༄༅། །ཕྱི་ལོ་ ༢༠༢༣ ཟླ་བ་ ༠༣ ཚེས་ ༡༡ ཉིན་ཨི་ཊ་ལིའི་རྒྱལ་ས་རོམ་དུ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ནས་རྒྱལ་སྤྱིའི་ཁྲིམས་དོན་མཁས་པ་སྐུ་ཞབས་མ་ཧི་ཀལ་ཝན་ཝལཊ་ཝན་པ་རག་ (Michael Van Walt Praag) ལགས་ཀྱིས་བརྩམས་པའི་བོད་དོན་གནད་བསྡུས་ ༢༠།༢༠ ཞེས་པ་ཨི་ཊ་ལི་སྐད་ཐོག་བསྒྱུར་བ་དེ་ཉིད་དབུ་འབྱེད་གནང་ཡོད།

དཔེ་དེབ་དབུ་འབྱེད་ཀྱི་མཛད་སྒོ་དེ་བཞིན་ཨི་ཊ་ལི་དང་བོད་མཛའ་འབྲེལ་ཚོགས་པས་གོ་སྒྲིག་གནང་ཞིང་། སྐབས་དེར་ཚོགས་གཙོ་ཀ་ལའུ་ཊིའོ་ཀར་ཊི་ལི་ (Claudio Cardelli) ལགས་ཀྱིས་བོད་ནང་གི་དངོས་ཡོད་གནས་སྟངས་སྐོར་གོ་རྟོགས་སྤེལ་རྒྱུར་ཚོགས་པའི་ངོས་ནས་འབད་རྩོལ་རྒྱུན་མཐུད་བྱེད་བཞིན་པའི་སྐོར་དང་། དེ་བཞིན་སྐུ་ཞབས་མ་ཧི་ཀལ་ཝན་ཝལཊ་ཝན་པ་རག་ལགས་ཀྱིས་བརྩམས་པའི་དཔེ་དེབ་ཀྱི་གལ་གནད་དང་འབྲེལ་ཏེ་རྒྱལ་སྤྱིའི་ཁྲིམས་ཐོག་ཀྱི་ལྟ་སྟངས་ནས་བོད་ཀྱི་ལོ་རྒྱུས་ཤེས་རྟོགས་དགོས་རྒྱུ་གལ་ཆེན་པོ་ཡིན་ཞེས་གསུངས། དབུ་འབྱེད་གྲུབ་མཚམས་རྩོམ་པ་པོ་དང་ཡུན་རིང་བོད་དོན་རྒྱབ་སྐྱོར་བ་པི་རོ་ཝར་ནི་( Piero Verni) ལགས་དང་སྐུ་ཞབས་མ་ཧི་ཀལ་ཝན་ཝལཊ་ཝན་པ་རག་ལགས་གཉིས་ནས་དཔེ་དེབ་དེའི་གལ་གནད་སྐོར་བགྲོ་གླེང་གནང་ཞིང་། དེ་རྗེས་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཨི་ཊ་ལི་དང་བོད་མཛའ་འབྲེལ་ཚོགས་པས་ལས་དོན་གལ་ཆེ་ཞིག་ལེགས་གྲུབ་བྱུང་བར་བསྔགས་བརྗོད་དང་། དཔེ་དེབ་དེ་ཉིད་ཀྱིས་ཨི་ཊ་ལི་ནང་བོད་དོན་དྲིལ་བསྒྲགས་བྱེད་རྒྱུར་ཕན་ཐོགས་ཆེན་པོ་ཡོང་ངེས་རེད་ཅེས་གསུངས་ཡོད་པ་རེད།

དཔེ་དེབ་བསྒྱུར་རྒྱུའི་ལས་གཞི་དེར་ཨི་ཊ་ལི་དང་བོད་མཛའ་འབྲེལ་ཚོགས་པས་འགན་ཁུར་དང་ཨི་ཊ་ལི་ནང་པའི་མཐུན་ཚོགས་ཀྱིས་དཔལ་འབྱོར་མཐུན་འགྱུར་སྦྱར་ཡོད་པ་བཅས།།