༄༅། །འདི་གར་བྱང་ཨ་རིའི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན།  བྱང་ཨ་རི་སྐུ་ཚབ་དོན་གཅོད་ཁང་དང་བྱང་ཀེལ་བོད་རིཌ་སྤྱི་མཐུན་ཚོཌ་པ་ (TANC) གཉིས་ཐུན་མོང་གིས་བྱང་ཨ་རིའི་ཁུལ་གྱི་གཟའ་མཇུག་སློབ་གྲྭའི་དགེ་རྒན་རྣམས་ལ་སཱི་ཤེས་ཡོན་ (SEE Lerning ) སློབ་གསོའི་སྐོར་ཟབ་སྦྱོང་ཞིག་གོ་སྒྲིག་ཞུས་ཡོད།

ཐེངས་འདིའི་ཟབ་སྦྱོང་ནི།  སྔ་ལོ་སྦོ་སི་ཊོན་དུ་བསྐོང་ཚོགས་བྱས་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༠ པའི་གྲོས་ཆོད་དགོངས་དོན་འོག་གྲ་སྒྲིག་བྱས་པ་ཞིག་ཡིན་ཞིང་།  ཟབ་སྦྱོང་གི་དུས་ཡུན་ནི་ཕྱི་ལོ་ ༢༠༢༣ ཟླ་བ་ ༣ ཚེས་ ༡༧ ནས་ ༡༩ བར་ཉིན་གྲངས་གསུམ་ཡིན་པ་དང་།  ཟབ་སྦྱོང་ཚོགས་ས་ནི་བྱང་ཀེལ་བོད་རིགས་སྤྱི་མཐུན་ཚོགས་པའི་ཚོགས་ཁང་སྡེ་བཞི་ཕུན་ཚོགས་གླིང་དུ་ཡིན།  ཟབ་སྦྱོང་གི་ཆེད་དུ་སློབ་ཁྲིད་གནང་མཁན་ཕུལ་བྱུང་ཆེད་ལས་མི་སྣ་གཉིས་གདན་འདྲེན་ཞུས་ཡོད།  ཁོང་གཉིས་ནི་སྒོམ་སྒྲུབ་ཚན་རིག་དང་སྙིང་རྗེ་གཞི་རྩར་བཟུང་བའི་བཟང་སྤྱོད་ཀྱི་ལྟེ་གནས་ཁང་གི་སྤྱི་ཁྱབ་འགན་འཛིན་དང་ཨེ་མོ་རི་གཙུག་ལག་སློབ་གཉེར་ཁང་གི་ཆོས་ལུགས་སྡེ་ཚན་གྱི་སློབ་དཔོན་ཆེན་མོ་འབུམ་རམས་པ་དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  སཱི་ཤེས་ཡོན་སློབ་གསོའི་ཟབ་སྦྱོང་སྣེ་ཁྲིད་པ་དང་ཨེ་ཤི་ཡའི་འབྲེལ་མཐུད་པ།  ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་ལོ་ཙཱ་བ་བགྲེས་པ་བརྩོན་འགྲུས་བསམ་འཕེལ་ལགས་ཡིན།  

ཉིན་གྲངས་གསུམ་གྱི་ཟབ་སྦྱོང་ལ་བྱང་ཨ་རིའི་གཟའ་མཇུག་སློབ་གྲྭ་ཁག་ ༡༨ ནས་བསྡོམས་དགེ་རྒན་ ༨༠ མིན་ཙམ་མཉམ་ཞུགས་གནང་གི་ཡོད་པ་མ་ཟད།  བྱང་ཨ་རིའི་སྐུ་ཚབ་དོན་གཅོད་ཁང་ནས་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་དང་།  བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས།  བྱང་ཀེལ་བོད་རིགས་སྤྱི་མཐུན་ཚོགས་པ་ནས་ཚོགས་གཙོ་སྦྱིན་པ་མཐར་ཕྱིན་ལགས་དང་རྣམ་དཔྱོད་སྐྱེལ་སློབ་གྲྭའི་སློབ་སྦྱི་སྐལ་བཟང་རྡོ་རྗེས་ཀྱིས་གཙོས་རྒྱུན་ལས་དང་དགེ་རྒན་ཚོ་ཡང་མཉམ་ཞུགས་གནང་གི་ཡོད།  

ཐེངས་འདིའི་ཟབ་སྦྱོང་དང་འབྲེལ་ནས་ས་གནས་ཁག་ཏུ་འབྲེལ་བ་ཞུས་པའི་རྒྱུད་རིམ་ནང་།  དགེ་རྒན་ཁག་ཅིག་གིས།  གཟའ་མཇུག་སློབ་གྲྭའི་དགེ་རྒན་མང་པོ་དེ་འདྲ་ས་གནས་གཅིག་ལ་མཉམ་དུ་འཛོམས་པ་དཀོན་པོ་ཡིན་པའི་གོ་སྐབས་དེ་དམ་འཛིན་གྱིས།  ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་རྣམས་ལ་བོད་སྐད་བོད་ཡིག་སློབ་ཁྲིད་བྱེད་སྟངས་ཀྱི་ཐབས་ཤེས་སྐོར་ལ་ཟབ་སྦྱོང་ཞིག་གྲ་སྒྲིག་གནང་ཐུབ་ན།  ཕན་ཐོགས་ཆེན་པོ་ཡོང་རྒྱུའི་དགོངས་འཆར་གནང་བ་བཞིན། སློབ་ཁྲིད་ཐབས་ལམ་ཐོག་ཉམས་མྱོང་ཕུན་ཚོགས་པའི་དགེ་རྒན་གཉིས་གདན་ཞུ་བྱས་ཡོད།  ཁོང་གཉིས་ནི།  ལོ་སི་ཨན་ཅི་ལི་སིར་ (LA) ཞུགས་པའི་དགེ་རྒན་ཟུར་པ་བསྟན་འཛིན་འཆི་མེད་ནུ་བ་ལགས་དང་།  ནིའུ་འཇར་སི་བོད་ཀྱི་སོན་རྩ་ཚོགས་པའི་གཟའ་མཇུག་སློབ་གྲྭའི་འགན་འཛིན་སྣང་གསལ་བསྟན་འཛིན་ནོར་བུ་ལགས་གཉིས་ཡིན།  ཁོང་གཉིས་ཀྱིས་ཚེས་ ༡༩ ཉིན་ <<ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་ལ་བོད་སྐད་བོད་ཡིག་སློབ་ཁྲིད་བྱེད་པའི་ཐབས་ལམ། >> ཞེས་པའི་བརྗོད་གཞིའི་ཐོག་ཉིན་ཕྱེད་རིང་ཟབ་སྦྱོང་གནང་གཏན་འཁེལ་ཡོད།སཱི་ཤེས་ཡོན་ནི།  འཛམ་གླིང་སྐྱེ་རྒུ་ཀུན་ལ་སྨན་པའི་༧གོང་ས་མཆོག་གི་རླབས་ཆེན་དགོངས་གཞི་ཞིག་ཡིན་སྟབས།  གཟའ་མཇུག་སློབ་གྲྭའི་དགེ་རྒན་ཙམ་མིན་པར་བོད་མི་ཚང་མས་དོ་སྣང་བྱེད་རྒྱུ་གལ་ཆེ་ཡིན་པར་ངོས་འཛིན་ཞུ་གི་ཡོད།  དེར་བརྟེན་ཉིན་གསུམ་གྱི་ཟབ་སྦྱོང་ཆ་ཚང་བོད་ཀྱི་བརྙན་འཕྲིན་ (TibetTV)གྱི་ Youtube དྲྭ་ཚིགས་དང་།  བྱང་ཀེལ་བོད་རིགས་སྤྱི་མཐུན་ཚོགས་པའི་ངོ་དེབ་བརྒྱུད་ནས་ཐད་ཀར་རྒྱང་བསྲིངས་ཞུ་གི་ཡོད།  

དེ་དང་ཆབས་ཅིག་ཞུ་རྒྱུ་ལ།  སང་ཉིན་ཚེས་ ༡༧ གཟའ་པ་སངས་ཉིན་གྱི་ཟབ་སྦྱོང་ཉིན་དང་པོ་ཚར་རྗེས།  དགོང་མོ་ཕྱག་ཚོད་དྲུག་དང་ཕྱེད་ཀའི་ཐོག་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས་བྱང་ཀེལ་བོད་རིགས་སྤྱི་མཐུན་ཚོགས་པས་གྲ་སྒྲིག་གནང་བ་ལྟར།  དེ་ཁུལ་གནས་ཞུགས་མང་ཚོགས་རྣམས་མཇལ་ནས་བཀའ་སློབ་གནང་རྒྱུའི་མཛད་རིམ་ཞིག་ཀྱང་ཡོད།  

བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭའི་དགེ་རྒན་རྣམས་ཀྱིས་དོ་སྣང་ཆེན་པོས་ཐེངས་འདིའི་ཟབ་སྦྱོང་ལ་མཉམ་ཞུགས་གནང་བ་དང་།  བྱང་ཀེལ་བོད་རིགས་སྤྱི་མཐུན་ཚོགས་པས་ཁུར་མཉམ་ལེན་གྱིས་ཕྱག་རོགས་འགན་ཁུར་གནང་བ།  བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱོར་བ།  བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ནས་  TibetTV Youtube དྲྭ་ཚིགས་བརྒྱུད་ཟབ་སྦྱོང་ཐད་གཏོང་ཆོག་པའི་མཐུན་རྐྱེན་གནང་བ་བཅས་ལ་སྐུ་ཚབ་དོན་ཁང་དང་བྱང་ཀེལ་བོད་རིགས་སྤྱི་མཐུན་ཚོགས་པས་གོ་སྐབས་འདི་བརྒྱུ་ཐུགས་རྗེ་ཆེ་ཞུ་རྒྱུ་ཡིན།

འབྲེལ་བ་གནང་ཡུལ།  

བྱང་ཀེལ་ཚོགས་གཙོ་སྦྱིན་པ་མཐར་ཕྱིན།  ༥༡༠ ༢༣༠ ༨༣༣༣

བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས།  ༣༤༧ ༨༤༠ ༣༢༨༡