ་དེའི་བཞོན་པའི་རླུང་ལས་སྒྱུ་ལུས་སྒྲུབ་ཐུབ་པ་ཞིག་ཡོང་གི་ཡོད། དེ་བྱེད་ཐུབ་ན་སངས་རྒྱས་ཀྱི་ཆོས་གཟུགས་ཀྱི་སྐུ་གཉིས་པོ་འགྲུབ་པའི་རྒྱུ་ཆ་ཚང་བ་དེའི་སྟེང་ནས་ཡོང་གི་འདུག
སྐུ་དག་པ་སྒྱུ་མའི་སྐུ་དང་། ཐུགས་དག་པ་དོན་གྱི་འོད་གསལ། སྒྱུ་མའི་ལུས་སྒྲུབ་བྱེད་འོད་གསལ་གྱི་སྟེང་ནས་ཡོང་གི་འདུག དེའི་ཐོག་ནས་སློབ་པའི་ཟུང་འཇུག་མངོན་དུ་བྱེད་པ་དང་། སློབ་པའི་ཟུང་འཇུག་གི་རྒྱུན་དེའི་ཐོག་ནས་མ་རིག་པ་བག་ཆགས་དང་བཅས་པ་རིམ་པས་སྦྱངས་ནས། མཐར་སློབ་པའི་ཟུང་འཇུག་དང་། དེ་ནས་མི་སློབ་པའི་ཟུང་འཇུག་གི་སྐུ་འགྲུབ་པ་འགྲོ་སྟངས་དེ་ལྟར་ཡོང་གི་ཡོད། དེ་རིང་ཁ་སང་གི་ཆོས་སྐད་དུ་དངོས་ཡོད་གནས་ཚུལ་དང་མཐུན་པ་དང་། ཚན་རིག་དང་མཐུན་པ་ཕལ་ཆེར་ཆགས་འདུག སངས་རྒྱས་ཀྱི་གོ་འཕང་ཐོབ་པར་ཤོག་ཅེས་པ་ཙམ་མིན་པར་སངས་རྒྱས་ཀྱི་གོ་འཕང་ཐོབ་སྟངས་དེ་སྤངས་རྟོགས་མཐར་ཕྱིན་པའི་ཟུང་འཇུག་གི་སྐུའི་བསྒྲུབ་བྱ་དེ་གང་རེད། དེ་ཕྱི་ལོག་ནས་བསྒྲུབ་པ་མ་རེད། གང་ཡང་མེད་པར་ནམ་མཁར་སྨོན་ལམ་བརྒྱབ་ནས་གཅིག་ཡོང་གི་རེད་ཟེར་རྒྱུ་དེར་རྒྱུ་མཚན་དེ་ཙམ་མེད། ཅེས་སོགས་ཀྱི་བཀའ་སློབ་སྩལ་རྗེས་སོག་པོའི་དགའ་ལྡན་ཐེག་ཆེན་གླིང་དགོན་པའི་བླ་སྤྲུལ་དགེ་འདུན་གཙོས་པའི་དད་ལྡན་ཆོས་ཞུ་བ་རྣམས་ནས་མཎྜལ་རྟེན་གསུམ་འདེགས་འབུལ་ཞུས་ཤིང་། རིམ་བཞིན་བདེ་མཆོག་ནག་པོ་པའི་དབང་གི་སྔོན་འགྲོའི་སྟ་གོན་གྱི་རིམ་པ་ལེགས་པར་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སོག་པོའི་དད་ལྡན་ཆོས་ཞུ་བ་རྣམས་ལ་མཇལ་ཁ་གནང་ཡོད། །
