༄༅། །ཨིན་ཡུལ་གྱི་རྒྱལ་ས་ལོན་ཊོན་དུ་བོད་དོན་འཐབ་རྩོད་དང་ཡང་སྒོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་འབྲེལ་བའི་གློག་བརྙན་ ༼ བོད་ནམ་ཡང་མ་བརྗེད། ༽ ཅེས་པ་གློག་བརྙན་ཁང་གཉིས་སུ་གཟིགས་འབུལ་ཞུས་ཡོད།
དེ་ཡང་གཟིགས་ཕུད་ཀྱི་ཐོག་མར་དགེ་འདུན་པ་ཁག་གཅིག་གིས་ཤིས་བརྗོད་གསུང་འདོན་དང་འབྲེལ་གློག་བརྙན་བཟོ་སྒྲིག་པ་སྐུ་ཞབས་ཇིན་པོལ་མར་ཊི་ནེས་ (Jean-Paul Martinez) ལགས་ཀྱིས་གློག་བརྙན་འདིའི་བཟོ་སྒྲིག་བརྒྱུད་རིམ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་ཞབས་ཧར་མིན་དར་སིངྒ་ (Harminder Singh) ལགས་གཉིས་ཀྱི་མཇལ་འཕྲད་སྐོར་ངོ་སྤྲོད་དང་། གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། དགའ་ལྡན་ཕོ་བྲང་ཡིག་ཚང་། བོད་མིའི་སྒྲིག་འཛུགས། ཨིན་ཡུལ་སྐུ་ཚབ་དོན་ཁང་བཅས་ནས་ཁོང་ལ་མཐུན་འགྱུར་གནང་བར་བཀའ་དྲིན་རྗེས་དྲན་ཞུས་ཡོད་པ་རེད།
དེ་རྗེས་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་དབུ་འབྱེད་གསུང་བཤད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་གཏང་རྒྱུའི་དགོངས་བཞེད་སྐོར་ངོ་སྤྲོད་གནང་སྐབས་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མི་རིགས་ཚང་མ་ཁྱིམ་ཚང་གཅིག་གི་ནང་མི་ལྟར་ཡིན་ཞིང་། དམག་འཁྲུག་དང་འཁྲུག་རྩོད་ནི་འདས་པའི་གནད་དོན་ཞིག་ཡིན་པ་དང་། ད་ཆ་འགྲོ་བ་མི་རིགས་ཐུན་མོང་ནས་འཛམ་གླིང་ལ་ཞི་བདེ་དང་བདེ་སྐྱིད་སྐྲུན་ཆེད་ཕྱར་བ་གྲུ་འདེགས་གནང་དགོས་པའི་བཀའ་གནང་གི་ཡོད་ཅེས་སོགས་གསུངས།
སྐབས་དེར་དམིགས་བསལ་སྐུ་མགྲོན་དཱི་པཀ་ཅོཔ་ཊ་ (Deepak Chopra) ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་སྐོར་ངོ་སྤྲོད་དང་འབྲེལ་མགོན་པོ་གང་ཉིད་ནི་འཛམ་གླིང་གི་ཞི་བདེ་དང་། བྱམས་བརྩེ། ཤེས་རབ་ཀྱི་ཕོ་ཉ་ཡིན་པ་མ་ཟད། ནང་པའི་བྱམས་བརྩེའི་ལྟ་བ་དང་། གཞན་སེམས། སྙིང་རྗེ། བྱམས་པ་སོགས་ཀྱི་རང་གཟུགས་ཡིན་པས། མགོན་པོ་མཆོག་གིས་སེམས་ཅན་ཀུན་ལ་བྱམས་བརྩེས་གཟིགས་སྐྱོང་གནང་གི་ཡོད་ཅེས་དང་། དེ་མཚུངས་ཁོང་ནི་འགྲོ་བ་མིའི་ཐོབ་ཐང་དང་། ཁོར་ཡུག་སྲུང་སྐྱོབ། ཆོས་ལུགས་མཐུན་འབྲེལ། འཚེ་བ་མེད་པའི་དེད་དཔོན་ཆེན་པོ་ཞིག་ཡིན་ཞེས་གསུངས།
གསུང་བཤད་གྲུབ་རྗེས་དྲི་བ་དྲིས་ལན་གྱི་ལས་རིམ་ཐོག་གློག་བརྙན་བཟོ་སྒྲིག་པ་ཇིན་པོལ་ལགས་ཀྱིས་བོད་དོན་གློག་བརྙན་འདིའི་ཤུགས་རྐྱེན་འོག་གློག་བརྙན་རྗེས་མ་དེ་ཁོར་ཡུག་སྐོར་བཟོ་འགོ་བཙུགས་ཡིན་སྐོར་ངོ་སྤྲོད་གནང་ཡོད།
སྤྱིར་བོད་ནམ་ཡང་མ་བརྗེད་ཅེས་པའི་གློག་བརྙན་དེ་བཞིན་བོད་མིའི་རང་དབང་འཐབ་རྩོད་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཆིབས་སྒྱུར་གྱིས་འཛམ་གླིང་སྟེང་གི་ཆེས་སྙན་གྲགས་ཆེ་བའི་སྐྱབས་བཅོལ་བ་ཞིག་ཏུ་གྱུར་ཚུལ་གསལ་བའི་གློག་བརྙན་ཞིག་ཡིན་པ་དང་། དེའི་ནང་བོད་རང་བཙན་མ་ཤོར་སྔོན་སྐུ་ཞབས་ཧེན་རི་ཅི་ཧེ་རི་ཡར་ (Heinrich Harrier) ལགས་ཀྱིས་བླངས་པའི་པར་རིས་ཁག་གཅིག་ཀྱང་བསྟན་ཡོད་པ་བཅས།།
