༄༅། །འདི་གར་བྱང་ཨ་རིའི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། བྱང་ཨ་རིའི་བོད་མི་གནས་སྡོད་བྱེད་ཡུལ་ས་གནས་མང་ཆེ་བའི་ནང་ལོ་ལྟར་བོད་ཀྱི་ལོ་གསར་སྲུང་བརྩི་ཞུ་གི་ཡོད་པ་བཞིན།  འདི་ལོ་ཡང་ས་གནས་སོ་སོའི་ཡུལ་དུས་གནས་བབ་ལ་གཞིགས་ཏེ།  རྣམ་པ་འདྲ་མིན་སྣ་ཚོགས་ཀྱི་ཐོག་ནས་བོད་ཆུ་ཡོས་ལོའི་ལོ་གསར་སྲུང་བརྩི་ཞུས་ཡོད།  བོད་མི་རིགས་ནི་ལོ་རྒྱུས་དུས་ཡུན་རིང་ཞིང་།  ཤིན་ཏུ་ངོ་ཚར་ཆེ་ལ་ཐུན་མོང་མ་ཡིན་པའི་ཡུལ་སྲོལ་གོམས་གཤིས་སྣེ་འཛོམས་ཀྱི་མི་རིགས་ཤིག་ཡིན།  བྱང་ཨ་རིའི་ནང་བོད་ཀྱི་ལོ་གསར་དང་།  ༧སྐུའི་འཁྲུངས་སྐར་སོགས་དུས་ཆེན་ཁག་ཅིག་སྲུང་བརྩི་ཞུ་བཞིན་པ་འདིས།  མ་འོངས་བོད་ཀྱི་བདག་པོ་ཡིན་པའི་རང་རིགས་གཞོན་སྐྱེས་རྣམས་ལ་བོད་ཀྱི་རིག་གཞུང་གི་རྩ་ཆེའི་རིན་ཐང་ངོ་སྤྲོད་བྱེད་རྒྱུར་ཕན་ཐོགས་ཡོང་གི་ཡོད་པ་མ་ཟད།  ས་གནས་ཀྱི་ཕྱི་རྒྱལ་དཔོན་རིགས་རྣམས་ལ་བོད་པའི་ཐུན་མོང་མ་ཡིན་པའི་ཡུལ་གོམས་གཤིས་ལུགས་དང་།  རིག་གཞུང་ངོ་སྤྲོད་བྱེད་རྒྱུར་ཕན་ཐོགས་ཆེན་པོ་བྱུང་དང་འབྱུང་བཞིན་ཡོད།  འདི་གར་གནས་ཚུལ་འབྱོར་བར་གཞིགས་ན།  བོད་རིགས་སྤྱི་མཐུན་ཚོགས་པ་ཁག་ཅིག་ནས་འདི་ལོའི་ཆུ་ཡོས་ལོ་གསར་སྲུང་བརྩིའི་མཛད་སྒོའི་སྐབས།  ས་གནས་ཀྱི་གྲོས་ཚོགས་འཐུས་མི་དང་།  གྲོང་ཁྱེར་སྤྱི་ཁྱབ་པ།  གྲོང་སྡེ་ལས་ཁུངས་ཀྱི་འགན་འཛིན་ལྷན་ཚོགས་ཀྱི་འཐུས་མི།  གྲོང་སྡེའི་སློབ་གསོ་ལས་ཁུངས་དང་འབྲེལ་བའི་མི་སྣ་བཅས་སྐུ་མགྲོན་དུ་གདན་ཞུ་གནང་པ་འདིས།  ས་གནས་དཔོན་རིགས་ཀྱིས་བོད་རིགས་སྤྱི་མཐུན་ཚོགས་པའི་གནས་ཚུལ་རྒྱུས་ལོན་དང་།  བོད་པ་རྣམས་མིའི་ལུང་པར་གནས་ཀྱང་རང་ཉིད་ཀྱི་ཆོས་དང་རིག་གཞུང་སྲུང་སྐྱོབ་ལ་དམིགས་བསལ་གྱི་དོ་སྣང་ཡོད་པ་ཤེས་རྒྱུར་ཕན་ཐོགས་ངེས་ཅན་བྱུང་ཡོད་པར་ངོས་འཛིན་ཞུ་གི་ཡོད།   བྱང་ཀ་ལེ་ཕོ་ནི་ཡ།   བྱང་ཀ་ལེ་ཕོ་ནི་ཡ།   ནིའུ་ཡོག་དང་ནིའུ་འཇར་སི།  མི་ནི་སོ་ཊ།   མི་ནི་སོ་ཊ།  ཡུ་ཁྲཱ་བཅས་ས་གནས་ནས་ལོ་གསར་སྲུང་བརྩི་ཞུས་པའི་སྐོར་གྱི་གནས་ཚུལ་འབྱོར་བ་རྣམས་རེ་རེ་བཞིན་ཞིབ་རྒྱས་འགོད་དགོས་བྱུང་ན།  ཀློག་པ་པོ་རྣམས་ལ་དུས་ཚོད་འདང་མིན་གྱི་སྐུ་ངལ་ཡོང་སྲིད་པར་བརྟེན།  འདྲ་པར་གནས་ཚུལ་དང་།  དྲྭ་ཐག་མཚམས་སྦྱོར་བྱས་པའི་ལམ་ནས་ལོ་གསར་སྲུང་བརྩིའི་གནས་ཚུལ་ངོ་སྤྲོད་ཞུས་ཡོད། །