༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༣ ཟླ་ ༣ ཚེས་ ༩ ཉིན་གྱི་ཕྱི་དྲོ་ཆུ་ཚོད་ ༣ པའི་ཐོག་མེག་སི་ཀོ་གྲོས་ཚོགས་འཐུས་མི་ལྕམ་སྐུ་ལི་ཌཡེ་ གྷར་སི་ཨ་ནཱ་ཡཱ་ (Lidia Garcia Anaya) མཆོག་དང་། གྲོས་ཚོགས་འཐུས་མི་ལྕམ་སྐུ་ཌུལ་སེ་མཱ་རཡེ་ (Dulce Maria Corina) མཆོག གྲོས་ཚོགས་འཐུས་མི་ལྕམ་སྐུ་ཨི་ནེ་སི་པཱ་རཱ་ཇའོ་རེ་ཛི་ (Ines Parra Juarez) མཆོག གྲོས་ཚོགས་འཐུས་མི་སྐུ་ཞབས་སལ་ཝ་ཌོར་ཀ་རོ་ཀེ་བྷི་རེ་ར་ (Salvador Caro Cabrera) མཆོག གྲོས་ཚོགས་འཐུས་མི་སྐུ་ཞབས་ཇོ་སེ་སལ་ཝ་ཌོར་ཊོ་ཝར་ཝར་གྷ་ས་ (Jose Salvador Tovar Vargas) མཆོག གྲོས་ཚོགས་འཐུས་མི་ལྕམ་སྐུ་མ་རཡེ་ཨི་ལེ་ནཱ་ལི་མོན་གྷར་སི་ཡ་ (Maria Elena Limon Garcia) མཆོག གྲོས་ཚོགས་འཐུས་མི་ལྕམ་སྐུ་མཱ་ཊེ་རི་ས་རོ་སའོ་ར་ཨོ་ཆའོ་མེ་ཇཱ་ (Ma Teresa Rosaura Ochoa Mejia) མཆོག གྲོས་ཚོགས་འཐུས་མི་ལྕམ་སྐུ་ཇུ་ལེ་ཊ་མེ་ཇཱ་ཨི་བྷ་ནེ་ཛི་ (Julieta Mejia Ibanez) མཆོག གྲོས་ཚོགས་འཐུས་མི་ཨོསྐུ་ཞབས་ཊོ་ནེལ་གྷར་སི་ཡ་མོན་ཊེལ་ (Otoniel Garcia Montiel) མཆོག གྲོས་ཚོགས་འཐུས་མི་ལྕམ་སྐུ་ལི་ཌི་ཡ་པེ་རེ་ཛི་བྷར་སི་ན་ས་ (Lidia Perez Barcenas) མཆོག གྲོས་ཚོགས་འཐུས་མི་ལྕམ་སྐུ་སིན་ཐེཡ་ཨི་ལིཡ་ན་ལོ་པེཛི་ ཀེསི་ཊོ་རོ་ (Cynthia Iliana Lopez Castro) མཆོག གྲོས་ཚོགས་འཐུས་མི་སྐུ་ཞབས་ཇོ་སེ་མི་གྷུལ་ཌི་ལ་ཁར་ཛི་ལི་མ་ (Jose Miguel De La Cruz Lima) མཆོག གྲོས་ཚོགས་འཐུས་མི་ལྕམ་སྐུ་མཱ་རཱ་ཨི་སཱ་བྷེལ་ཨལ་ཧྥ་རོ་མོ་ར་ལེ་སི་ (Maria Isabel Alfaro Morales) མཆོག་བཅས་ལས་གྲུབ་པའི་མེག་སི་ཀོ་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་དང་། ཕྱག་རོགས་ལས་བྱེད་རྣམ་པ་བཅས་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་སུ་ཕེབས་གནང་ཡོད།དེ་ཡང་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྐུ་མགྲོན་རྣམ་པ་སྣེ་ལེན་དང་། གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད། དེ་རྗེས་སྤྱི་འཐུས་རྒྱུན་ལས་ཚོགས་ཁང་ནང་དཔལ་ལྡན་ཚོགས་གཙོ་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་མི་སྤྱི་འཐུས་རྣམས་དང་ལྷན་མཇལ་འཕྲད་གནང་ཞིང་།སྐབས་དེར་དཔལ་ལྡན་ཚོགས་གཙོ་མཆོག་གིས་ཐོག་མར་མེག་སི་ཀོ་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་བོད་མི་མང་སྤྱི་འཐུས་ལྷན་ཁང་དུ་ཕེབས་པར་དགའ་ཚོར་ཆེན་པོ་བྱུང་ཞེས་དང་། དེ་བཞིན་ལོ་སྔོན་མའི་ཕྱི་ཟླ་ ༡༡ ནང་མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་གསར་འཛུགས་གནང་བར་ཐུགས་རྗེ་ཆེ་ཞུས་རྗེས། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། བོད་མིའི་སྒྲིག་འཛུགས་ཀྱི་ལས་དོན་བསྒྲུབ་བྱའི་སྐོར། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ། གྲོས་ཚོགས་ཚོགས་དུས་གཉིས་ཀྱི་སྐོར་སོགས་ཀྱི་ཐོག་ངོ་སྤྲོད་ཞིབ་ཕྲ་གནང་བ་དང་། དེ་རྗེས་སྤྱི་འཐུས་རྣམ་པ་དང་། མེག་སི་ཀོ་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དབར་བོད་ནང་གི་ད་ལྟའི་ཁོར་ཡུག་དང་། འགྲོ་བ་མིའི་ཐོབ་ཐང་གི་གནས་སྟངས། གྲོས་ཚོགས་ཀྱི་ལས་རིམ་སོགས་ཀྱི་ཐོག་བཀའ་བསྡུར་ལྷུགས་པོ་གནང་སོང་།མེག་སི་ཀོ་གྲོས་ཚོགས་འཐུས་མི་སྐུ་ཞབས་སལ་ཝ་ཌོར་ཀ་རོ་ཀེ་བྷི་རེ་ར་ (Salvador Caro Cabrera) མཆོག་གིས་མེག་སི་ཀོ་གྲོས་ཚོགས་འཐུས་མི་རྣམ་པས་བོད་དོན་སྤྱི་དང་། ལྷག་པར་དུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་ཐུགས་སྣང་ཆེན་པོ་གནང་གི་ཡོད་སྐོར་དང་། བོད་དོན་ཐོག་རྟག་ཏུ་རྒྱབ་སྐྱོར་གནང་རྒྱུར་ཆོད་སེམས་བརྟན་པོ་ཡོད་སྐོར་སོགས་གསུངས་གནང་རྗེས། སྐུ་ཞབས་ཁོང་གིས་དཔལ་ལྡན་ཚོགས་གཙོ་མཆོག་ལ་ཕྱག་རྟགས་ཕུལ་གནང་ཡོད་པ་བཅས། །