༄༅།། ཕྱི་ལོ་ ༢༠༢༣ ཟླ་བ་ ༣ ཚེས་ ༢༧ རེས་གཟའ་ཟླ་བའི་ཉིན་ཧིན་བོད་མཛའ་འབྲེལ་ཚོགས་པ་དང་ཧི་མཱ་ཅལ་མངའ་སྡེའི་སིར་མོར་རྫོང་ནང་ཡོད་པའི་སྤོན་ཊ་ཆོལ་གསུམ་དང་། ས་སྐྱ་སྤུ་རུ་ཝ་ལ། ཁམས་ཀཿཐོག་ས་ཊོན། ཀུམ་རའོ་སྒ་པ་བོད་མིའི་གཞིས་ཆགས་ཐུན་མོང་ནས་བོད་དོན་གོ་རྟོགས་ལས་འགུལ་ཞིག་གོ་སྒྲིག་ཞུ་དགོས་དོན་གཙོ་བོ་ནི་སིར་མོར་རྫོང་ནང་གི་ཧིན་བོད་མཛའ་འབྲེལ་ཚོགས་པའི་ཚོགས་མི་དང་། ལྷག་པར་རྒྱ་གར་ཡུལ་མི་རྣམས་ལ་བོད་དོན་གོ་རྟོགས་ཡོང་ཐབས་ཆེད་དམིགས་པ་ཞིག་ཡིན།བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་ཟུར་ཀརྨ་ཡེ་ཤེས་མཆོག་སྐུ་མགྲོན་གཙོ་བོར་གདན་ཞུས་དང་། ཆེས་མཐོ་སྐུ་མགྲོན་འཕྲོད་བསྟེན་བཀའ་ཟུར་ཆོས་སྐྱོང་དབང་ཕྱུག་མཆོག དམིགས་བསལ་སྐུ་མགྲོན་སིར་མོར་རྫོང་ཁུལ་གྱི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་མཱ་ཌཱན་ལཱལ་ཁུ་རཱ་ནཱ་ (Dr. Madan Lal Khurana) ལགས་དང་ལྡི་ལི་འཕགས་བོད་འབྲེལ་མཐུད་ལས་ཁང་གི་སྐུ་ཚབ་བཀྲ་ཤིས་བདེ་སྐྱིད་ལགས་བཅས་གདན་འདྲེན་ཞུས་ཡོད།

ཕྱི་དྲིལ་བོད་ཀྱི་འགྲེམས་སྟོན་ཁང་ནས་བོད་དོན་དང་འབྲེལ་བའི་པར་རིས་ཁག་འགྲེམས་སྟོན་ཞུས་ཡོད་པ་མ་ཟད། སྤོན་ཊ་ཡན་ལག་སྨན་རྩིས་ཁང་ནས་བོད་ཀྱི་སྲོལ་རྒྱུན་གྱི་ཐོག་ནས་རྒྱ་གར་ཡུལ་མིའི་ནད་པར་བརྟག་དཔྱད་དང་བོད་ཀྱི་གསོ་བ་རིགས་པའི་སྨན་གཞུང་དང་དཀར་རྩིས་སྐོར་འགྲེམས་སྟོན་དང་ངོ་སྤྲོད་གནང་ཡོད།

གོ་སྒྲིག་ཚོགས་ཆུང་གི་ངོས་ནས་སྐུ་མགྲོན་རྣམས་ལ་ཐུགས་རྗེ་ལེགས་ཕུལ་གྱི་ཕྱག་རྟགས་ཕུལ་བ་དང་ཆབས་ཅིག་རྒྱ་གར་དབུས་གཞུང་དང་ལྷག་པར་ཧི་མ་ཅཱལ་མངའ་གཞུང་ནས་བོད་མི་ཚོར་ལོ་ངོ་བཅུ་ཕྲག་རིང་མཐུན་འགྱུར་རོགས་སྐྱོར་གནང་བར་ཐུགས་རྗེ་ཆེ་ཞུ་ཡོད་པ་བཅས། །