༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་རྒྱ་གར་གྱི་འཕྲོད་བསྟེན་ཚོགས་པ་ (HISP) གཉིས་ཐུན་མོང་གིས་འགྲོ་ཕན་སྨན་རྩིས་ཁང་དུ་འཕྲོད་བསྟེན་དང་འབྲེལ་བའི་ཚོད་ལྟའི་གྲངས་ཐོ་བསྡུ་ལེན་སྐོར་ཟབ་སྦྱོང་གོ་སྒྲིག་གནང་ཡོད་པ་དང་། ཟབ་སྦྱོང་གི་དམིགས་ཡུལ་གཙོ་བོ་ནི། འཕྲོད་བསྟེན་དང་འབྲེལ་བའི་གྲངས་ཐོ་བསྡུ་ལེན་སྟབས་བདེ་ཡོང་སླད་ཡིན་ཞིང་། ཟབ་སྦྱོང་ཐོག་འགྲོ་ཕན་སྨན་རྩིས་ཁང་གི་གངས་སྐྱིད་དང་མེག་གྷན་ཡན་ལག་སྨན་ཁང་གི་སྨན་པ་ཁག་གཅིག་མཉམ་ཞུགས་གནང་ཡོད། ཟབ་སྦྱོང་དེ་བཞིན་ཕྱི་ལོ་ ༢༠༢༣ ཟླ་བ་ ༣ ཚེས་ ༠༢ ཉིན་འགོ་བཙུགས་ཀྱིས་ཕྱི་ཚེས་ ༠༤ བར་འཚོག་གི་ཡོད།
འགྲོ་ཕན་སྨན་རྩིས་ཁང་དང་བོད་མིའི་དང་བླངས་འཕྲོད་བསྟེན་ཚོགས་པ་གཉིས་ཀྱིས་བཙན་བྱོལ་བོད་མིའི་སྤྱི་ཚོགས་ཁྲོད་སྤྱི་ཡོངས་ཀྱི་འཕྲོད་བསྟེན་གནས་སྟངས་སྐོར་གོ་རྟོགས་ཡོང་སླད་གྲངས་ཐོ་བསྡུ་ལེན་གནང་དགོས་པ་གལ་ཆེན་པོ་ཆགས་ཡོད། ཟབ་སྦྱོང་གི་འགྲོ་གྲོན་ཆེད་དུ་ཨ་རིའི་རོགས་ཚོགས་ (USAID) ནས་མཐུན་འགྱུར་གནང་ཡོད་པ་བཅས།།
