༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་མང་ཚོགས་ཚོས་རྒྱ་ནག་གུང་ཁྲན་གཞུང་གི་བཙན་གནོན་ལ་ངོ་རྒོལ་བྱས་ཏེ་འདི་ལོ་མི་ལོ་ཧྲིལ་པོ་  ༦༤ འཁོར་གྱི་ཡོད།  ལོ་ལྟར་ཉིན་མོ་འདིར་འཛམ་གླིང་ས་ཕྱོགས་གང་སར་གནས་པའི་བོད་མི་བཙན་བྱོལ་བ་རྣམས་ཀྱིས་རྣམ་པ་སྣ་ཚོགས་དང་གཞི་རྒྱ་ཆེ་ཆུང་འདྲ་མིན་གྱི་ལས་འགུལ་སྤེལ་སྟེ་གསུམ་བཅུའི་དུས་དྲན་སྲུང་བརྩི་ཞུ་གི་ཡོད་པ་ལྟར།  བྱང་ཨ་རིའི་ནང་དུའང་གསུམ་བཅུའི་དུས་དྲན་ཐེངས་ ༦༤ པ་སྲུང་བརྩི་ཞུས་ཡོད།  བྱང་ཨ་རིའི་ནང་མཛད་སྒོ་ཚོགས་རྒྱུ་དང་།  དུས་དྲན་འདྲ་མིན་སྲུང་བརྩིའི་སྐབས་རེས་གཟའ་སྤེན་པ་དང་ཉི་མའི་གུང་གསེང་དང་སྟབས་བསྟུན་དགོས་ཀྱི་ཡོད་ཀྱང་།  གསུམ་བཅུའི་དུས་དྲན་ནི་བོད་ཀྱི་ལོ་རྒྱུས་དང་།  ཆབ་སྲིད་ཀྱི་ཐད་ནས་ཧ་ཅང་གལ་གནད་ཆེ་བའི་དུས་ཚེས་ཤིག་ཡིན་སྟབས།  གསུམ་པའི་ཚེས་བཅུ་ཉིན་མོ་དེ་རང་ལ་སྲུང་བརྩི་ཞུ་གི་ཡོད།  བྱང་ཨ་རིར་མཚོན་ན།  བོད་རིགས་སྤྱི་མཐུན་ཚོགས་པ་ཆེ་ཆུང་བསྡོམས་ ༣༠ ཙམ་ཡོད་པ་ཚང་མའི་ནང་།  ས་གནས་མང་ཆེ་བར་བོད་རིགས་སྤྱི་མཐུན་ཚོགས་པ་འགན་ཁུར་དང་།  ས་གནས་ཆེ་ཁག་རེ་ཟུང་ནང་བོད་རིགས་སྤྱི་མཐུན་ཚོགས་པ་དང་དེ་མིན་གྱི་གཞུང་ཁོངས་མ་ཡིན་པའི་ཚོགས་པ་ཁག་མཉམ་རུབ་ཀྱི་ཐོག་ནས་གསུམ་བཅུའི་དུས་དྲན་སྲུང་བརྩིའི་མཛད་སྒོ་ཚོགས་ཏེ།  མི་ལོ་ ༦༤ སྔོན་གྱི་ཟླ་བ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་བྱུང་བའི་ལོ་རྒྱུས་དྲན་གསོ་བྱས་ཏེ་བོད་དོན་ལས་འགུལ་སྣེ་མང་སྤེལ་ཡོད།  དེ་ཡང་།  རྔམ་སྟོན་ཁྲོམ་སྐོར་དང་།  སྐད་འབོད།  ས་གནས་ཀྱི་དཔོན་རིགས་དང་།  རྒྱ་རིགས་བོད་དོན་རྒྱབ་སྐྱོར་བས་བོད་དང་བོད་མིར་གདུང་སེམས་མཉམ་བསྐྱེད་ཀྱི་གསུང་བཤད།  མངའ་སྡེ་དང་གྲོང་ཁྱེར་སྲིད་གཞུང་གི་མདུན་ཐང་ངམ་ཚོགས་ཁང་ནང་བོད་ཀྱི་རྒྱལ་དར་སྒྲེང་འཛུགས།  ལྔ་བཅུ་ང་དགུ་ལོར་བོད་ཀྱི་རྒྱལ་ས་ལྷ་སར་གསུམ་བཅུའི་སྒེར་ལངས་གང་འདྲ་བྱས་ནས་བྱུང་བའི་སྐོར།  རྒྱ་ནག་གུང་ཁྲན་གཞུང་གིས་བོད་ནང་བཙན་གནོན་གདུག་རྩུབ་ཀྱི་སྲིད་བྱུས་ལག་བསྟར་བྱེད་བཞིན་པར་ངོ་རྒོལ། བོད་མིའི་སྒྲིག་འཛུགས་བཀའ་ཤག་དང་།  བོད་མི་དམངས་སྤྱི་འཐུས་ལྷན་ཚོགས་ཀྱི་གཞུང་འབྲེལ་གསུང་བཤད་སྒྲོགས་སྦྱང་།  རྒྱལ་དར་སྒྲེང་འཛུགས།  རྒྱལ་གླུ་དཀྲོལ་གཏོང་།  བདེན་ཚིག་སྨོན་ལམ་གསུང་འདོན།  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པའི་སྨོན་ཚིག་སྒྲོགས་སྦྱང་།  གྲོས་ཚོགས་འཐུས་མིས་གསུང་བཤད།  ཡིག་ཆ་འགྲེམས་སྤེལ་སོགས་རྣམ་པ་སྣ་ཚོགས་ཀྱི་ཐོག་ནས་གསུམ་བཅུའི་དུས་དྲན་ཐེངས་ ༦༤ པ་སྲུང་བརྩི་ཞུས་ཡོད་པ་མ་ཟད།  ཨ་རིར་མཚོན་ན།  འདི་ལོའི་གསུམ་བཅུའི་དུས་དྲན་གྱི་སྐབས་འདིར། ཨ་རིའི་གྲོས་ཚོགས་གོང་འོག་གཉིས་ནང་ཧ་ཅང་གལ་གནད་ཆེ་བའི་བོད་དོན་ཁྲིམས་འཆར་གསར་པ་ (A Resolution to the Tibet-China Conflict Act [H.R. 533, S.138]) ཡང་བསྐྱར་ངོ་སྤྲོད་ཟིན་པ་དེ་ལ་གྲོས་ཚོགས་འཐུས་མིའི་རྒྱབ་སྐྱོར་ཐོབ་ཐབས་སུ་ཕྱོགས་གང་ས་ནས་འབད་བརྩོན་གནང་བཞིན་པའི་སྐབས་ཡིན་སྟབས།  བོད་རིགས་སྤྱི་མཐུན་ཚོགས་པ་ཁག་གིས་ཐེངས་འདིའི་གསུམ་བཅུའི་དུས་དྲན་གྱི་གོ་སྐབས་དང་བསྟུན་ཏེ་སོ་སོའི་ཁྱབ་ཁོངས་ས་གནས་ཀྱི་གྲོས་ཚོགས་འཐུས་མིར་རྒྱབ་སྐྱོར་ཡོང་བའི་ཞུ་སྐུལ་སྙན་ཞུ་ཕུལ་བ་སོགས་གསུམ་བཅུའི་དུས་དྲན་ཐེངས་ ༦༤ པ་ཟབ་རྒྱས་ངང་སྲུང་བརྩི་ཞུས་ཡོད་རེད། །